Kapitulo 43

Nagtutdo Pinaagi hin mga Ilustrasyon

POSIBLE nga nakadto hi Jesus ha Capernaum han ginsaway niya an mga Pariseo. Hito liwat nga adlaw, ginawas hiya ha balay ngan kinadto ha Dagat han Galilea, diin damu nga tawo an nagpakadto. Sinakay hiya ha baluto, ngan nagtutdo ha mga tawo ha baybayon mahitungod ha Ginhadian han langit pinaagi hin mga parabola, o ilustrasyon, nga pamilyar ha ira.

Siyahan, nag-istorya hiya mahitungod hin magsarabwag nga nagsabwag hin binhi. An iba nga binhi nahulog ha ligid han dalan ngan ginpanuktok han katamsihan. An iba nahulog ha tuna nga may daku nga bato ha ilarom. Tungod kay waray pakagamot hin hilarom an bag-o nga mga tanom, nalaya ito han duro nga kapaso han adlaw. An iba nahulog ha katunokan, ngan tinubo ito pero natabonan pagrabong han katunokan. Ngan an iba nahulog ha maopay nga tuna ngan namunga hin 100 ka pilo, an iba 60, ngan an iba pa 30.

Ha ikaduha nga ilustrasyon, igintanding ni Jesus an Ginhadian han Dios ha tawo nga nagsabwag hin binhi. Paglabay han mga adlaw, samtang an tawo nakaturog ngan namata, natubo an binhi. Diri hiya maaram kon paonan-o ito natubo. Basta tinubo na la ito ngan nanguhay. Kahinog han mga lugas, gin-ani niya ito.

An ikatulo nga ilustrasyon ni Jesus mahitungod hin tawo nga nagsabwag hin maopay nga binhi, pero “han nangangaturog an mga tawo,” may inabot nga kaaway ngan nagsabwag hin mga banwa dida ha mga trigo. Nagpakiana an iya mga surugoon kon gagabuton ba nira ito nga mga banwa. Pero binaton hiya: ‘Ayaw, kay bangin mahiupod kagabot an mga trigo. Pasagdi la nga dungan nga tumubo ito tubtob ha pag-ani. Ngan akon sisidngan an mga mag-arani nga ibulag an mga banwa basi sunugon, ngan ibutang an mga trigo ha bodega.’

Padayon nga nagsaysay hi Jesus ha mga tawo ha baybayon hin duha pa nga ilustrasyon. Nagsiring hiya nga “an Ginhadian han langit” pariho hin liso han mustasa nga igintanom han usa nga tawo. Bisan kon ito an gigutiayi ha ngatanan nga liso, nagigin gidadakui ito ha ngatanan nga utanon. Nagigin kahoy ito salit an katamsihan nakakahapon ngan nakakasirong ha mga sanga hito.

An iba yana nariwa kay may liso nga mas gutiay pa ha liso han mustasa. Pero diri mahitungod han mga tanom an igintututdo ni Jesus. Ha mga liso nga hinbabaroan han mga taga-Galilea ha iya panahon, an liso han mustasa an gigutiayi. Salit nasabtan nira an urusahon nga pagtubo nga igin-ilustrar ni Jesus.

Ha kataposan, igintanding niya “an Ginhadian han langit” ha libadura nga ginkuha han babaye ngan iginsalakot ha tulo ka takos nga harina. Katapos, nagsiring hiya nga nakapatubo ito ha bug-os nga minasa.

Han natapos hi Jesus pagsaysay hinin lima nga ilustrasyon, ginpauli niya an mga tawo ngan inuli hiya ha balay. Katapos sinunod ha iya an 12 nga apostol ngan an iba pa.

Nagpahimulos han mga Ilustrasyon ni Jesus

Han kinadto an mga disipulo kan Jesus katapos niya magtutdo ha mga tawo ha baybayon, interesado gud hira ha iya bag-o nga paagi han pagtutdo. Hinbatian na nira nga naggamit hiya hin mga ilustrasyon hadto, pero diri sugad hito kadamu. Salit nagpakiana hira: “Kay ano nga pinaagi hin mga ilustrasyon an imo pag-istorya ha ira?”

An usa nga rason, basi matuman an ginsiring han propeta: “Magyayakan ako pinaagi hin mga ilustrasyon, ngan ipapahayag ko an mga butang nga nakatago tikang ha tinikangan.” Pero labot hito, naggamit hiya hin mga ilustrasyon basi hibaroan an aada ha kasingkasing han mga tawo.

Ha pagkamatuod, interesado la an kadam-an kan Jesus kay maopay hiya mag-istorya ngan nagbubuhat hin milagro, diri kay Ginoo nga angay serbihan ngan kinaburut-on nga sundon. Diri nira karuyag mabag-o an ira panhunahuna ha mga butang o an ira pagkinabuhi. Diri nira karuyag makaimpluwensya an mensahe ha ira.

Tungod hito hi Jesus nagsiring: “Salit nagyayakan ako ha ira pinaagi hin mga ilustrasyon, kay nakakakita hira pero baga hin waray nakikita, nakakabati hira pero baga hin waray nababatian, ngan diri liwat hira nakakasabot han kahulogan hito. Natutuman ha ira an tagna ni Isaias nga nasiring, ‘. . . Kay an kasingkasing hini nga katawohan nagin matig-a.’”

“Pero,” siring ni Jesus, “malipayon kamo kay an iyo mga mata nakakakita, ngan an iyo mga talinga nakakabati. Ha pagkamatuod, susumatan ko kamo: Damu nga propeta ngan magtadong nga tawo an naghingyap nga makit-an an iyo nakikita nga waray nira makita, ngan . . . mabatian an iyo nababatian nga waray nira mabatii.”

Oo, an 12 nga apostol ngan adton kaupod nira makinarawaton an kasingkasing. Salit hi Jesus nagsiring: “An sagrado nga mga tinago han Ginhadian han langit iginpapasabot ha iyo, pero diri ito iginpapasabot ha ira.” Tungod kay karuyag masabtan han mga disipulo an ilustrasyon mahitungod han magsarabwag, iginsaysay niya an kahulogan hito.

“An binhi amo an pulong han Dios,” siring ni Jesus, ngan an tuna amo an kasingkasing. Mahitungod han binhi nga nahisabwag ha ligid han dalan, nagsaysay hiya: “Inabot an Yawa ngan ginkuha an pulong ha ira kasingkasing basi diri hira tumoo ngan diri matalwas.”

Ha luyo nga bahin, an binhi nga nahisabwag ha tuna nga may daku nga bato ha ilarom, nagpapasabot hin kasingkasing han mga tawo nga malipayon nga nagkarawat han pulong. Pero tungod kay waray ito makagamot hin hilarom ha ira kasingkasing, waray na hira tumoo han nagkaada hin pagsari o pagkontra.

Mahitungod han binhi nga nahisabwag ha katunokan, nagsiring hi Jesus nga ito an mga tawo nga nakabati han pulong. Pero nahisimang hira han kabaraka, karikohan, ngan kaliawan ha kinabuhi, salit natabonan hira ngan waray mahinog an mga bunga.

Ha kataposan, nagsiring hi Jesus nga an nahisabwag ha maopay nga tuna amo an nagtitipig han pulong ngan namumunga nga may pagpailob katapos mamati nga may makinarawaton nga kasingkasing.

Daku gud nga bendisyon para ha mga disipulo nga nagbiling kan Jesus nga masabtan an kahulogan han iya mga igintutdo! Katuyoan niya nga masabtan ito basi maitutdo ha iba an kamatuoran. “An lampara diri gintatakloban hin taraksan nga basket o iginbubutang ha ilarom han katre, . . . diri ba?” nagpakiana hiya. Lugod, “iginbubutang ito ha burutangan han lampara.” Katapos nagsiring hiya: “Salit tagi hin atensyon kon paonan-o kamo namamati.”

Ginbendisyonan hin Dugang nga Katutdoan

Katapos hibaroan an kahulogan han ilustrasyon mahitungod han magsarabwag, karuyag han mga disipulo nga mahibaro pa. “Ig-esplikar ha amon an ilustrasyon mahitungod han mga banwa ha uma,” naghangyo hira.

Iba gud an disposisyon han mga disipulo ha mga tawo nga nakadto ha baybayon! Diri interesado ito nga mga tawo nga hibaroan an kahulogan han mga ilustrasyon, ngan kontento na ha ginsiring la ha ira. Gintanding ni Jesus an kaibahan han mga namati ha baybayon ha iya mausisa nga mga disipulo nga kinadto ha balay.

Nagsiring hiya: “An suruklan nga iyo ginagamit amo an gagamiton ha iyo, oo, damu pa an idudugang ha iyo.” An mga disipulo sinsero nga namati kan Jesus, salit ginbendisyonan hira hin dugang nga katutdoan.

Ginbaton ni Jesus an pakiana han iya mga disipulo: “An magsarabwag han maopay nga binhi amo an Anak han tawo. An uma amo an kalibotan, ngan an maopay nga binhi amo an mga anak han Ginhadian, kondi an mga banwa amo an mga anak han usa nga maraot, ngan an kaaway nga nagsabwag hito amo an Yawa. An pag-ani amo an ikatarapos hini nga sistema, ngan an mag-arani amo an mga anghel.”

Katapos isaysay ni Jesus an tagsa nga bahin han ilustrasyon, iginsumat niya an mahitatabo. Ha ikatarapos han sistema, nagsiring hiya nga ibubulag han mag-arani, o mga anghel, an sugad-banwa nga nag-aangkon nga mga Kristiano tikang ha totoo nga “mga anak han Ginhadian.” Katapos an “mga anak han usa nga maraot” titigamnan para ha kabungkagan, pero an mga anak han Ginhadian han Dios, “an magtadong,” masanag hin malamrag ha Ginhadian han ira Amay.

Sunod, nagsaysay hiya hin tulo pa nga ilustrasyon ha iya mausisa nga mga disipulo. Siyahan, hiya nagsiring: “An Ginhadian han langit pariho hin nakatago nga bahandi ha uma nga hinkit-an hin usa nga tawo ngan iya igintago. Tungod han iya kalipay, linakat hiya ngan iginbaligya an iya mga panag-iya ngan ginpalit ito nga uma.”

Nagsiring pa hiya: “An Ginhadian han langit pariho liwat hin nagbibiyahe nga negosyante nga nagpipinamiling hin mag-opay nga perlas. Pakakita niya hin maopay nga klase hin perlas, inuli hiya ngan iginbaligya dayon an ngatanan nga iya panag-iya ngan ginpalit ito.”

Hi Jesus pariho ha tawo nga nakakita hin nakatago nga bahandi ngan ha negosyante nga nakakita hin maopay nga klase hin perlas. Iginbaligya niya an ngatanan, siring pa, ginbayaan an iya hitaas nga posisyon ha langit ngan nagin ubos nga tawo. Katapos, sugad nga tawo, gin-antos niya an pagtamay ngan mapintas nga pagkontra. Ginpamatud-an niya nga angay hiya magin Magmarando ha Ginhadian han Dios.

Naatubang liwat hin ayat an mga sumurunod ni Jesus nga ibaligya an ngatanan basi makarawat an daku nga balos nga magin igkasi-magmarando han Kristo o magin tunan-on nga sakop han Ginhadian. Huhunahunaon ba naton nga mas importante kay ha bisan ano an aton bahin ha Ginhadian han Dios, sugad hin birilhon nga bahandi o hin presyoso nga perlas?

Ha kataposan, igintanding ni Jesus “an Ginhadian han langit” ha pukot nga nakakadakop han ngatanan nga klase hin isda. Han ginbulag-bulag an mga isda, an diri mag-opay iginlalabog pero an mag-opay iginsusulod ha surudlan. Salit, hi Jesus nagsiring nga sugad hito an mahitatabo ha ikatarapos han sistema; ibubulag han mga anghel an magraot tikang ha magtadong, ngan an magraot bubungkagon.

Gintikangan mismo ni Jesus ini nga pangisda han gin-imbitar niya an iya siyahan nga mga disipulo nga magin “parapangisda hin mga tawo.” Ha paggiya han mga anghel, an pangisda nagpapadayon hin damu ka siglo na. Gindadanas na an “pukot,” nga nagsisimbolo han pagsangyaw han Ginhadian nga nagtitirok han ngatanan nga klase hin isda.

Bisan kon an diri mag-opay nga isda ilalabog basi mabungkag, nagpapasalamat kita nga mahimo kita mahiupod ha “mag-opay nga isda” nga titipigan. Pinaagi han aton sinsero nga hingyap nga magkaada dugang nga kahibaro ngan pagsabot pariho han mga disipulo ni Jesus, bibendisyonan kita han Dios diri la hin damu nga katutdoan kondi pati hin kinabuhi nga dayon. Mateo 13:1-52; Marcos 4:1-34; Lucas 8:4-18; Salmo 78:2; Isaias 6:9, 10.

▪ Kakan-o ngan diin nagsaysay hi Jesus hin mga ilustrasyon ha mga tawo?

▪ Ano an lima nga ilustrasyon nga iginsumat ni Jesus ha mga tawo?

▪ Kay ano nga nagsiring hi Jesus nga an liso han mustasa an gigutiayi ha ngatanan nga liso?

▪ Kay ano nga nagtutdo hi Jesus pinaagi hin mga ilustrasyon?

▪ Paonan-o iginpakita han mga disipulo nga iba hira ha kadam-an nga tawo?

▪ Ano an kahulogan han ilustrasyon ni Jesus mahitungod han magsarabwag?

▪ Kay ano nga iba gud an disposisyon han mga disipulo kay ha mga tawo nga nakadto ha baybayon?

▪ Hin-o o ano an ginsisimbolohan han magsarabwag, uma, maopay nga binhi, kaaway, pag-ani, ngan mag-arani?

▪ Ano an tulo pa nga ilustrasyon nga iginsaysay ni Jesus, ngan ano an aton mahibabaroan tikang hito?