Kapitulo 113

Nagpaubos han Ultimo nga Paskua

INABOT na ha Jerusalem hira Pedro ngan Juan nga ginsugo ni Jesus basi mangandam para ha Paskua. Han kulop na, sinunod hi Jesus upod an 10 nga apostol. Tikatunod na an adlaw samtang nalugsad hira ha Bukid han mga Olibo. Ini an ultimo nga pagkinita ni Jesus ha syudad tikang hini nga bukid samtang adlaw pa, tubtob nga mabanhaw hiya.

Pag-abot nira ha syudad, kinadto hira ha balay diin hira magsasaurog han Paskua. Sinaka hira ha daku nga kwarto ha igbaw, ngan nakita nira nga nakaandam na an ngatanan para ha ira pribado nga pagsaurog han Paskua. Ginpapamulat gud ni Jesus ini nga okasyon, kay nagsiring hiya: “Naghingyap gud ako nga kumaon upod niyo hini nga panihapon ha Paskua antes ako mag-antos.”

Tradisyon na nga upat nga kopa hin bino an gin-iinom han mga nagsasaurog han Paskua. Han iginhatag kan Jesus an ikatulo nga kopa, nag-ampo hiya ngan nagsiring: “Karawata niyo ini ngan sadang uminom an kada usa ha iyo, kay susumatan ko kamo: Tikang yana diri na ako mainom hin bino tubtob nga umabot an Ginhadian han Dios.”

Samtang nangangaon, binuhát hi Jesus, ginhukas an iya pantungbaw nga panapton, kinuha hin tuwalya, ngan nagbutang hin tubig ha planggana. Kasagaran na nga ginsisiguro han tagbalay nga mahimsawan an bisita. Pero tungod kay waray an tagbalay, hi Jesus an nagbuhat hito. Oportunidad na unta ito han mga apostol, pero tungod kay bangin nagpapalabaw-labaw pa hira, waray bisan usa nga nagbuhat hito. Yana, naaawod hira nga ginhihimsawan hira ni Jesus.

Han hi Pedro na an hihimsawan, diniri hiya: “Ayaw ako paghimsawi.”

“Kon diri ko ikaw himsawan, diri ka makakaupod ha akon,” siring ni Jesus.

“Ginoo,” siring ni Pedro, “diri la an akon mga tiil, kondi pati an akon mga kamot ngan an akon ulo.”

Binaton hi Jesus: “An kinarigo na, limpyo na an bug-os nga lawas salit an iya mga tiil na la an hihimsawan. Limpyo na kamo, pero diri kamo ngatanan.” Ginsiring niya ini kay maaram hiya nga nagpaplano hi Judas Iscariote ha pagtraydor ha iya.

Han nahimsawan na ni Jesus an 12 nga apostol, pati hi Judas nga magtatraydor ha iya, iginsul-ot niya an iya pantungbaw nga panapton ngan binalik ha lamesa. Katapos nagpakiana hiya: “Nasasabtan ba niyo an akon ginbuhat ha iyo? Gintatawag niyo ako nga ‘Magturutdo,’ ngan ‘Ginoo,’ ngan husto ito nga pagtawag niyo ha akon. Salit, kon ako, bisan kon Ginoo ngan Magturutdo, naghimsaw ha iyo, kinahanglan liwat nga himsawan niyo an kada tagsa. Kay nagpakita ako ha iyo hin susbaranan, nga sugad han akon ginbuhat ha iyo, kinahanglan buhaton liwat niyo ito. Ha pagkamatuod, susumatan ko kamo, An uripon diri labaw ha iya agaron, ngan an ginsugo diri labaw ha nagsugo ha iya. Tungod kay maaram na kamo hini, malipayon kamo kon iyo ini buhaton.”

Maopay gud ito nga leksyon ha pagpaubos ngan pagserbi ha iba! Diri angay mag-ambisyon an mga apostol han pinakahitaas nga pwesto, ngan diri maghunahuna nga importante gud hira nga sadang serbihan pirme han iba. Kinahanglan subaron nira an susbaranan ni Jesus. Diri ito rituwal nga paghimsaw, lugod pagin andam ito ha pagserbi nga waray ginpipili, bisan kon ubos nga klase o diri makaruruyag ito nga trabaho. Mateo 26:20, 21; Marcos 14:17, 18; Lucas 22:14-18; 7:44; Juan 13:1-17.

▪ Ano an masisiring ha pagkinita ni Jesus ha Jerusalem han tisulod hiya ha syudad basi isaurog an Paskua?

▪ Durante han Paskua, ikapira nga kopa an iginpasa ni Jesus ha 12 nga apostol katapos niya mag-ampo?

▪ Ano nga pagserbi ha mga bisita an kustomre han nakanhi hi Jesus ha tuna? Kay ano nga waray ito buhata han iginsaurog ni Jesus ngan han mga apostol an Paskua?

▪ Ano an katuyoan ni Jesus ha paghimsaw ha mga apostol, bisan kon ubos ito nga klase hin trabaho?