Kapitulo 31

Nangutos hin mga Uhay ha Adlaw han Sabbath

WARAY pag-iha, hi Jesus ngan an iya mga disipulo binaya ha Jerusalem ngan binalik ha Galilea. Katsaringsing na, ngan may mga lugas na an mga uhay ha kaumhan. Han nagutom an mga disipulo, nangutos hira hin mga uhay ngan nangaon. Pero tungod kay Sabbath, sigurado nga nakit-an an ira ginbuhat.

Diri pa la maiha, gin-ikaparatay hi Jesus han mga lider han relihiyon ha Jerusalem kay gintalapas kuno niya an Sabbath. Yana nag-akusar na liwat an mga Pariseo: “Kitaa! An imo mga disipulo nagbubuhat han igindidiri ha adlaw han Sabbath.”

Nagsiring an mga Pariseo nga an pangutos hin mga uhay ngan pagkusokuso hito basi makaon katugbang na han pag-ani ngan paggiok. Tungod han ira istrikto nga interpretasyon kon ano an masisiring nga trabaho, an Sabbath nakapabug-at imbes nga makapalipay ngan makaparig-on ha espirituwal. Salit binaton hi Jesus pinaagi hin mga ehemplo ha Kasuratan nga nagpapakita nga diri katuyoan ni Jehova nga Dios iton sobra kaistrikto nga pagpatuman han Iya Balaud han Sabbath.

Nagsiring hi Jesus nga han nagutom hi David ngan an iya kaupod nga kalalakin-an, kinadto hira ha tabernakulo ngan ginkaon an halad nga mga tinapay. Ito nga mga tinapay nga halad kan Jehova, ginkuha na ngan ginsaliwnan hin bag-o ngan iginreserba basi kaunon han mga saserdote. Pero tungod han kahimtang, hi David ngan an iya kaupod nga kalalakin-an waray hukmi han ginkaon nira ito.

Naghatag hi Jesus hin usa pa nga ehemplo: “Waray ba niyo mabasa ha Balaud nga an mga adlaw han Sabbath waray tagda sugad nga sagrado han mga saserdote ha templo, kondi waray hira makasala?” Oo, bisan kon Sabbath, an mga saserdote nagpapatay hin mga hayop ngan nagbubuhat han iba pa nga buruhaton ha templo ha pagpangandam ha paghalad! “Pero nasiring ako ha iyo nga an usa nga aanhi mas importante kay ha templo,” siring ni Jesus.

Ginsagdonan niya an mga Pariseo: “Kon nasabtan niyo an kahulogan hini, ‘Karuyag ko an kalooy ngan diri an halad,’ waray unta niyo hukmi adton waray makasala.” Katapos nagsiring hiya: “Kay an Anak han tawo amo an Ginoo han Sabbath.” Ano an iya karuyag sidngon? Ginhihisgotan niya an iya mamurayawon nga pagmando ha Ginhadian ha 1,000 ka tuig.

Mga 6,000 ka tuig na yana nga an katawohan nag-aantos han kakurian tungod kay gin-uuripon ni Satanas nga Yawa, nga an kamadarahog ngan girra ordinaryo la. Ha kabaliktaran, an espesyal nga adlaw han Sabbath ha paghadi han Kristo magigin panahon han pagpahuway ha ngatanan nga pag-antos ngan pagtimaraot. Mateo 12:1-8; Lebitiko 24:5-9; 1 Samuel 21:1-6; Numeros 28:9; Hosea 6:6.

▪ Ano an igin-akusar ha mga disipulo ni Jesus, ngan ano an iya baton?

▪ Ano nga sayop nga pagsabot han mga Pariseo an ginpabug-atan ni Jesus?

▪ Kay ano nga hi Jesus an “Ginoo han Sabbath”?