Kapitulo 98

Nagdiskusyon an mga Disipulo han Hirani na Mamatay hi Jesus

HI Jesus ngan an mga disipulo hirani na ha Salog Jordan, diin hira matabok tikang ha distrito han Perea pakadto ha Judea. Damu an ira nakaupod ha pagbiyahe nga matambong ha Paskua han 33 C.E., nga usa o sobra hin semana na la isasaurog na.

Nahiuuna hi Jesus ha mga disipulo ha pagbaktas, ngan nahipapausa gud hira ha iya determinasyon. Hinumdumi nga han naglabay nga pipira ka semana han namatay hi Lasaro ngan hi Jesus tikadto na ha Judea tikang ha Perea, gin-aghat ni Tomas an iba: “Kadto liwat kita, bisan kita mamatay upod niya.” Hinumdumi liwat nga katapos banhawon ni Jesus hi Lasaro, nagplano an Sanhedrin nga patayon hi Jesus. Salit sigurado nga nahahadlok an mga disipulo yana nga tisulod na liwat hira ha Judea.

Basi iandam an mga disipulo ha mahitatabo, ginpabulag ni Jesus ha mga tawo an 12 nga apostol ngan ginsidngan: “Tikadto kita ha Jerusalem, ngan an Anak han tawo itutubyan ha punoan nga mga saserdote ngan ha mga eskriba. Huhukman nira hiya hin kamatayon ngan itutubyan ha mga tawo han mga nasud, ngan hihimoon hiya nga pataraw-an, tutuprahan, lalatiguhon, ngan papatayon, pero paglabay hin tulo ka adlaw babanhawon hiya.”

Tikang han naglabay pa la nga mga bulan, ikatulo ka beses na ini nga pagsumat ni Jesus ha mga disipulo mahitungod han iya kamatayon ngan kabanhaw. Ngan bisan kon namamati hira ha iya, diri hira nakakasabot. Posible nga tungod kay natoo hira nga ipapahiuli dinhi ha tuna an ginhadian han Israel, ngan ira ginpapamulat an pagkaada hin himaya ngan kadungganan upod han Kristo ha ginhadian dinhi ha tuna.

Usa han mga nagbibiyahe tipakadto ha Paskua amo hi Salome, an nanay nira apostol Santiago ngan Juan. Ito nga magbugto gintawag ni Jesus nga “mga Anak han Dalugdog,” kay madagmit hira masina. Medyo maiha na nga nag-iinambisyon hira nga magin prominente ha Ginhadian han Kristo, ngan ira ito iginsumat ha ira nanay. Dinaop yana kan Jesus an ira nanay para ha ira, yinukbo ha iya atubangan, ngan nangaro hin pabor.

“Ano an imo karuyag?” nagpakiana hi Jesus.

Binaton hiya: “Naghahangyo ako nga an akon duha nga anak makalingkod unta kaupod mo ha imo Ginhadian, an usa ha imo too ngan an usa ha imo wala.”

Nasantop ni Jesus kon hin-o an naghahangyo hito, salit iya ginsidngan hira Santiago ngan Juan: “Diri kamo maaram han iyo gin-aaro. Makakainom ba kamo ha kopa nga akon iinuman?”

“Makakainom kami,” binaton hira. Bisan kon ginsumatan pa la hira ni Jesus nga maatubang hiya hin duro nga pagtimaraot ngan hin kamatayon, diri nira nasasabtan nga ini an karuyag niya ipasabot han “kopa” nga iya iinuman.

Kondi ginsumatan hira ni Jesus: “Mainom gud kamo ha akon kopa, pero ini nga paglingkod ha akon too ngan wala diri ako an nagbubuot, kay para ito ha mga gin-andaman han akon Amay.”

Han nahibaro an napulo nga apostol han ginhangyo nira Santiago ngan Juan, nasina hira. Posible nga hira Santiago ngan Juan an nanguna ha naglabay pa la nga diskusyon han mga apostol kon hin-o ha ira an gilalabawi. Ini nga ira paghangyo nagpapakita nga waray nira sunda an sagdon ni Jesus mahitungod hito. Makasurubo nga makusog pa gihapon an ira hingyap nga magin prominente.

Salit basi tuhayon an nahitabo pa la nga diskusyon ngan an nagin problema tungod hito, gintawag ni Jesus an 12 nga apostol. Mahigugmaon nga ginsagdonan hira: “Maaram kamo nga an mga magmarando han mga nasud nagpapakaagaron ha mga tawo ngan an mga prominente nagamit hin awtoridad ha ira. Diri kamo magin sugad hito, pero an bisan hin-o nga karuyag magkaada daku nga awtoridad ha iyo kinahanglan magin surugoon niyo, ngan an bisan hin-o nga karuyag magin una ha iyo kinahanglan magin uripon niyo.”

Nagpakita hi Jesus hin susbaranan nga sadang nira sundon. Nagsaysay hiya: “Sugad la nga an Anak han tawo kinanhi, diri basi pagserbihan kondi basi magserbi ngan maghalad han iya kalag sugad nga lukat para ha damu nga tawo.” Diri la kay nagsiserbi hiya ha iba kondi bubuhaton niya ito tubtob nga mamatay hiya para ha katawohan! An mga disipulo kinahanglan may disposisyon nga pariho han Kristo nga naruruyag gud ha pagserbi imbes nga serbihan, ngan magin ubos imbes nga magkaada prominente nga katungdanan. Mateo 20:17-28; Marcos 3:17; 9:33-37; 10:32-45; Lucas 18:31-34; Juan 11:16.

▪ Kay ano nga nahahadlok an mga disipulo?

▪ Paonan-o igin-andam ni Jesus an mga disipulo ha mahitatabo?

▪ Ano nga pabor an ginhangyo kan Jesus, ngan ano an reaksyon han iba pa nga apostol?

▪ Paonan-o gintuhay ni Jesus an problema han mga apostol?