Kapitulo 26

Pag-uli ha Capernaum

NAHIBANTOG na hi Jesus ha bisan diin, ngan damu nga tawo an napakadto ha turuyoon nga mga lugar nga ginkakadtoan ni Jesus. Pero paglabay hin pipira ka adlaw binalik hiya ha Capernaum hirani ha Dagat han Galilea. Hinbaroan dayon han mga tawo ha syudad nga inuli na hiya, ngan damu an kinadto ha balay nga iya inuukyan. Kinadto liwat an mga Pariseo ngan mga magturutdo han Balaud nga tikang pa ha Jerusalem.

Damu nga tawo an nagsusuruok ha may purtahan, ngan waray na lugar ha sulod. Makikita na han ngatanan an urusahon nga hitabo. Importante gud an nahitabo hito nga okasyon kay nabulig ito ha aton nga maapresyar nga hi Jesus may gahum nga wad-on an hinungdan han pag-antos han katawohan ngan igpahiuli an kahimsog han ngatanan nga iya pinili.

Samtang nagtututdo hi Jesus ha mga tawo, gindara han upat nga lalaki an paralisado nga nahigda ha tiheras. Karuyag nira nga tambalon ni Jesus an ira sangkay, pero diri hira nakakasulod kay damu an tawo. Makapaluya gud ito! Pero waray hira mawad-i hin paglaom. Sinaka hira ha patag nga atop, ginbuhoan ito, ngan iginturos ha atubangan ni Jesus an tiheras nga hinihigdaan han paralisado.

Nasina ba hi Jesus ha ira ginbuhat? Waray! Lugod, naapresyar niya an ira pagpakita hin pagtoo. Nagsiring hiya ha paralisado: “Ginpasaylo na an imo mga sala.” Pero mapapasaylo gud ba ni Jesus an mga sala? Ha opinyon han mga eskriba ngan mga Pariseo, diri. Nangatadongan hira ha ira kasingkasing: “Kay ano nga sugad hini magyakan ini nga tawo? Nagpapasipara hiya. Hin-o an makakapasaylo han mga sala labot la han Dios?”

Tungod kay maaram hi Jesus han ira ginhuhunahuna, nagsiring hiya: “Kay ano nga nangangatadongan kamo hin sugad hito ha iyo kasingkasing? Ano an mas masayon, an pagsiring ha paralisado, ‘Ginpasaylo na an imo mga sala,’ o an pagsiring, ‘Buhát, dad-a an imo tiheras ngan lakat’?”

Katapos, ginpakita ni Jesus ha mga tawo, pati ha mga nakontra ha iya, nga may awtoridad hiya ha pagpasaylo ha mga sala ngan hiya gud an pinakabantogan nga tawo nga nabuhi. Salit ginsidngan niya an paralisado: “Buhát, dad-a an imo tiheras ngan uli ha iyo balay.” Binuhát dayon hiya, gindara an iya tiheras ngan naglakat tipagawas ha atubangan nira ngatanan! Nahipausa gud an mga tawo salit gindayaw nira an Dios ngan nagsiring: “Waray pa gud kami makakita hin sugad hini”!

Naobserbaran mo ba an gin-unabi ni Jesus nga an mga sala may koneksyon ha sakit, ngan an pagpasaylo han mga sala may koneksyon ha pagkaada maopay nga kahimsog? Iginsasaysay han Biblia nga nakasala an aton siyahan nga kag-anak nga hi Adan, salit naipasa ha aton an sakit ngan kamatayon sugad nga epekto. Kondi ha pagmando han Ginhadian han Dios, papasayloon ni Jesus an mga sala han ngatanan nga nahigugma ngan nagsisingba ha Dios, ngan wawad-on na an ngatanan nga sakit. Makalilipay gud ito! Marcos 2:1-12; Lucas 5:17-26; Mateo 9:1-8; Roma 5:12, 17-19.

▪ Ano an kahimtang han nagkaada urusahon gud nga hitabo?

▪ Paonan-o nakakadto kan Jesus an paralisado?

▪ Kay ano nga makasasala kita ngatanan? Paonan-o naghatag hi Jesus hin paglaom nga posible mapasaylo an aton mga sala ngan magkaada perpekto nga kahimsog?