Kapitulo 97

Mga Trabahador ha Urubasan

NAGSIRING pa la hi Jesus nga “damu nga nahiuuna an mahiuurhi, ngan an nahiuurhi mahiuuna.” Mahitungod hini, naghatag hiya yana hin ilustrasyon: “An Ginhadian han langit pariho hin tag-iya han urubasan nga ginawas hin temprano ha aga basi mamiling hin mga trabahador ha iya urubasan.”

Nagsiring pa hiya: “Han nagkauyon [an tag-iya] ngan an mga trabahador nga suholan hira hin usa ka denaryo an adlaw, ginpakadto niya hira ha urubasan. Paggawas utro niya han mga alas-9 ha aga, nakita niya an iba nga nagtitinindog ha merkado kay waray trabaho, ngan ginsidngan hira, ‘Pakadto liwat kamo ha urubasan, ngan susuholan ko kamo han angay ha iyo.’ Salit kinadto hira. Paggawas utro han tag-iya han mga alas-12 ha udto ngan han mga alas-3 ha kulop, amo gihapon an iya ginbuhat. Ha urhi, paggawas niya han mga alas-5 ha kulop nakita niya an iba nga nagtitinindog, ngan nagsiring hiya ha ira, ‘Kay ano nga nagtitinindog kamo dinhi ha bug-os nga adlaw nga waray gintatrabaho?’ Binaton hira, ‘Tungod kay waray nagpapatrabaho ha amon.’ Iya ginsidngan hira, ‘Pakadto liwat kamo ha urubasan.’”

An tag-iya han urubasan amo hi Jehova nga Dios, ngan an urubasan amo an nasud han Israel. An mga trabahador ha urubasan amo an mga sakop han Balaud nga kasabotan; hira an mga Judio ha panahon han mga apostol. Ha mga trabahador la nga magtatrabaho ha bug-os nga adlaw nakigsabot an tag-iya kon pira an suhol. Usa ka denaryo an suhol para ha usa ka adlaw nga pagtrabaho. Salit an mga ginpatrabaho tikang han alas-9, alas-12, alas-3, ngan alas-5 nagtrabaho hin 9, 6, 3, ngan 1 ka oras.

An mga nagtrabaho hin 12 ka oras, o ha bug-os nga adlaw, nagrirepresentar ha Judio nga mga lider nga maiha na nga okupado ha mga buruhaton ha relihiyon. Diri hira pariho ha mga disipulo ni Jesus nga ha kadak-an nga bahin han ira kinabuhi nagin okupado ha pangisda o ha iba pa nga panginabuhi. Han katrakdag han 29 C.E. dida pa la ginsugo hi Jesu-Kristo han “tag-iya” nga tirukon hira basi magin iya mga disipulo. Salit hira an “nahiurhi,” o an nagtrabaho tikang han alas-5.

An simboliko nga adlaw ha pagtrabaho natapos han namatay hi Jesus, ngan panahon na basi suholan an mga trabahador. Iginsaysay an diri komon nga patakaran nga suholan anay an nahiurhi: “Han gab-i na, ginsidngan han tag-iya han urubasan an iya tinaporan, ‘Tawaga an mga trabahador ngan ihatag an ira suhol, tikang ha nahiurhi ngadto ha nahiuna.’ Pag-abot han mga trabahador nga nagtikang han mga alas-5 ha kulop, an tagsa ha ira nakakarawat hin usa ka denaryo. Salit pag-abot han mga nahiuna, naghunahuna hira nga makarawat hira hin sobra pa hito, pero usa ka denaryo liwat an ira nakarawat. Pakakarawat nira hito nagreklamo hira ha tag-iya han urubasan, ‘Ini nga mga nahiurhi usa la ka oras nga nagtrabaho pero an suhol ha ira imo iginpariho ha amon nga nagtrabaho ha bug-os nga adlaw ngan nag-antos hin sobra nga kapaso!’ Sugad nga baton ha usa ha ira hiya nagsiring, ‘Sangkay, waray ako pakasala ha imo. Diri ba nagkauyon kita ha suhol nga usa ka denaryo? Karawata an para ha imo ngan lakat. Karuyag ko hatagan ini nga nahiurhi hin pariho han imo nakarawat. Diri ba katungod ko nga buhaton an anoman nga karuyag ko ha akon mga panag-iya? O naaawa ka ba tungod kay maopay ako?’” Sugad nga konklusyon, gin-utro ni Jesus an iya ginsiring: “Hini nga paagi an mga nahiuurhi mahiuuna, ngan an mga nahiuuna, mahiuurhi.”

An pagkarawat han denaryo nahitabo, diri han kamatay ni Jesus, kondi han Pentekostes 33 C.E., han an “tinaporan” nga amo an Kristo nagbuhos han baraan nga espiritu ha iya mga disipulo. Ini nga mga disipulo ni Jesus pariho han mga trabahador nga “nahiurhi,” o an nagtrabaho han alas-5 ha kulop. An denaryo diri nagrirepresentar ha regalo nga baraan nga espiritu, lugod magagamit ito han mga disipulo dinhi ha tuna. Nangangahulogan ito han ira panginabuhi, han ira kinabuhi nga waray kataposan. Ito an pribilehiyo nga magin espirituwal nga Israelita nga gindihogan basi magsangyaw han Ginhadian han Dios.

Katapos, nakita han una nga mga ginpatrabaho nga ginsuholan na an mga disipulo ni Jesus, ngan naobserbaran nira nga gin-gagamit han mga disipulo an simboliko nga denaryo. Pero karuyag han mga nahiuna nga makakarawat hira hin dugang pa labot han baraan nga espiritu ngan mga pribilehiyo ha Ginhadian. An ira pagngurutob ngan pagreklamo amo an ira pagtimaraot ha mga disipulo han Kristo, an “nahiurhi” nga mga trabahador ha urubasan.

Han siyahan nga siglo la ba natuman an ilustrasyon ni Jesus? Diri. An mga klero han Kakristianohan hinin ika-21 ka siglo nag-aangkon nga hira an “nahiuna” nga ginpatrabaho ha simboliko nga urubasan han Dios, kay hira an may mga katungdanan ngan mga responsabilidad. Naghunahuna hira nga an mga magwarali nga bahin han Kristiano nga Kongregasyon han mga Saksi ni Jehova amo an ‘urhi’ nga makarawat hin importante nga toka ha pag-alagad ha Dios. Pero ha pagkamatuod, ini hira nga gintatamay han mga klero amo an nakakarawat han denaryo—an pribilehiyo ha pag-alagad sugad nga dinihogan nga mga embahador han Ginhadian han Dios ha langit. Mateo 19:30–20:16.

▪ Ano an ginrirepresentaran han urubasan? Hin-o an ginrirepresentaran han tag-iya han urubasan ngan han mga nagtrabaho hin 12 ka oras ngan hin 1 ka oras?

▪ Kakan-o natapos an simboliko nga adlaw ha pagtrabaho, ngan kakan-o iginhatag an suhol?

▪ Ano an ginrirepresentaran han suhol nga denaryo?