Kapitulo 33

Natuman an Tagna ni Isaias

HAN hinbaroan ni Jesus nga an mga Pariseo ngan an mga membro han partido ni Herodes nagplano pagpatay ha iya, kinadto hiya ngan an iya mga disipulo ha Dagat han Galilea. Damu gud nga tawo an kinadto ha iya tikang ha bug-os nga Palestina ngan may tikang pa ngani ha mga lugar nga diri na sakop hito. Damu an iya gintambal, salit ginsusuok hiya han ngatanan nga may grabe nga sakit basi makakapot ha iya.

Damu gud an tawo, salit ginsidngan ni Jesus an iya mga disipulo nga mag-andam pirme hin baluto nga iya magagamit. Kon apartado hiya ha baybay, diri hiya maiipit han mga tawo. Puydi hiya magtutdo ha ira tikang ha baluto o magbiyahe ha iba nga lugar ha ligid han baybayon basi mabuligan an mga tawo didto.

An disipulo nga hi Mateo nagsiring nga an buruhaton ni Jesus katumanan han “tagna pinaagi kan propeta Isaias.” Katapos ginkotar ni Mateo an natuman nga tagna mahitungod kan Jesus:

“Ini an akon surugoon nga akon ginpili, nga akon hinigugma ngan nalilipayan han akon kalag! Ibubutang ko ha iya an akon espiritu, ngan ipapakita niya ha mga nasud an totoo nga hustisya. Diri hiya makikig-away o masinggit, ngan an iya tingog diri mababatian ha mga kalye. Diri hiya magbabari hin rumok nga tangbo, ngan diri hiya magpaparong hin pabilo nga tikaparong na, tubtob nga malampuson nga maipadapat niya an hustisya. Oo, ha iya ngaran maglalaom an mga nasud.”

Hi Jesus an hinigugma nga surugoon nga nalilipayan han Dios. Iginpakita niya kon ano an totoo nga hustisya, nga natabonan han sayop nga mga tradisyon han relihiyon. Tungod han sayop nga pag-aplikar han mga Pariseo ha balaud han Dios, diri man la hira nabulig ha may sakit kon Sabbath! Basi ipakita an hustisya han Dios, ginbuligan ni Jesus an mga tawo nga nabubug-atan han sayop nga mga tradisyon, salit gin-ikaparatay hiya han mga lider han relihiyon.

Ano an iginpapasabot han ‘diri hiya makikig-away o masinggit basi mabatian ha mga kalye’? Kon may mga gintatambal hi Jesus, ‘iya ginsisidngan hira nga diri gud magsumat ha iba mahitungod ha iya.’ Diri niya karuyag nga igbandilyo hiya ha mga kalye o mabag-o an mga sumat tungod ha pagpasa-pasa.

Iginsusumat liwat ni Jesus an iya nakakaliaw nga mensahe ha mga tawo nga pariho hin rumok nga tangbo nga ginbari ngan gintamak-tamakan. Pariho hira hin pabilo nga tikaparong na, nga an ultimo nga idlap haros mamatay na. Diri niya ginbabari an rumok nga tangbo o ginpaparong an nag-uuroidlap ngan nag-aaso pa nga pabilo. Kondi mapinairon ngan mahigugmaon nga ginliliaw niya an mga maaghop. Oo, makakalaom kan Jesus an mga nasud! Mateo 12:15-21; Marcos 3:7-12; Isaias 42:1-4.

▪ Bisan kon diri nakikig-away o nasinggit ha mga kalye, paonan-o iginpakita ni Jesus kon ano an totoo nga hustisya?

▪ Hin-o an pariho hin rumok nga tangbo ngan tikaparong na nga pabilo, ngan ano an pagtratar ha ira ni Jesus?