Kapitulo 110

Natapos an Ministeryo ha Templo

ULTIMO na nga pagkadto ni Jesus ha templo. Ha pagkamatuod, hirani na matapos an iya ministeryo dinhi ha tuna labot la han mga mahitatabo ha pagbista ngan pagpatay ha iya paglabay hin tulo ka adlaw. Yana, nagpadayon hi Jesus ha pagkondenar ha mga eskriba ngan mga Pariseo.

Tulo ka beses nga nagsiring hiya: “Kairo niyo, mga eskriba ngan mga Pariseo, mga hipokrito!” Siyahan, nagpahayag hiya nga kairo nira kay ira ginhuhugasan “an gawas han tasa ngan yahong, kondi an sulod hito puno hin kahakog ngan duro nga pagpatakas.” Salit nagsagdon hiya: “Hugasi anay an sulod han tasa ngan han yahong basi magin limpyo liwat an gawas hito.”

Ikaduha, nagpahayag hiya nga kairo nira kay sugad hin nadudunot ngan naninimaho hira ha sulod nga igintatago nira pinaagi han pakita la nga pagin relihiyoso. Nagsiring hiya: “Pariho kamo hin ginpabusag nga mga lubnganan, nga ha gawas maopay gud pagkit-on pero ha sulod puno hin mga tul-an han nagkamatay nga mga tawo ngan han ngatanan nga klase han kahugaw.”

Ikatulo, naibuhayhag an ira pagkahipokrito kay naruruyag hira ha paghimo hin mga lubnganan para ha mga propeta ngan pagdekorasyon hito basi dayawon hira tungod han ira mga iginhahatag. Pero sugad han iginbuhayhag ni Jesus, ‘mga anak hira hadton nagpatay ha mga propeta.’ Oo, namimeligro an bisan hin-o nga nagbubuhayhag han ira pagkahipokrito!

Ha pagpadayon, gin-gamit ni Jesus an pinakamabug-at nga mga pulong ha pagkondenar: “Mga halas, katulinan han mga halas, paonan-o kamo makakalikay han sirot ha Gehenna?” An Gehenna usa nga walog nga basurahan ha Jerusalem. Salit iginpapasabot ni Jesus nga tungod han padayon nga pagbuhat hin maraot han mga eskriba ngan mga Pariseo, bubungkagon hira ha kadayonan.

May kalabotan ha ginsugo ni Jesus nga mga representante, nagsiring hiya: “An iba ha ira iyo papatayon ngan igraraysang ha kahoy, ngan an iba iyo lalatiguhon ha mga sinagoga ngan pagtitimarauton ha tagsa nga syudad. Salit may baratunon kamo ha dugo han ngatanan nga magtadong nga ginpatay ha tuna, tikang ha dugo han matadong nga hi Abel tubtob kan Sakarias nga anak ni Barakias [Jehoyada ha 2 Kronikas], nga iyo ginpatay ha butnga han santuaryo ngan han halaran. Ha pagkamatuod susumatan ko kamo: Ini ngatanan nga sirot mahitatabo hini nga henerasyon.”

Tungod kay ginsaway ni Sakarias an mga lider han Israel, “hira nagbudhi patok ha iya, ngan ginbato hiya hin mga bato ha sugo han hadi ha ruwang han balay ni Jehova.” Pero sugad han igintagna ni Jesus, sisirotan an Israel tungod ha pagpatay hito ngatanan nga magtadong. Nahitabo ito paglabay hin 37 ka tuig, han 70 C.E., han ginbungkag han Romano nga kasundalohan an Jerusalem ngan sobra usa ka milyon nga mga Judio an nagkamatay.

Han ginhunahuna ni Jesus iton makaharadlok nga mahitatabo, nasubo gud hiya. “Jerusalem, Jerusalem,” nagsiring utro hiya, “makadamu ako nangalimbasog nga tirukon an imo mga anak, sugad hin ugang nga nagtitirok han iya mga pisô ha ilarom han iya mga pako! Pero diri kamo naruruyag. Kitaa! Babayaan han Dios an iyo balay.”

Nagsiring pa hiya: “Diri na gud ako niyo makikita tikang yana tubtob nga sumiring kamo, ‘Bendisyonan unta hiya nga napakanhi ha ngaran ni Jehova!’” Mahitatabo ito ha presensya han Kristo kon umabot na hiya ha iya Ginhadian ha langit ngan makikita hiya han mga tawo pinaagi han ira pagtoo.

Yana, binalhin hi Jesus ha lugar diin nakikita niya an mga kahon han kwarta ha templo ngan an mga tawo nga naghuhulog han ira kwarta. An mga riko naghulog hin damu nga sinselyo. Pero inabot an pobre nga balo nga babaye ngan naghulog hin duha nga sinselyo nga gutiay gud an kantidad.

Gintawag ni Jesus an mga disipulo ngan nagsiring: “Ha pagkamatuod, susumatan ko kamo nga ini nga pobre nga balo naghulog hin mas damu kay ha ngatanan nga naghulog ha mga kahon han kwarta.” Sigurado nga waray nira ito masabti. Salit nagsaysay hi Jesus: “Hira ngatanan naghulog han ira sobra, kondi ini nga balo, bisan kon nanginginahanglan hiya, naghulog han ngatanan nga iya kwarta, an iya bug-os nga ginpakabuhian.” Katapos niya igsiring ito, binaya hiya ha templo ha ultimo nga higayon.

Tungod ha kadaku ngan kaopay han templo, usa nga disipulo an nagsiring: “Magturutdo, kitaa ini nga mga bato ngan mga istraktura!” Sumala ha sumat, ito nga mga bato sobra 11 metros an kahilaba, sobra 5 metros an kahilapad, ngan sobra 3 metros an kahitaas!

“Inin dagku nga istraktura ba an [iyo] ginkikita?” nagpakiana hi Jesus. “Waray gud usa nga bato nga magpapabilin ha bawbaw han usa nga bato nga diri marurumpag.”

Katapos, hi Jesus ngan an mga apostol tinabok ha Walog han Kidron ngan sinagka ha Bukid han mga Olibo. Didto nakikita nira ha ubos an makaruruyag gud nga templo. Mateo 23:25–24:3; Marcos 12:41–13:3; Lucas 21:1-6; 2 Kronikas 24:20-22.

▪ Ano an ginbuhat ni Jesus han iya ultimo nga pagkadto ha templo?

▪ Paonan-o naibuhayhag an pagkahipokrito han mga eskriba ngan mga Pariseo?

▪ Ano an iginpapasabot han “sirot ha Gehenna”?

▪ Kay ano nga nagsiring hi Jesus nga mas daku an iginhulog han balo nga babaye kay ha mga riko?