Kapitulo 3

Natawo an Mag-aandam han Dalan

HI Elizabeth hirani na manganak. Tulo ka bulan na nga kaupod niya hi Maria. Pero yana kinahanglan na ni Maria magbiyahe hin hirayo tipauli ha Nazaret. Mga unom ka bulan na la, manganganak liwat hiya.

Waray pag-iha katapos nga inuli hi Maria, nanganak hi Elizabeth. Makalilipay gud nga naglampos hiya ha panganak ngan mahimsog hiya pati an bata! Han iginpakita niya an bata ha mga amyaw ngan mga paryente, nalipay liwat hira.

Sumala ha Balaud han Dios, ha ikawalo ka adlaw tikang matawo an usa nga bata nga lalaki ha Israel, kinahanglan turion hiya. Hito nga higayon, binisita an ira kasangkayan ngan mga paryente. Nagsiring hira nga an ngaran han bata sadang igpariho ha iya tatay, hi Sakarias. Pero nagsiring hi Elizabeth: “Diri puydi! Juan an igngangaran ha iya.” Hinumdumi nga ito an ginsiring ni anghel Gabriel nga igngangaran ha bata.

Pero diniri an ira kasangkayan: “Waray bisan usa ha imo mga paryente nga sugad hito an ngaran.” Katapos nagsinyas hira basi pakianhan an tatay kon ano an iya karuyag igngaran ha bata. Nangaro hi Sakarias hin gutiay nga tabla ngan nahipausa gud hira han iya iginsurat: “Juan an iya ngaran.”

Tungod hito, milagroso nga nakayakan na hi Sakarias. Mahinunumdoman mo nga waray na hiya makayakan han waray hiya tumoo ha ginsiring han anghel nga magbuburod hi Elizabeth. Salit han nakayakan na hiya, an ngatanan nga ira kahigrani nahipausa gud ngan nag-iristorya: “Magigin ano gud ba ini nga bata?”

Hi Sakarias napuno han baraan nga espiritu, ngan nagdayaw: “Darayawon hi Jehova, an Dios han Israel, kay iya ginkaloy-an an iya katawohan ngan gintagan hira hin katalwasan. Ngan naghatag hiya hin sungay han katalwasan para ha aton ha panimalay ni David nga iya surugoon.” Ini nga “sungay han katalwasan” amo an Ginoo nga hi Jesus nga hirani na matawo. Hi Sakarias nagsiring nga pinaagi ha iya “ihahatag ha aton [han Dios] an pribilehiyo han sagrado nga pag-alagad ha iya nga waray kahadlok, nga may pagkamaunungon ngan pagkamatadong ha iya atubangan ha ngatanan naton nga adlaw.”

Katapos nagtagna hi Sakarias mahitungod han iya anak nga hi Juan: “Kondi ikaw, anak ko, tatawagon ka nga propeta han Gihitaasi, kay mag-uuna ka kan Jehova basi iandam an iya mga dalan, basi isumat ha iya katawohan an mensahe han katalwasan pinaagi han pagpasaylo han ira mga sala tungod han mahigugmaon nga kalooy han aton Dios. Pinaagi hini nga kalooy, makikita naton an kalamrag tikang ha langit sugad han pagsirang han adlaw basi lamragan an nangangalingkod ha kasisidman ngan an nalalandongan han kamatayon, ngan basi malampuson nga giyahan an aton mga tiil ha dalan han kamurayawan.”

Hito nga panahon, hi Maria nga sigurado nga waray pa asawa, nakauli na ha Nazaret. Ano an mahitatabo ha iya kon maklaro na nga burod hiya? Lucas 1:56-80; Lebitiko 12:2, 3.

▪ Pira ka bulan an pagin magurang ni Juan kan Jesus?

▪ Ano an mga nahitabo han ikawalo ka adlaw tikang nga natawo hi Juan?

▪ Paonan-o naghatag hin atensyon an Dios ha iya katawohan?

▪ Ano an igintagna nga pagbubuhaton ni Juan?