Kapitulo 70

Nagtambal hin Buta

HAN nangalimbasog an mga Judio pagbato kan Jesus, waray hiya bumaya ha Jerusalem. Han Sabbath na, samtang naglalakat hiya ngan an iya mga disipulo ha syudad, nakakita hira hin lalaki nga buta tikang ha katawo. An mga disipulo nagpakiana ha iya: “Rabbi, hin-o an nakasala salit natawo hiya nga buta, hiya o an iya mga kag-anak?”

Sugad han gintotoohan han iba nga rabbi, bangin natoo liwat an mga disipulo nga mahimo na makasala samtang iginbuburod pa la. Pero binaton hi Jesus: “Ini nga tawo waray makasala sugad man an iya mga kag-anak, kondi nahitabo ito basi maipakita an mga buhat han Dios pinaagi ha iya.” An kabuta han lalaki diri tungod hin sayop o sala nga nabuhat niya o han iya mga kag-anak. Lugod, tungod han sala han siyahan nga tawo nga hi Adan, an ngatanan nga tawo nagin diri perpekto, salit nagkakaada mga depekto sugad han pagin buta tikang ha katawo. Ito nga depekto han lalaki naghatag hin higayon kan Jesus nga maipakita an mga buhat han Dios.

Ginpabug-atan ni Jesus an pagkaapurado hini nga buruhaton. Nagsiring hiya: “Kinahanglan buhaton naton an buruhaton han nagsugo ha akon samtang adlaw pa, kay waray tawo nga makakabuhat hito kon umabot na an kagab-ihon. Samtang aanhi ako ha kalibotan, ako an kalamrag han kalibotan.” Diri mag-iiha, kon mamatay na hi Jesus hingangadto hiya ha kasisidman han lubnganan diin waray na gud hiya mahihimo nga bisan ano. Pero yana, hiya an gintitikangan han kalamrag han kalibotan.

Katapos niya magyakan hito, linurâ hiya ha tuna ngan naghimo hin lapok pinaagi han iya laway. Iya ito iginpahid ha mga mata han tawo ngan ginsidngan hiya: “Kadto paghiram-os ha karigoan ha Siloam.” Salit kinadto hiya. Ngan pakahiram-os niya, nakakita na hiya! Binalik hiya nga malipayon gud, kay ito an siyahan nga iya pakakita!

Nahipausa gud an iya mga kahimungto ngan an iba nga nakilala ha iya. “Diri ba ito an tawo nga nagliliningkod ngan nakikilimos hadto?” nagpakiana hira. “Amo ini hiya,” siring han iba. Pero an iba diri makatoo: “Diri ito hiya, pero kapariho la niya.” Kondi nagsiring ito nga tawo: “Ako ini.”

“Paonan-o napukrat an imo mga mata?” nagpakiana hira.

“An tawo nga tinatawag nga Jesus naghimo hin lapok ngan iginpahid ito ha akon mga mata ngan ginsidngan ako, ‘Kadto ha Siloam ngan paghiram-os.’ Salit kinadto ako ngan pakahiram-os ko nakakita na ako.”

“Hain na ito nga tawo?” nagpakiana hira.

Binaton hiya: “Diri ako maaram.”

Katapos gindara hiya han mga tawo ha ira mga lider han relihiyon, an mga Pariseo. Nagpinakiana liwat hira ha iya kon paonan-o hiya nakakita. “Ginpahiran niya hin lapok an akon mga mata, ngan pakahiram-os ko nakakita na ako,” siring niya.

Oo, sadang unta malipay an mga Pariseo kay natambal an makililimos! Pero ginpakaraot lugod nira hi Jesus. “Ito nga tawo diri tikang ha Dios,” siring nira. Kay ano nga nagyakan hira hito? “Kay diri niya gintutuman an Sabbath.” Kondi an iba nga Pariseo nagpakiana: “Makakahimo ba hin sugad hito nga mga milagro an tawo nga makasasala?” Tungod hito nagkabahinbahin hira.

Salit ginpakianhan nira an lalaki: “Ano an masisiring mo mahitungod ha iya nga nagpukrat han imo mga mata?”

Binaton hiya: “Usa hiya nga propeta.”

Waray tumoo hito an mga Pariseo. Kombinsido hira nga nagkunsabo hi Jesus ngan ito nga lalaki basi limbongan an mga tawo. Basi ito masulbad, iginpatawag nira an mga kag-anak han makililimos basi pakianhan hira. Juan 8:59; 9:1-18.

▪ Ano an hinungdan han kabuta han lalaki? Ano an diri hinungdan hito?

▪ Ano an maabot nga kagab-ihon nga waray na mabubuhat an tawo?

▪ Han natambal an lalaki, ano an reaksyon han mga nakilala ha iya?

▪ Kay ano nga nagkabahinbahin an mga Pariseo han natambal an lalaki?