Kapitulo 80

Mga Toril han mga Karnero Ngan an Paraataman

KUMADTO hi Jesus ha Jerusalem para ha Piyesta han Pagdedikar, o Hanukkah, nga nagsasaurog han pagdedikar utro han templo kan Jehova. Han 168 B.C.E., mga 200 ka tuig na an naglabay, nasakop ni Antiochus IV Epiphanes an Jerusalem ngan ginpasiparahan an templo ngan altar hito. Pero paglabay hin tulo ka tuig, nabawi an Jerusalem ngan igindedikar utro an templo. Tikang hadto, nagkaada na tinuig nga pagsaurog han pagdedikar utro.

Ito nga Piyesta han Pagdedikar ginhihimo ha Chislev 25, an bulan ha kalendaryo han mga Judio nga katugbang han urhi nga bahin han Nobyembre ngan siyahan nga bahin han Disyembre ha aton kalendaryo. Salit sobra 100 ka adlaw na la, isasaurog na an espesyal nga Paskua han 33 C.E. Tungod kay mahagkot hito nga panahon, gintawag ito ni apostol Juan nga “kathagkot.”

Naghatag hi Jesus hin ilustrasyon diin gin-unabi niya an tulo nga toril han mga karnero ngan an iya papel sugad nga Maopay nga Paraataman. An siyahan nga toril may kalabotan ha ginkasabotan nga Mosaiko nga Balaud. Ito nga Balaud nagin sugad hin alad nga nagbubulag ha mga Judio ha nakakadaot nga mga buhat han mga tawo nga diri bahin hinin espesyal nga kasabotan ha Dios. Hi Jesus nagsaysay: “Ha pagkamatuod susumatan ko kamo, An nasulod ha toril han mga karnero nga diri naagi ha purtahan kondi nasaka ha iba nga maaagian, usa nga kawatan ngan tikasan. Pero an naagi ha purtahan amo an paraataman han mga karnero.”

May iba nga inabot ngan nag-angkon nga Mesias, o Kristo, pero diri hira an totoo nga paraataman nga gin-unabi ni Jesus: “Inaabrihan hiya han gwardya ha purtahan, ngan namamati ha iya tingog an mga karnero. Tinatawag niya ha ngaran an iya mga karnero ngan nasunod hira ha iya tipagawas. . . . Diri gud hira nasunod ha estranghero lugod napalagiw tikang ha iya, kay diri nira kilala an tingog han mga estranghero.”

An “gwardya ha purtahan” han siyahan nga toril amo hi Juan nga Parabaptis. Sugad nga gwardya, ‘gin-abrihan’ niya hi Jesus pinaagi ha pagpakilala ha iya ha simboliko nga mga karnero nga iya tutugwayan ngadto ha sabsaban. Ini nga mga karnero nga gintawag ni Jesus ha ira ngaran ngan gintugwayan tipagawas, ginpasulod ha lain nga toril paglabay han panahon. Nagsaysay hiya: “Ha pagkamatuod susumatan ko kamo, Ako an purtahan han mga karnero,” karuyag sidngon, an purtahan han bag-o nga toril. Han iya gintikangan an bag-o nga kasabotan ha mga disipulo ngan han iginbuhos ha ira tikang ha langit an baraan nga espiritu han Pentekostes, ginpasulod hira hini nga bag-o nga toril.

Nagpadayon hi Jesus ha pagsaysay han iya papel: “Ako an purtahan; bisan hin-o nga nasulod pinaagi ha akon matatalwas. Masulod ngan magawas hiya ngan makakaagi hin panabsaban. . . . Kinanhi ako basi an mga karnero magkaada hin kinabuhi nga waray kataposan. . . . Ako an maopay nga paraataman. Kilala ko an akon mga karnero ngan an akon mga karnero nakilala ha akon, sugad la nga an Amay nakilala ha akon ngan kilala ko an Amay; ngan iginhahatag ko an akon kalag para ha mga karnero.”

Diri pa la maiha, ginliaw ni Jesus an iya mga sumurunod. Nagsiring hiya: “Ayaw kahadlok, gutiay nga panon, kay an Ginhadian iginhatag ha iyo han iyo Amay.” Inin gutiay nga panon, nga 144,000 an kadamu, sinulod hito nga bag-o, o ikaduha nga toril. Pero nagsiring pa hi Jesus: “May-ada ako iba nga mga karnero nga waray dinhi hini nga toril; kinahanglan dad-on ko liwat hira, ngan mamamati hira han akon tingog. Hira ngatanan magigin usa nga panon nga may usa nga paraataman.”

Tungod kay an “iba nga mga karnero . . . waray dinhi hini nga toril,” sigurado nga aadto hira ha lain nga toril, ha ikatulo. An ikaduha ngan ikatulo nga toril han mga karnero, magkaiba an hingangadtoan. An “gutiay nga panon” magmamando upod han Kristo ha langit, ngan an “iba nga mga karnero” mabubuhi ha Paraiso nga tuna. Pero bisan kon duha ka toril hira, diri hira nag-aabughoay o naabat nga iginlain hira, kay sugad han siring ni Jesus, hira “magigin usa nga panon nga may usa nga paraataman.”

An Maopay nga Paraataman, hi Jesu-Kristo, kinaburut-on nga naghatag han iya kinabuhi para ha duha ka toril han mga karnero. “Kinaburut-on nga iginhahatag ko ito,” siring niya. “May katungod ako paghatag ngan pagkarawat utro hito. Nakarawat ko an sugo mahitungod hini tikang ha akon Amay.” Han ginsiring ito ni Jesus, nagkabahin-bahin an mga Judio.

Damu an nagsiring: “May demonyo hiya ngan nalulurong na. Kay ano nga namamati kamo ha iya?” Pero an iba nagsiring: “Diri sugad hito magyakan an tawo nga may demonyo.” Katapos, gin-unabi nira an nahitabo mga duha ka bulan pa la an naglabay han gintambal niya an lalaki nga natawo nga buta. Nagsiring hira: “Diri mapupukrat han demonyo an mga mata han mga tawo nga buta, diri ba?” Juan 10:1-22; 9:1-7; Lucas 12:32; Pahayag 14:1, 3; 21:3, 4; Salmo 37:29.

▪ Ano an Piyesta han Pagdedikar, ngan san-o ito ginsasaurog?

▪ Ano an siyahan nga toril han mga karnero, ngan hin-o an gwardya ha purtahan hito?

▪ Paonan-o gin-abrihan han gwardya an purtahan para ha Paraataman, ngan diin ginpasulod an mga karnero katapos hito?

▪ Hin-o an nagkukompwesto han duha nga toril han Maopay nga Paraataman, ngan nagin pira ka panon hira?