Kapitulo 27

Pag-imbitar kan Mateo

WARAY pag-iha katapos tambalon ni Jesus an paralisado, ginawas hiya ha Capernaum ngan kinadto ha Dagat han Galilea. Dinaop na liwat ha iya an damu nga tawo, ngan gintutdoan niya hira. Samtang naglalakat hiya, nakita niya hi Mateo nga gintatawag liwat nga Levi, nga nalingkod ha opisina para han pagbuhis. Gin-imbitar hiya ni Jesus: “Sunod ha akon.”

Posible nga pamilyar na hi Mateo ha mga katutdoan ni Jesus, pariho kanda Pedro, Andres, Santiago, ngan Juan han gin-imbitar hira. Sugad ha ira, ginkarawat dayon ni Mateo an imbitasyon. Binuhat hiya, ginbayaan an iya mga responsabilidad sugad nga parasukot han buhis, ngan sinunod kan Jesus.

Katapos, nag-andam hi Mateo hin daku nga panagtawo ha iya balay, posible nga basi iselebrar an pag-imbitar ha iya. Labot kan Jesus ngan han iya mga disipulo, nakadto liwat an mga kaupod-upod hadto ni Mateo. Ginmiminos hira han ira mga igkasi-Judio kay nangungolekta hira hin buhis para ha mga magmarando han Roma nga ira nasisinahan. Agsob liwat nga sobra kay ha regular nga buhis an ginsusukot nira ha mga tawo.

Pakakita han mga Pariseo nga kaupod ni Jesus ito nga mga tawo, nagsiring hira ha iya mga disipulo: “Kay ano nga an iyo magturutdo nakikig-upod ha pangaon ha mga parasukot hin buhis ngan magpakasasala?” Pakabati hito ni Jesus, nagsiring hiya ha mga Pariseo: “An mahimsog diri nanginginahanglan hin doktor, kondi an may sakit. Salit lakat kamo ngan sabota an kahulogan hini: ‘Karuyag ko an kalooy, diri an halad.’ Kay kinanhi ako, diri para ha magtadong, kondi para ha magpakasasala.”

Gin-imbitar ni Mateo ha iya balay an mga parasukot hin buhis basi makapamati hira kan Jesus ngan matambal ha espirituwal. Salit nakig-upod hi Jesus ha ira basi buligan hira nga magkaada maopay nga relasyon ha Dios. Diri ginmiminos ni Jesus an sugad nga mga tawo, diri pariho ha ginbubuhat han nagpapakamatadong nga mga Pariseo. Lugod pinaid hiya ha ira salit sugad hiya hin espirituwal nga doktor.

An pagpakita ni Jesus hin kalooy ha magpakasasala diri pagkonsinter han ira mga sala, kondi pariho ito ha gugma nga iya iginpakita ha mga may sakit. Pananglitan, hinumdumi han mapinairon nga ginkaptan niya an may liprosi ngan ginsidngan: “Karuyag ko nga matambal ka.” Hinaot kita liwat magpakita hin kalooy pinaagi ha pagbulig ha mga nanginginahanglan, labi na ha pagbulig ha ira ha espirituwal. Mateo 8:3; 9:9-13; Marcos 2:13-17; Lucas 5:27-32.

▪ Nakain hi Mateo han nakita hiya ni Jesus?

▪ Ano an trabaho ni Mateo, ngan kay ano nga an sugad nga mga tawo ginmiminos han iba nga Judio?

▪ Ano an iginreklamo mahitungod kan Jesus, ngan ano an iya baton?

▪ Kay ano nga nakig-upod hi Jesus ha mga magpakasasala?