Kapitulo 34

Nagpili han Iya mga Apostol

HAROS usa ngan tunga ka tuig na tikang nga iginpakilala ni Juan nga Parabaptis hi Jesus sugad nga Kordero han Dios ngan gintikangan Niya an iya ministeryo. Hito nga panahon nagin siyahan nga mga disipulo niya hira Andres, Simon Pedro, Juan, ngan posible nga hi Santiago (bugto ni Juan), sugad man hira Felipe ngan Natanael (gintatawag liwat nga Bartolome). Paglabay han panahon, damu pa an nagin sumurunod han Kristo.

Andam na hi Jesus ha pagpili han iya magigin mga apostol. Hira an iya duok nga makakaupod nga makarawat hin espesyal nga pagbansay. Pero antes magpili, kinadto hiya ha usa nga bukid ngan nag-inampo ha bug-os nga gab-i, posible nga basi mangaro hin kinaadman ngan bendisyon han Dios. Kinabuwasan, gintawag niya an iya mga disipulo ngan nagpili hin 12 ha ira. Pero tungod kay padayon nga gintututdoan hira ni Jesus, mga disipulo pa gihapon an tawag ha ira.

An unom han ginpili ni Jesus nga gin-unabi pa la, amo an iya nagin siyahan nga mga disipulo. Ginpili liwat niya hi Mateo nga iya gin-imbitar han nakadto ha opisina han pagbuhis. An lima pa nga ginpili amo hira Judas (gintatawag liwat nga Tadeo), Judas Iscariote, Simon nga Cananeo, Tomas, ngan Santiago nga anak ni Alfeo. Gintatawag liwat hiya nga burobata nga Santiago, kay bangin hurohamubo hiya o mas bata kay han usa pa nga apostol nga hi Santiago.

Maiha-iha na nga kaupod ni Jesus hira nga 12, ngan kilala na gud niya hira. Ha pagkamatuod, paryente niya an iba ha ira. Patod igsiyapa ni Jesus an magbugto nga hira Santiago ngan Juan. Ngan posible nga hi Alfeo bugto ni Jose nga pinakaamay ni Jesus. Salit an anak ni Alfeo nga hi apostol Santiago, patod liwat ni Jesus.

Syempre, diri makuri kan Jesus an paghinumdom han mga ngaran han iya mga apostol. Pero ikaw, mahinunumdoman mo ba? Hinumdumi nga duha an Simon, duha an Santiago, ngan duha an Judas, ngan hi Simon may bugto nga Andres, ngan hi Santiago may bugto nga Juan. Ito an paagi basi hinumdoman an walo nga apostol. An upat pa, amo an parasukot hin buhis nga hi Mateo, an nagruhaduha nga hi Tomas, an gintawag ha may ilarom han kahoy nga hi Natanael, ngan an iya sangkay nga hi Felipe.

An 11 ha ira taga-Galilea, an lugar ni Jesus. Hi Natanael taga-Cana. Hira Felipe, Pedro, ngan Andres taga-Betsaida, pero hira Pedro ngan Andres binalhin ha Capernaum, nga posible didto naukoy hi Mateo. Hira Santiago ngan Juan may negosyo nga pangisda salit posible nga naukoy hira ha Capernaum o ha hirani hito. Baga hin hi Judas Iscariote la, nga nagtraydor kan Jesus, an apostol nga taga-Judea. Marcos 3:13-19; Lucas 6:12-16.

▪ Hin-o nga mga apostol an posible nga paryente ni Jesus?

▪ Hin-o an mga apostol ni Jesus, ngan paonan-o mo mahinunumdoman an ira mga ngaran?

▪ Taga-diin an mga apostol?