Kapitulo 106

Mga Ilustrasyon Mahitungod han Urubasan

HI Jesus aadto pa ha templo. Nasupla pa la niya an mga lider han relihiyon nga nagkwestyon kon diin tikang an iya awtoridad ha pagbuhat han mga butang. Han waray pa hira pakakayakan, nagpakiana hi Jesus: “Ano an iyo masisiring hini?” Ngan pinaagi hin ilustrasyon, iginpakita niya ha ira kon ano gud hira nga klase hin mga tawo.

“May usa ka tawo nga duha an anak,” nag-istorya hi Jesus. “Ginsidngan niya an magurang, ‘Anak, pagtrabaho ha urubasan yana nga adlaw.’ Binaton hiya, ‘Oo, Tatay.’ Pero waray hiya kumadto. Sugad liwat hito an ginsiring han tatay ha manghod. Pero binaton hiya, ‘Diri ako makadto.’ Katapos nagbasol hiya ngan kinadto ha urubasan. Hin-o ha ira an nagtuman han kaburut-on han ira amay?” nagpakiana hi Jesus.

“An manghod,” binaton an mga nakontra ha iya.

Salit nagsaysay hi Jesus: “Ha pagkamatuod, susumatan ko kamo nga an mga parasukot hin buhis ngan an mga puta mahiuuna ha iyo pagsulod ha Ginhadian han Dios.” Ha siyahan diniri nga mag-alagad ha Dios an mga parasukot hin buhis ngan an mga puta. Kondi, pariho ha manghod nga anak, nagbasol hira ngan nag-alagad ha iya. Ha luyo nga bahin, an mga lider han relihiyon, pariho han magurang nga anak, nagsaad nga mag-aalagad ha Dios, pero sugad han ginsiring ni Jesus: “Hi Juan [nga Parabaptis] kinanhi ha iyo ha pagtutdo han dalan han katadongan, kondi waray kamo tumoo ha iya. Pero an mga parasukot hin buhis ngan an mga puta tinoo ha iya. Kondi kamo, bisan kon nakita niyo ini, waray kamo magbasol ngan waray tumoo ha iya.”

Katapos iginpatin-aw niya nga an kapakyas han mga lider han relihiyon diri la tungod ha pagpasibaya han pag-alagad ha Dios. Lugod, tungod kay maraot gud hira. “May usa nga tawo nga agaron han panimalay,” nag-istorya hi Jesus. “Nagtanom hiya hin urubasan ngan iya ito gin-alad. Nag-ukad hiya hin purog-an han ubas ngan nagtindog hin torre, ngan iya ito ginpaataman ha mga parauma ngan nagbiyahe hiya ha iba nga nasud. Kahinog han mga ubas, ginpakadto niya an iya mga uripon ha mga parauma basi kuhaon an iya bahín. Pero gindakop han mga parauma an iya mga uripon, may ginkastigo, may ginpatay, ngan may ginbato. Nagsugo utro hiya hin iba nga uripon nga mas damu kay ha siyahan. Kondi amo gihapon an ira ginbuhat.”

An “mga uripon” amo an mga propeta nga ginsugo han “agaron han panimalay,” hi Jehova nga Dios, ngadto ha “mga parauma” han iya “urubasan.” Ito nga mga parauma amo an nangunguna nga mga representante han nasud han Israel, an “urubasan” han Dios sumala ha Biblia.

Tungod kay ginmaltrato ngan ginpatay han “mga parauma” an “mga uripon,” nagsaysay hi Jesus: “Ha urhi, iya [an tag-iya han urubasan] ginpakadto ha ira an iya anak, kay nasiring hiya, ‘Irirespeto nira an akon anak.’ Han nakita han mga parauma an anak, nagsarabot hira, ‘Ini an eredero. Tana, patayon naton hiya ngan kuhaon naton an iya panurundon!’ Salit ira gindakop hiya ngan gindanas ngadto ha gawas han urubasan ngan ginpatay.”

Ginpakianhan yana ni Jesus an mga lider han relihiyon: “Kon umabot an tag-iya han urubasan, ano an iya bubuhaton ha mga parauma?”

Binaton hira: “Tungod kay maraot hira, iya papatayon hira. Ngan an iya urubasan igpapaataman niya ha iba nga parauma nga maghahatag han iya bahín pag-abot han panahon.”

Tungod hito, waray nira masantop nga ginhuhukman na nira an ira kalugaringon, kay kaupod hira han mga Israelita nga “mga parauma” han “urubasan” ni Jehova nga amo an nasud han Israel. An bunga nga ginlalaoman ni Jehova tikang ha sugad nga mga parauma amo an pagtoo ha iya Anak, an totoo nga Mesias. Tungod kay waray hira makapamunga hin sugad hito, nagpahamangno hi Jesus: “Waray gud ba niyo mabasa ha Kasuratan [ha Salmo 118:22, 23]: ‘An bato nga iginsalikway han mga magtirindog amo an nagin pinakaimportante nga pandugtong nga bato ha eskina? Tikang ini kan Jehova, ngan maopay gud ini pagkit-on.’ Tungod hini nasiring ako ha iyo: Kukuhaon han Dios an iya Ginhadian tikang ha iyo ngan ihahatag ha usa nga nasud nga nagbubuhat han iya kaburut-on. Ngan an tawo nga mahuhulog ngada hini nga bato magkakababarian. Sugad man, an bisan hin-o nga mahulogan hito nga bato, marurumok.”

Yana nasantop han mga eskriba ngan punoan nga mga saserdote nga hira an gin-uunabi ni Jesus, salit karuyag nira nga patayon hiya, an may katungod nga “eredero.” Salit an pribilehiyo nga magin mga magmarando ha Ginhadian han Dios kukuhaon ha ira sugad nga nasud, ngan mag-iestablisar hin bag-o nga nasud han ‘mga parauma han urubasan’ nga mamumunga hin maopay.

Tungod kay nahahadlok an mga lider han relihiyon ha mga tawo, kay gintatagad nira hi Jesus sugad nga propeta, waray hira magsari nga patayon hiya hito nga higayon. Mateo 21:28-46; Marcos 12:1-12; Lucas 20:9-19; Isaias 5:1-7.

▪ Hin-o an ginrirepresentaran han duha nga anak ha siyahan nga ilustrasyon ni Jesus?

▪ Ha ikaduha nga ilustrasyon, hin-o an ginrirepresentaran han “agaron han panimalay,” “urubasan,” “mga parauma,” “mga uripon,” ngan “eredero”?

▪ Ano an mahitatabo ha ‘mga parauma han urubasan,’ ngan hin-o an isasaliwan ha ira?