Kapitulo 1

Mga Mensahe Tikang ha Langit

AN Biblia usa gud nga mensahe tikang ha langit, nga iginhatag han aton langitnon nga Amay ha pagtutdo ha aton. Pero duha nga espesyal nga mensahe an iginpahayag sobra 2,000 ka tuig na an naglabay pinaagi hin anghel nga “natindog hirani ha Dios.” Gabriel an ngaran hito nga anghel. Aton usisahon an panhitabo hinin duha nga importante nga pagbisita nganhi ha tuna.

Tuig adto han 3 B.C.E. Ha kabungtoran han Judea nga bangin diri hirayo ha Jerusalem, naukoy an saserdote ni Jehova nga hi Sakarias. Lagas na hiya pati an iya asawa nga hi Elizabeth, ngan waray hira anak. Turno hadto ni Sakarias ha pag-alagad ha templo han Dios ha Jerusalem, ngan tigda la nga nagpakita hi Gabriel ha too han halaran han insenso.

Nahadlok gud hi Sakarias. Pero ginpakalma hiya ni Gabriel: “Ayaw kahadlok, Sakarias, kay ginpamatian han Dios an imo pangamuyo, ngan hi Elizabeth nga imo asawa mag-aanak hin lalaki, ngan Juan an imo igngangaran ha iya.” Nagsumat liwat hi Gabriel nga hi Juan “magigin harangdon . . . ha atubangan ni Jehova” ngan iya ‘ig-aandam an katawohan para kan Jehova.’

Kondi, diri makatoo hito hi Sakarias. Ha ira edad ni Elizabeth, baga hin imposible nga magkaada hira anak. Salit ginsumatan hiya ni Gabriel: “Diri ka makakatingog ngan makakayakan tubtob ha adlaw nga mahitabo ini, kay waray ka tumoo ha akon mga pulong nga matutuman ha itinanda nga panahon.”

Hito nga panahon, an mga tawo ha gawas nahipapausa nga maiha hi Sakarias ha templo. Paggawas niya, waray na hiya pakayakan lugod nagsininyas na la, salit naghunahuna hira nga nakakita hiya hin urusahon.

Han natapos an turno ni Sakarias ha pag-alagad ha templo, inuli hiya. Waray pag-iha, natuman gud an ginsiring han anghel—nagburod hi Elizabeth! Samtang naghuhulat hi Elizabeth han iya panganak, nakada la hiya ha balay ha sulod hin lima ka bulan basi magpahirayo ha mga tawo.

Nagpakita utro hi Gabriel. Hini nga higayon, hin-o an iya ginkaistorya? An daraga nga hi Maria ha bungto han Nazaret. Ano an iya mensahe? Nagsiring hiya kan Maria: “Nalilipay gud ha imo an Dios. Kitaa! Magbuburod ka ngan manganganak hin lalaki, ngan Jesus an imo igngangaran ha iya. Magigin harangdon hiya ngan tatawagon nga Anak han Gihitaasi, . . . ngan magmamando hiya ha kadayonan sugad nga Hadi ha panimalay ni Jacob, ngan waray kataposan an iya Ginhadian.”

Makakasiguro kita nga inabat ni Gabriel nga daku gud nga pribilehiyo an pagpahayag hito nga mga mensahe. Ngan samtang padayon nga ginbabasa naton an mahitungod kanda Juan ngan Jesus, mas masasabtan naton kon kay ano nga importante gud ini nga mga mensahe tikang ha langit. 2 Timoteo 3:16; Lucas 1:5-33.

▪ Ano an duha nga importante nga mensahe tikang ha langit?

▪ Hin-o an nagpahayag han mga mensahe, ngan hin-o an ginsumatan hito?

▪ Kay ano nga makuri toohan an mga mensahe?