Kapitulo 120

Mga Pagnigar Didto ha Bungsaran

KATAPOS bayaan hi Jesus ha hardin han Getsemani ngan pumalagiw tungod ha kahadlok upod an iba nga mga apostol, inundang hira Pedro ngan Juan ha ira pagpalagiw. Posible nga naabtan nira hi Jesus han gindara hiya ha balay ni Anas. Han nagsugo hi Anas nga dad-on hi Jesus ha hitaas nga saserdote nga hi Caifas, apartado nga nagsinunod hira Pedro ngan Juan, kay nahahadlok nga mameligro an ira kinabuhi ngan nababaraka liwat mahitungod han mahitatabo ha ira Agaron.

Pag-abot ha daku nga balay ni Caifas, nakasulod hi Juan ha bungsaran, kay kilala hiya han hitaas nga saserdote. Pero hi Pedro nagtinindog la ha gawas han purtahan. Waray pag-iha, binalik hi Juan ngan nakiistorya ha uripon nga babaye nga bantay ha purtahan, salit ginpasulod hi Pedro.

Tungod kay mahagkot na, an mga surugoon ha balay ngan an mga opisyal han hitaas nga saserdote nagharing. Nagpapaso liwat hi Pedro hirani ha kalayo upod nira samtang naghuhulat ha resulta han pagbista kan Jesus. Tungod kay nalalamragan han kalayo, naklaro hiya han surugoon nga babaye nga nagpasulod ha iya. “Kaupod ka liwat ni Jesus nga taga-Galilea!” nagsiring hiya.

Nabaraka hi Pedro nga nakilal-an hiya, salit nagnigar hiya ha atubangan nira ngatanan: “Diri ako nakilala ha iya ngan diri ako maaram han imo ginyiyinakan.”

Katapos, ginawas hiya ngadto ha may ganghaan. Didto, pakakita ha iya han usa pa nga babaye, nagsiring ito ha mga naninindog: “Ini nga tawo kaupod ni Jesus nga Nazareno.” Nagnigar na liwat hi Pedro: “Diri ko kilala ito nga tawo!”

Nagpabilin hi Pedro ha bungsaran, ngan nangalimbasog nga diri hiya makilal-an. Bangin hini nga takna nakalasan hiya ha pagtugaok han manok ha kaagahon. Hito nga oras, nagpapadayon an pagbista kan Jesus didto ha usa nga bahin han balay ha igbaw han bungsaran. Sigurado nga nakikita ni Pedro ngan han iba nga naghuhulat ha ubos an pagsulod ngan paggawas han iba-iba nga testigo nga gintatawag basi magpamatuod.

Mga usa ka oras na an naglabay tikang nga nakilal-an hi Pedro sugad nga kaupod-upod ni Jesus. Yana, adton naninindog didto dinaop kan Pedro ngan nagsiring: “Sigurado nga kaupod ka nira kay an imo pagyakan pariho gud ha ira.” An usa ha ira paryente ni Malco nga an talinga ginpalong ni Pedro. “Diri ba nakita ko ikaw nga kaupod niya ha hardin?” siring niya.

“Diri ko kilala ito nga tawo!” nag-insister hi Pedro. Nagsumpa pa ngani hiya, karuyag sidngon, maghihikaraot hiya kon diri hiya nagsusumat han kamatuoran basi makombinse hira ngatanan nga diri totoo an ira akusasyon ha iya.

Katapos gud han iya ikatulo nga pagnigar, tinugaok an manok. Hito nga takna, hi Jesus nga ginawas na ngada ha balkon ha igbaw han bungsaran, liningi ngan ginkita hiya. Nahinumdoman dayon niya an ginsiring ni Jesus ha kwarto ha igbaw pipira ka oras pa la an naglabay: “Antes tumugaok an manok hin makaduha, igninigar mo ako hin tulo ka beses.” Nabido gud hi Pedro tungod han iya mabug-at nga sala, salit ginawas hiya ngan masurub-on nga nagtangis.

Kay ano nga nahitabo ito? Kay ano nga katapos masiguro ni Pedro nga marig-on hiya ha espirituwal, sunod-sunod nga nagsiring hiya hin tulo ka beses nga diri niya kilala an iya Agaron? Sigurado nga natigdaan hiya han mga panhitabo. Ginbaliko an kamatuoran ngan hi Jesus gin-akusaran nga maraot gud nga kriminal. An husto nagin sayop, an inosente nagin salaan. Salit tungod han mga pag-ipit, nagin diri timbang hi Pedro. An iya husto nga paghunahuna ha pagkamaunungon tigda nga nagin sayop; ngan tungod ha kahadlok ha tawo waray niya mahimo an husto ngan nakabido gud ito ha iya. Hinaot diri gud ito mahitabo ha aton! Mateo 26:57, 58, 69-75; Marcos 14:30, 53, 54, 66-72; Lucas 22:54-62; Juan 18:15-18, 25-27.

▪ Paonan-o nakasulod hira Pedro ngan Juan ha bungsaran han hitaas nga saserdote?

▪ Samtang nakadto hira Pedro ngan Juan ha bungsaran, ano an nahitatabo ha sulod han balay?

▪ Pira ka beses tinugaok an manok, ngan pira ka beses nga nagsiring hi Pedro nga diri niya kilala an Kristo?

▪ Ano an karuyag sidngon ni Pedro han nagsumpa hiya?

▪ Kay ano nga nagsiring hi Pedro nga diri niya kilala hi Jesus?