Kapitulo 10

Pagbiyahe Ngadto ha Jerusalem

KATSARINGSING na, ngan panahon na para ha tinuig nga pagbiyahe han pamilya ni Jose, upod an ira kasangkayan ngan mga paryente, ngadto ha Jerusalem ha pagselebrar han Paskua. Mga 100 ka kilometro ito nga biyahe, ngan syempre malipayon gud hira. Hi Jesus 12 anyos na, ngan ginpapamulat gud niya ito nga piyesta.

Para kan Jesus ngan ha iya pamilya, an Paskua diri la usa ka adlaw nga piyesta. Nagpapabilin hira didto hin pito pa ka adlaw para ha Piyesta han Tinapay nga Waray Libadura, nga para ha ira bahin pa han piyesta han Paskua. Salit an ira bug-os nga biyahe tikang ha ira balay ha Nazaret, upod na an ira pagpabilin ha Jerusalem, naabot hin mga duha ka semana. Pero hini nga tuig mas nag-iha hira tungod kan Jesus.

Nahibaro hira Jose ngan Maria nga may problema han tipauli na hira tikang ha Jerusalem. Kahuna nira nga aadto hi Jesus ha grupo han ira mga paryente ngan kasangkayan nga kaupod nira ha biyahe. Pero waray nira hiya makita han mapahuway na hira ha gab-i, salit ira ginbiniling hiya ha ira mga kaupod. Waray gud nira hiya makit-i. Salit binalik hira Jose ngan Maria ha Jerusalem basi pamilngon hiya.

Bug-os nga adlaw hira nagbiniling pero waray nira hiya hikit-i tubtob han sunod nga adlaw. Han ikatulo ka adlaw, kinadto na hira ha templo. Didto, ha usa han mga katirokan, nakita nira hi Jesus nga nalingkod ha butnga han mga Judio nga magturutdo, namamati ha ira ngan nagpapakiana.

“Anak, kay ano nga ginbuhat mo ini ha amon?” nagpakiana hi Maria. “Nabaraka gud kami ni imo tatay ngan nagpinamiling kami ha imo.”

Napausa hi Jesus nga diri hira maaram kon hain hiya. Nagpakiana hiya: “Kay ano nga iyo ako ginbiniling? Diri ba kamo maaram nga kinahanglan aanhi ako ha balay han akon Amay?”

Diri masabtan ni Jesus kon kay ano nga diri maaram hini an iya mga kag-anak. Katapos, inupod hi Jesus ha ira tipauli ngan padayon nga nagpasakop ha ira. Nagtubo hiya ngan nag-uswag an kinaadman, ngan nalipayan gud han Dios ngan han mga tawo. Oo, tikang ha kabata, nagpakita hi Jesus hin maopay nga susbaranan diri la ha pag-una han espirituwal nga mga butang kondi ha pagrespeto liwat ha iya mga kag-anak. Lucas 2:40-52; 22:7.

▪ Ano nga biyahe ha katsaringsing an regular nga ginhihimo ni Jesus upod han iya pamilya, ngan mationan-o ito kaiha?

▪ Ano an nahitabo ha ira pagbiyahe han 12 anyos hi Jesus?

▪ Ano nga susbaranan an iginpakita ni Jesus para ha mga batan-on yana?