Kapitulo 49

Nagsangyaw Utro ha Galilea

KATAPOS hin mga duha ka tuig nga maduruto nga pagsangyaw, mapahuway na ba hi Jesus ngan magrirelaks? Diri, lugod ginpahaluag niya an iya buruhaton pinaagi han ikatulo nga pagsangyaw ha bug-os nga Galilea. Ginkadto niya an ngatanan nga syudad ngan baryo, nagtutdo ha mga sinagoga ngan nagsangyaw han maopay nga sumat han Ginhadian. Tungod han iya mga nakita didto, mas nakombinse hiya nga kinahanglan pauswagon pa an pagsangyaw.

Ha bisan diin, nakikita niya an mga tawo nga nagkikinahanglan hin espirituwal nga pagtambal ngan pagliaw. Sugad hira hin gin-anitan ngan ginpabay-an nga mga karnero nga waray paraataman, salit nalooy hiya ha ira. Nagsiring hiya ha mga disipulo: “Oo, damu an aranihon, kondi gutiay an mag-arani. Salit pakimalooy kamo ha Agaron nga magpadara hin mga mag-arani ha iya aranihon.”

Ginplano na ni Jesus an iya bubuhaton. Ginsugo niya an 12 nga apostol, nga iya ginpili haros usa ka tuig na an naglabay. Iya hira ginpadis-padis, salit unom hira ka padis nga magsarangyaw. Katapos gintagan hira hin instruksyon: “Ayaw kamo pagkadto ha diri-Judio nga mga nasud, ngan ayaw kamo pagsulod ha syudad han mga Samaritano. Lugod, padayon nga pamilnga niyo an nagkawara nga mga karnero ha panimalay han Israel. Ha paglakat niyo, pagsangyaw kamo: ‘An Ginhadian han langit hirani na.’”

An Ginhadian nga ira isasangyaw amo an igintutdo ni Jesus nga ira ig-ampo. Hirani na ito kay inabot na an ginpili han Dios nga Hadi nga hi Jesu-Kristo. Basi pamatud-an nga an mga disipulo representante han gobyerno han Dios, gintagan hira ni Jesus hin awtoridad nga tambalon an mga may sakit ngan banhawon pa ngani an mga patay. Gintugon hira nga buhaton ini nga waray bayad.

Ginsidngan pa niya an mga disipulo nga diri magdara hin mga balon ha pagsangyaw. “Ayaw pagdara hin bulawan, silber, o tumbaga ha iyo paha nga surudlan hin kwarta, o surudlan han pagkaon ha pagbiyahe, o duha nga bado, o sandalyas o tungkod, kay an magburuhat takos tagan hin pagkaon.” An mga nakarawat han mensahe mahatag hin pagkaon ngan mauukyan. Sugad han ginsiring ni Jesus: “Bisan diin nga syudad o baryo kamo kumadto, bilnga kon hin-o an takos ngan magpabilin kamo didto tubtob nga bumaya kamo.”

Gintutdoan liwat hira ni Jesus kon paonan-o makikiistorya ha tagbalay mahitungod han mensahe han Ginhadian. “Pagsulod niyo ha balay, kumustaha an tagbalay,” nagtugon hiya. “Kon takos ito nga panimalay, mahingada unta hito an kamurayawan nga iyo iginpapahayag, pero kon diri ito takos, magpabilin unta ha iyo an kamurayawan. Ha bisan diin, kon waray kumarawat ha iyo o waray mamati ha iyo mga pulong, paggawas niyo hito nga balay o syudad, ipadpad an tapotapo ha iyo mga tiil.”

Makuri gud nga sirot an ipapadapat ha syudad nga diri makarawat han ira mensahe, siring ni Jesus. “Ha pagkamatuod, susumatan ko kamo: Ha Adlaw han Paghukom, mas makuri an sirot hito nga syudad kay ha Sodoma ngan Gomorra,” nagsaysay hiya. Mateo 9:35–10:15; Marcos 6:6-12; Lucas 9:1-5.

▪ Kakan-o gintikangan ni Jesus an iya ikatulo nga pagsangyaw ha bug-os nga Galilea, ngan ha ano hiya nakombinse?

▪ Han ginsugo niya an 12 nga apostol nga magsangyaw, ano an iya mga instruksyon ha ira?

▪ Kay ano nga husto nga igtutdo han mga disipulo nga an Ginhadian hirani na?