Kapitulo 89

Misyon Tungod ha Kalooy Ngadto ha Judea

HAN naglabay nga pipira ka semana, durante han Piyesta han Pagdedikar ha Jerusalem, gin-ikaparatay han mga Judio hi Jesus. Salit nagpakadto hiya ha norte, posible nga ha lugar hirani ha Dagat han Galilea.

Waray pag-iha, nagbiyahe na liwat hiya tipakadto ha sur, ha Jerusalem. Ngan nagsangyaw hiya ha inaagian nga mga baryo han Perea, usa nga distrito ha este han Salog Jordan. Katapos niya igsaysay an ilustrasyon mahitungod ha riko ngan kan Lasaro, nagpadayon hiya pagtutdo ha mga disipulo pariho han iya igintutdo han nakadto hira ha Galilea.

Pananglitan, nagsiring hiya nga mas maopay pa nga an usa nga tawo “bitayan . . . hin gilingan nga bato ha liog ngan ilabog hiya ha dagat” kay ha makapakdol hiya ha usa hini nga “mga ubos” han Dios. Ginpabug-atan liwat niya nga kinahanglan magpasaylo kita. Nagsiring hiya: “Bisan kon makasala [an usa nga bugto] hin pito ka beses kada adlaw ngan magbalik-balik hiya ha imo hin makapito basi sumiring, ‘Nagbabasol ako,’ kinahanglan pasayloon mo hiya.”

Han an mga disipulo naghangyo, “Tagi kami hin dugang nga pagtoo,” nagsiring hi Jesus: “Kon may pagtoo kamo nga sugad kaguti han liso han mustasa, masiring kamo hini nga kahoy nga mulberi, ‘Magabot ka ngan mahitanom ha dagat!’ ngan masugot ito ha iyo.” Salit bisan an gutiay nga pagtoo daku an nahihimo.

Sunod, nagsaysay hi Jesus hin totoo nga hitabo nga nagpapakita han husto nga disposisyon han usa nga surugoon han Dios nga makagarahum ha ngatanan. Nagsiring hiya: “Hin-o dinhi ha iyo an may uripon nga nag-aarado o nag-aataman han mga hayop, ngan masiring ha iya pag-uli niya tikang ha uma, ‘Pakadi dayon ha lamesa ngan lingkod basi ka kumaon’? Diri ba masiring lugod hiya ha uripon, ‘Iandam an akon panihapon, ngan pag-epron, serbihi ako tubtob nga matapos ako kumaon ngan uminom; katapos, mahimo ka na kumaon ngan uminom’? Diri hiya magpapasalamat ha uripon kay ginbuhat la niya an sugo ha iya, diri ba? Sugad man, kon nabuhat na niyo an ngatanan nga sugo ha iyo, siring kamo, ‘Waray kami pulos nga mga uripon. Ginbuhat la namon an amon obligasyon.’” Salit diri gud angay hunahunaon han mga surugoon han Dios nga may utang nga kaburut-on ha ira an Dios tungod han ira pag-alagad ha iya. Lugod, sadang hinumdoman nira pirme an ira pribilehiyo ha pagsingba ha iya sugad nga matataporan nga mga membro han iya panimalay.

Posible nga waray pag-iha katapos maghatag hi Jesus hini nga ilustrasyon, may inabot nga mensahero. Ginsugo hiya han kabugtoan ni Lasaro nga hira Maria ngan Marta nga taga-Betania ha Judea. Nagsumat an mensahero: “Ginoo, may sakit an imo pinalangga nga sangkay.”

Nagsiring hi Jesus: “Ito nga sakit diri magriresulta hin kamatayon kondi hin himaya han Dios, basi himayaon an Anak han Dios pinaagi hito.” Paglabay hin duha ka adlaw didto, nagsiring hiya ha mga disipulo: “Balik kita ha Judea.” Pero ira ginpahinumdoman hiya: “Rabbi, diri pa la maiha karuyag han mga taga-Judea nga batuhon ka. Kay ano nga mabalik ka ngadto?”

Binaton hi Jesus: “Diri ba 12 ka oras an kaadlawon? Kon naglalakat ha kaadlawon an bisan hin-o, diri hiya nahipapakdol kay nakikita niya an kalamrag hini nga kalibotan. Pero kon naglalakat ha gab-i an bisan hin-o, nahipapakdol hiya kay waray hiya kalamrag.”

Posible nga karuyag sidngon ni Jesus nga an ‘oras han kaadlawon,’ o an panahon nga iginhatag han Dios para ha iya ministeryo dinhi ha tuna, diri pa tapos ngan tubtob nga diri pa ito natatapos, waray bisan hin-o nga makakadaot ha iya. Kinahanglan salingabuton gud niya an “kaadlawon” nga nabibilin para ha iya, kay katapos hito maabot an “gab-i” kon patayon na hiya han mga kaaway.

Nagsiring pa hi Jesus: “Nakaturog an aton sangkay nga hi Lasaro, pero makadto ako basi pukawon hiya.”

Posible nga naghuhunahuna an mga disipulo nga hi Lasaro nakaturog la basi pumahuway ngan nagpapasabot ito nga mag-oopay hiya, salit nagsiring hira: “Ginoo, kon nakaturog hiya, mag-oopay hiya.”

Katapos, prangka nga nagsiring hi Jesus: “Patay na hi Lasaro, ngan para ha iyo kaopayan nga waray ako didto, basi tumoo kamo. Kadto kita ha iya.”

Nahunahuna ni Tomas nga mahimo patayon hi Jesus ha Judea, pero karuyag niya nga suportahan hi Jesus salit gin-aghat niya an mga igkasi-disipulo: “Kadto liwat kita, bisan kita mamatay upod niya.” Salit bisan kon peligroso, gin-updan nira hi Jesus hito nga misyon tungod ha kalooy ngadto ha Judea. Lucas 13:22; 17:1-10; Juan 10:22, 31, 40-42; 11:1-16.

▪ Diin nagsangyaw hi Jesus han tipakadto hiya ha Jerusalem?

▪ Ano an igintutdo utro ni Jesus? Ano nga totoo nga hitabo an iya igin-istorya ngan ano nga punto an ginpapabug-atan hito?

▪ Ano an iginsumat kan Jesus, ngan ano an iya iginpapasabot han “kaadlawon” ngan “gab-i”?

▪ Ano an karuyag sidngon ni Tomas han magsiring hiya, ‘Kadto kita, bisan kita mamatay upod niya’?