Kapitulo 104

Nabatian an Tingog han Dios ha Ikatulo nga Higayon

SAMTANG nakadto hi Jesus ha templo, nagsasakit gud hiya tungod han kamatayon nga hirani na niya atubangon. Nababaraka hiya labi na han magigin epekto hito ha reputasyon han iya Amay, salit nag-ampo hiya: “Amay, himayaa an imo ngaran.”

Katapos hito, may daku nga tingog nga nabatian tikang ha langit, nga nasiring: “Ginhimaya ko na ito ngan paghihimayaon ko utro.”

Nahipausa an mga tawo nga naninindog didto. “May anghel nga nagyakan ha iya,” siring han iba. May nagsiring liwat nga dinalugdog. Pero ha pagkamatuod, hi Jehova nga Dios an nagyakan! Diri ini an siyahan nga higayon nga nabatian an tingog han Dios may kalabotan kan Jesus.

Han ginbawtismohan hi Jesus, tulo ngan tunga ka tuig na an naglabay, nabatian ni Juan nga Parabaptis nga nagsiring an Dios mahitungod kan Jesus: “Ini an akon Anak nga hinigugma, nga akon nalilipayan.” Han naglabay nga Paskua, han nabag-o an hitsura ni Jesus ha atubangan nira Santiago, Juan, ngan Pedro, nagsiring liwat an Dios ha ira: “Ini an akon Anak nga hinigugma, nga akon nalilipayan. Pamati kamo ha iya.” Ngan yana ha Nisan 10, ha ikatulo nga higayon, nabatian utro an tingog han Dios, upat ka adlaw antes mamatay hi Jesus. Pero hini nga higayon nagyakan hi Jehova basi mabatian han damu gud nga tawo!

Nagsaysay hi Jesus: “Hinbatian ini nga tingog, diri tungod ha akon, kondi tungod ha iyo.” Nagpapamatuod ito nga hiya amo gud an Anak han Dios, an iginsaad nga Mesias. “Ginhuhukman yana ini nga kalibotan,” nagsiring pa hiya, “ngan paiiwason an magmarando hini nga kalibotan.” An iya pagkamatinumanon ha bug-os nga kinabuhi nagpapamatuod nga hi Satanas nga Yawa, an magmarando han kalibotan, angay gud ‘paiwason,’ o patayon.

Han ginhisgotan ni Jesus an mga resulta han iya tiarabot nga kamatayon, nagsiring hiya: “Pero kon bitayon na ako, papahiranion ko ha akon an ngatanan nga klase hin tawo.” An iya kamatayon diri gud kapirdihan, kay pinaagi hito igpapahirani niya ha iya an iba basi magkaada hin kinabuhi nga waray kataposan.

Pero nagreklamo an mga tawo: “Hinbatian namon ha Balaud nga an Kristo magpapadayon ha waray kataposan. Kay ano nga nasiring ka nga an Anak han tawo kinahanglan bitayon? Hin-o ini nga Anak han tawo?”

Bisan pa han ngatanan nga ebidensya, upod na an pakabati han tingog mismo han Dios, waray tumoo an kadam-an nga hi Jesus an totoo nga Anak han tawo, an iginsaad nga Mesias. Ngan sugad han iya ginbuhat ha Piyesta han mga Tabernakulo unom ka bulan na an naglabay, nagsiring utro hiya nga hiya amo “an kalamrag” ngan gin-aghat an mga namamati: “Samtang aada ha iyo an kalamrag, magpakita kamo hin pagtoo ha kalamrag basi magin mga anak kamo han kalamrag.” Katapos, binaya hiya ngan tumago, kay posible nga namimeligro an iya kinabuhi.

An kawaray pagtoo han mga Judio kan Jesus katumanan han ginsiring ni Isaias nga ‘ginbuta an mga mata han mga tawo ngan ginpatig-a an ira kasingkasing, basi diri hira makabalik ngan matambal.’ Ha bisyon ni Isaias nakita niya an kahimayaan ni Jehova ha langit, kaupod an dungganon nga hi Jesus antes nagin tawo. Pero sugad nga katumanan han iginsurat ni Isaias, ginbalewaray gud han mga Judio an ebidensya nga Hiya an iginsaad nga Paratalwas ha ira.

Pero damu an tumoo kan Jesus, bisan an mga lider (posible nga mga membro han korte suprema han mga Judio, an Sanhedrin). Duha ha ira amo hi Nicodemo ngan hi Jose han Arimatea. Pero hito nga panahon, waray nira ipahayag an ira pagtoo, kay nahahadlok hira nga matangtang ha ira katungdanan ha sinagoga. Daku gud an nawara ha ira!

Nagpadayon hi Jesus: “An natoo ha akon, natoo diri la ha akon kondi ha nagsugo liwat ha akon, ngan an nakakakita ha akon, nakakakita liwat ha nagsugo ha akon. . . . Pero diri ko ginhuhukman an bisan hin-o nga namamati han akon ginsisiring kondi diri nagbubuhat hito, kay kinanhi ako diri basi hukman an kalibotan kondi basi talwason an kalibotan. . . . An pulong nga akon ginyakan amo an maghuhukom ha iya ha kataposan nga adlaw.”

Tungod han gugma ni Jehova ha katawohan ginpakanhi niya hi Jesus basi matalwas an tumoo ha iya. An katalwasan han katawohan nakadepende ha ira pagsugot ha mga iginsugo han Dios nga igtutdo ni Jesus. Mahitatabo an paghukom ha “kataposan nga adlaw,” durante han Usa ka Yukot ka Tuig nga Pagmando han Kristo.

Sugad nga konklusyon, nagsiring hi Jesus: “An akon ginyayakan diri akon kalugaringon nga mga ideya, kondi an Amay nga nagpakanhi ha akon an naghatag hin sugo kon ano an akon igyayakan ngan igtututdo. Maaram liwat ako nga an iya sugo nangangahulogan hin kinabuhi nga waray kataposan. Salit kon ano an ginsiring ha akon han Amay, amo man an akon ginyayakan.” Juan 12:28-50; 19:38, 39; Mateo 3:17; 17:5; Isaias 6:1, 8-10.

▪ Ano an tulo nga higayon nga nabatian an tingog han Dios may kalabotan kan Jesus?

▪ Paonan-o nakita ni propeta Isaias an mahimayaon nga hi Jesus?

▪ Hin-o an mga lider nga tinoo kan Jesus, pero kay ano nga waray nira dayag nga ipahayag an ira pagtoo ha iya?

▪ Ano an “kataposan nga adlaw”? Ano an magigin basihan ha paghukom ha mga tawo?