Kapitulo 57

Napaid ha Nagsasakit

KATAPOS kondenaron ni Jesus an mga Pariseo tungod han ira mga tradisyon nga hira la an nagpapahimulos, binaya hiya ngan an iya mga disipulo. Bangin nahinunumdoman mo nga diri pa la maiha, hiya ngan an iya mga disipulo kinadto ha usa nga lugar basi pumahuway hin madaliay, pero waray ito madayon han nakit-an hira han mga tawo. Yana, nagbiyahe hira hin damu ka kilometro tipanorte ngadto ha mga lugar han Tiro ngan Sidon. Posible nga ito la an pagbiyahe ni Jesus ha gawas han teritoryo han Israel kaupod an iya mga disipulo.

Katapos makabiling hin balay nga mauukyan, nagtugon hi Jesus nga waray angay mahibaro kon hain hira. Pero bisan hini nga teritoryo nga gawas na han Israel, nakilal-an la gihapon hiya. Usa nga Griego nga babaye, nga taga-Fenicia ha Sirya an nakakita ha iya ngan naghinangyo: “Kalooyi ako, Ginoo nga Anak ni David. An akon anak nga babaye ginsaniban hin demonyo ngan ginpapakurian hiya.” Pero waray bumaton hi Jesus.

Katapos, nagsiring kan Jesus an iya mga disipulo: “Paiwasa hiya, kay nagsisinunod hiya ha aton nga nagsisininggit.” Ginsaysay ni Jesus kon kay ano nga ginbalewaray niya an babaye: “Ginpakanhi ako diri para ha bisan hin-o kondi para ha nagkawawara nga mga karnero ha panimalay han Israel.”

Pero naghinangyo la gihapon an babaye. Dinaop hiya kan Jesus, yinukbo, ngan nakimalooy: “Ginoo, buligi ako!”

Sigurado nga nabantad gud an kasingkasing ni Jesus hiton sinsero nga pakimalooy han babaye! Pero ginsiring niya utro an iya nangunguna nga responsabilidad, an pagserbi ha katawohan han Dios ha Israel. Posible nga ginsarihan liwat niya an pagtoo han babaye han gin-unabi niya an nakakaminos nga pagtratar han mga Judio ha mga taga-iba nga nasud. Nangatadongan hiya: “Diri angay kuhaon an tinapay han kabataan ngan ig-itsa ito ha gudtiay nga kaayaman.”

Pinaagi han mapinairon nga tono han tingog ngan ekspresyon han nawong ni Jesus, sigurado nga naipakita niya an iya gugma ha mga diri Judio. Ginpagaan pa ngani niya an pagtanding ha mga Hentil ha mga ayam pinaagi ha pagsiring nga hira “gudtiay nga kaayaman,” o mga tiyô. Pero imbes nga masina, inuyon an babaye han gin-unabi ni Jesus an nakakaminos nga pagtratar han mga Judio ngan mapainubsanon nga nagsiring: “Oo, Ginoo. Pero an gudtiay nga kaayaman nakaon han nahuhulog nga mga pagkaon tikang ha lamesa han ira mga agaron.”

“O Babaye, daku gud an imo pagtoo,” siring ni Jesus. “Matuman unta an imo karuyag.” Natuman gud ito! Han inuli an babaye ha ira balay, nakita niya ha higdaan an iya anak nga nag-opay na.

Tikang ha Sidon nga hirani ha baybayon, ginlatas ni Jesus ngan han iya mga disipulo an nasud pakadto ha surok han Salog Jordan. Posible nga tinabok hira ha Jordan ha unhan han Dagat han Galilea ngan inabot hira ha teritoryo han Decapolis ha este han dagat. Didto, sinagka hira ha bukid, pero nakit-an hira han mga tawo ngan gindara ngadto kan Jesus an mga piay, baldado, buta, ngula, ngan damu pa nga may sakit ngan may diperensya. Gindara hira hirani ha iya tiilan, ngan iya gintambal hira. Nahipausa an mga tawo han nakita nira nga an ngula nakakayakan na, an piay nakakalakat na, ngan an buta nakakakita na, salit gindayaw nira an Dios han Israel.

Gintagan ni Jesus hin espesyal nga atensyon an usa nga bungol ngan may diperensya ha pagyakan. Kasagaran na nga an mga bungol madagmit maawod, labi na ha publiko. Bangin naobserbaran ni Jesus nga ginninerbyos ito nga tawo. Salit mapinairon nga iginhirayo hiya ni Jesus ha kadam-an. Han hira na la, iginsaysay ni Jesus kon ano an iya hihimoon. Iginsuksok niya an iya mga tudlo ha mga talinga hito nga tawo, ngan katapos lumura, iya ginkaptan an dila. Hinangad hi Jesus ha langit, gininhawa hin hilarom, ngan nagsiring: “Maabrihan ka.” Naabrihan dayon an mga talinga hito nga lalaki, ngan nakayakan na hiya hin maopay.

Tungod han damu nga ginpanambal ni Jesus, gin-apresyar hiya han mga tawo. Hira nagsiring: “Urusahon gud an ngatanan nga iya ginbuhat. Gintambal pa ngani niya an mga bungol ngan mga ngula.” Mateo 15:21-31; Marcos 7:24-37.

▪ Kay ano nga waray dayon tambala ni Jesus an anak han Griego nga babaye?

▪ Katapos hito, diin kumadto hi Jesus ngan an mga disipulo?

▪ Paonan-o mapinairon nga gintambal ni Jesus an bungol ngan may diperensya ha pagyakan?