Kapitulo 115

Nagkaada hin Diskusyon

TEMPRANO hito nga gab-i, nagtutdo hi Jesus hin maopay nga leksyon ha pagpaubos pinaagi ha paghimsaw ha mga apostol. Katapos, gintikangan niya an Memoryal han iya tiarabot nga kamatayon. Pero bisan pa hito, nagkaada hin diri ginlalaoman nga insidente. Gindiskusyonan gud han mga apostol kon hin-o ha ira an may gidadakui nga awtoridad! Posible nga sumpay pa ito han ira ginlalantugian.

Hinumdumi nga katapos mabag-o an hitsura ni Jesus ha bukid, nagdiskusyon an mga apostol kon hin-o ha ira an may gidadakui nga awtoridad. Dugang pa, tungod han paghangyo nira Santiago ngan Juan hin prominente nga pwesto ha Ginhadian, dinugang an pagpalabaw-labaw han mga apostol. Yana, ha ultimo nga gab-i ni Jesus upod nira, sigurado nga nasubo gud hiya nga nagdidiskusyon na liwat hira! Ano an iya ginbuhat?

Imbes nga isgan an mga apostol, pasensyoso nga nangatadongan na liwat hiya ha ira: “An mga hadi han mga nasud nagpapakaagaron ha katawohan, ngan an mga may awtoridad ha ira gintatawag nga Pilantropo. Pero diri kamo magin sugad hito. . . . Kay hin-o an mas daku an awtoridad, an nalingkod ha lamesa o an nagsiserbi? Diri ba an nalingkod ha lamesa?” Katapos, iginpahinumdom niya ha ira an iya susbaranan: “Kondi ako, pariho han usa nga nagsiserbi ha iyo.”

Bisan pa han mga kaluyahan han mga apostol, nagpabilin hira nga kaupod ni Jesus ha iya kasakitan. Salit nagsiring hiya: “Naghihimo ako hin kasabotan ha iyo, sugad la nga an akon Amay naghimo hin kasabotan ha akon, para ha usa nga Ginhadian.” Pribado ini nga kasabotan butnga ni Jesus ngan han iya maunungon nga mga sumurunod basi makaupod niya hira ha iya pagmando sugad nga hadi. Limitado la nga kadamu, 144,000 la, an kaupod hito nga kasabotan para ha usa nga Ginhadian.

Bisan kon gintagan an mga apostol hin makaruruyag nga paglaom nga makaupod han Kristo ha pagmando ha Ginhadian, maluya hira yana ha espirituwal. Nagsiring hi Jesus: “Babayaan ako niyo ngatanan tungod han mahitatabo ha akon yana nga gab-i.” Ginsumatan niya hi Pedro nga nangamuyo hiya para ha iya, ngan gin-aghat: “Katapos mo magbasol, parig-ona an imo kabugtoan.”

“Hinigugma nga mga anak,” siring ni Jesus, “halipot na la nga panahon nga makakaupod ako niyo. Bibilngon niyo ako, pero igsisiring ko liwat ha iyo yana an akon ginsiring ha mga Judio, ‘Diri kamo makakakadto ha akon kakadtoan.’ Naghahatag ako ha iyo hin bag-o nga sugo, nga maghigugmaay kamo; sugad han akon paghigugma ha iyo, maghigugmaay liwat kamo. Tungod hini an ngatanan mahibabaro nga mga disipulo ko kamo, kon naghihigugmaay kamo.”

“Ginoo, makain ka?” nagpakiana hi Pedro.

Binaton hi Jesus: “Diri ka makakakadto yana ha akon kakadtoan, pero masunod ka pagkatapos.”

“Ginoo, kay ano nga diri ako makakaupod ha imo yana?” nagpakiana hi Pedro. “Ihahatag ko an akon kalag para ha imo.”

“Ihahatag mo ba an imo kalag para ha akon?” nagpakiana hi Jesus. “Ha pagkamatuod susumatan ko ikaw, yana nga adlaw, oo yana mismo nga gab-i, antes tumugaok an manok hin makaduha, igninigar mo ako hin tulo ka beses.”

“Bisan pa ako mamatay kaupod mo,” siring ni Pedro, “diri ko gud ikaw igninigar.” Ito liwat an ginsiring han iba nga disipulo. Pero naghambog hi Pedro: “Bisan bayaan ka nira ngatanan tungod han mahitatabo ha imo, diri ko gud ikaw babayaan!”

Sugad nga pag-unabi ni Jesus han ginsugo niya an mga apostol ha pagsangyaw ha bug-os nga Galilea nga waray dara nga supot han kwarta ngan surudlan han pagkaon, nagpakiana hiya: “Waray kamo makulangi hin bisan ano, diri ba?”

Binaton hira: “Waray!”

“Pero yana an may supot han kwarta magdara hito, sugad man hin surudlan han pagkaon,” siring niya, “ngan an waray espada magbaligya han iya pantungbaw nga panapton ngan pumalit hin usa. Kay susumatan ko kamo nga kinahanglan matuman ha akon ini nga iginsurat, ‘Ngan gintagad hiya nga kaupod han mga matinalapason.’ Kay an ginsurat mahitungod ha akon natutuman na.”

Ginhihisgotan ni Jesus an pagraysanga ha iya upod han mga kawatan, o mga matinalapason. Iginpapasabot liwat niya nga ha tidaraon maatubang hin duro nga pagtimaraot an iya mga sumurunod. “Ginoo, kitaa! may duha nga espada didi,” siring nira.

Binaton hiya: “Puydi na ito.” Masasabtan naton ha sunod nga magkakaada hin higayon hi Jesus ha pagtutdo ha ira hin usa pa nga importante nga leksyon tungod han pagdara nira hin mga espada. Mateo 26:31-35; Marcos 14:27-31; Lucas 22:24-38; Juan 13:31-38; Pahayag 14:1-3.

▪ Kay ano nga diri ginlalaoman an pagdiskusyon han mga apostol?

▪ Ano an ginbuhat ni Jesus hito nga pagdiskusyon?

▪ Ano an kapulsanan han kasabotan ni Jesus ngan han iya mga disipulo?

▪ Ano nga bag-o nga sugo an iginhatag ni Jesus, ngan mationan-o kaimportante ito?

▪ Ano nga sobra nga kompyansa ha kalugaringon an iginpakita ni Pedro, ngan ano an ginsiring ni Jesus?

▪ Kay ano nga an sugo ni Jesus mahitungod han pagdara hin supot han kwarta ngan surudlan han pagkaon iba kay ha nahiuna?