Kapitulo 38

Nagluya ba an Pagtoo ni Juan?

HI Juan nga Parabaptis, nga haros usa ka tuig na nga priso, nahibaro mahitungod han nabanhaw nga anak han balo ha Nain. Pero karuyag niya hibaroan kan Jesus mismo kon ano an kahulogan hito, salit nagsugo hiya hin duha nga iya disipulo basi magpakiana: “Ikaw na ba an Usa nga Makanhi nga amon ginpipinamulat, o may iba pa nga maabot?”

Baga hin diri unta ito angay igpakiana, labi na kay nakita mismo ni Juan an espiritu han Dios nga nalusad kan Jesus ngan nabatian niya an tingog han Dios han ginbawtismohan hi Jesus haros duha ka tuig na an naglabay. Tungod han pakiana ni Juan bangin naghunahuna an iba nga nagluya an iya pagtoo. Pero diri ito tinuod. Kon nagruruhaduha hi Juan, diri unta hiya dadayawon ni Jesus hini nga higayon. Kon sugad, kay ano nga iginpakiana niya ito?

Bangin karuyag la ni Juan nga kompirmahon kan Jesus kon Hiya an Mesias. Makaparig-on gud ito kay nag-aantos hiya ha prisohan. Pero posible nga may iba pa hiya nga karuyag hibaroan. Bangin karuyag niya mahibaro kon may iba pa nga maabot, sugad hin kasaliwan, nga magtutuman han ngatanan nga igintagna nga bubuhaton han Mesias.

Sumala ha mga tagna ha Biblia nga hinbabaroan ni Juan, an Pinili han Dios magigin hadi, ngan paratalwas. Pero priso la gihapon hi Juan, bisan damu ka bulan na tikang nga ginbawtismohan hi Jesus. Salit sugad hin napakiana hi Juan kan Jesus: ‘Ikaw gud ba an mag-iestablisar han Ginhadian han Dios nga magpapakita hin gahum, o may iba pa nga kasaliwan, nga sadang namon hulaton nga magtutuman han ngatanan nga urusahon nga tagna may kalabotan ha mahimayaon nga Mesias?’

Imbes nga magsiring hi Jesus ha mga disipulo ni Juan, ‘Syempre ako an igintagna nga maabot!’ naghimo lugod hiya hin milagro hito mismo nga oras pinaagi ha pagtambal han ngatanan nga klase hin sakit han damu nga tawo. Katapos ginsidngan niya an mga disipulo: “Balik kamo kan Juan ngan isumat ha iya an iyo hinkit-an ngan hinbatian: An mga buta nakakakita na, an mga piay nakakalakat na, an mga may liprosi nagkatatambal na, an mga bungol nakakabati na, an mga patay nagkababanhaw, ngan iginpapahayag an maopay nga sumat ha mga pobre.”

Ha iba nga pulong, an pakiana ni Juan mahimo magpasabot nga naglalaom hiya hin labaw pa han ginbubuhat ni Jesus ngan mapagawas hiya ha prisohan. Pero ginsumatan ni Jesus hi Juan nga diri hiya maglaom hin labaw pa han mga milagro nga iya ginhihimo.

Pagbaya han mga disipulo ni Juan, ginsidngan ni Jesus an mga tawo nga hi Juan an “mensahero” ni Jehova nga igintagna ha Malakias 3:1 ngan hiya liwat an propeta Elias nga igintagna ha Malakias 4:5, 6. Gindayaw niya hi Juan sugad nga kapariho han iba nga propeta nga nauna ha iya, pinaagi ha pagsaysay: “Ha pagkamatuod, susumatan ko kamo: Waray pa natawo nga labaw kan Juan nga Parabaptis, kondi an usa nga uroubos ha Ginhadian han langit mas labaw ha iya. Pero tikang ha panahon ni Juan nga Parabaptis tubtob yana, an Ginhadian han langit an ginpapangalimbasogan gud han mga tawo nga makab-ot.”

Iginpapasabot dinhi ni Jesus nga hi Juan diri hingangadto ha Ginhadian han langit, kay an uroubos didto mas labaw kan Juan. Igin-andam ni Juan an dalan para kan Jesus pero namatay hiya antes selyohan han Kristo an ginkasabotan niya ngan han mga disipulo, nga hira magigin iya igkasi-magmarando ha iya Ginhadian. Salit nagsiring hi Jesus nga hi Juan diri hingangadto ha Ginhadian han langit. Lugod, magigin tunan-on hiya nga sakop han Ginhadian han Dios. Lucas 7:18-30; Mateo 11:2-15.

▪ Kay ano nga nagpakiana hi Juan kan Jesus kon hiya an Usa nga Makanhi o kon may iba pa nga maabot?

▪ Ano nga mga tagna an ginsiring ni Jesus nga gintuman ni Juan?

▪ Kay ano nga hi Juan nga Parabaptis diri makakaupod ni Jesus ha langit?