Kapitulo 25

Pagpaid ha May Liprosi

HAN hi Jesus ngan an iya upat nga disipulo nagsasangyaw ha mga syudad han Galilea, nahibantog ha bug-os nga distrito an iya urusahon nga mga ginbuhat. Nakaabot ito ha syudad diin naukoy an lalaki nga may liprosi. Sumala ha doktor nga hi Lucas, “grabe an liprosi” hito nga lalaki. Kon grabe na inin makangingirhat nga sakit, hinay-hinay nga gindadaot hito an iba-iba nga bahin han lawas. Salit makalolooy gud ito nga may liprosi.

Han inabot hi Jesus hito nga syudad, dinaop ha iya an may liprosi. Uyon ha Balaud han Dios, an may liprosi kinahanglan gumuliat, “Mahugaw, mahugaw”! sugad nga pahamangno basi waray dumaop ha iya ngan waray mataponan. Pero hinapa an may liprosi ngan nakimalooy kan Jesus: “Ginoo, kon karuyag mo, matatambal mo ako.”

Daku gud an pagtoo hito nga tawo kan Jesus! Tungod han iya sakit, makalolooy hiya pagkit-on! Ano an bubuhaton ni Jesus? Ikaw, ano an imo bubuhaton? Pinaid hi Jesus salit ginkaptan niya an lalaki ngan ginsidngan: “Karuyag ko nga matambal ka.” Salit nawara dayon an iya liprosi.

Karuyag mo ba nga magin hadi an sugad kamapinairon nga tawo? An pagtratar ni Jesus ha may liprosi nagpapasarig ha aton nga durante han Iya pagmando ha Ginhadian, matutuman ini nga tagna han Biblia: “Malolooy hiya ha mga kablasanon ngan makinurion, ngan an mga kalag han mga makinurion iya pagluluwason.” Oo, hito nga panahon bubuhaton ni Jesus an iya hingyap nga buligan an ngatanan nga nagsasakit.

Bisan han waray pa tambala ni Jesus an may liprosi, an iya ministeryo naghahatag na hin daku nga kalipay ha mga tawo. Sugad nga katumanan han tagna ni Isaias, gintugon ni Jesus an nag-opay na nga lalaki: “Ayaw gud pagsumat ha bisan hin-o.” Katapos iya ginsidngan: “Kadto lugod ha saserdote ngan paghalad sumala ha iginsugo ha balaud ni Moises sugad nga pamatuod ha ira nga nag-opay ka.”

Pero tungod han daku nga kalipay han lalaki, waray hiya pakailob nga diri ipanumat an milagro. Ginpinanumat niya ito ha bisan diin, salit hi Jesus waray na makasulod hin dayag ha syudad kay posible nga nagkarigumok an mga tawo kay karuyag nira manginsayod hito. Salit didto na la hiya ha mamingaw nga mga lugar nga waray naukoy, ngan an mga tawo tikang ha iba-iba nga lugar napakadto basi mamati ha iya ngan magpatambal han ira mga sakit. Lucas 5:12-16; Marcos 1:40-45; Mateo 8:2-4; Lebitiko 13:45; 14:10-13; Salmo 72:13; Isaias 42:1, 2.

▪ Ano an epekto han liprosi, ngan ano an iginpapahamangno han may liprosi?

▪ Paonan-o nakimalooy kan Jesus an may liprosi? Ano an mahibabaroan naton ha reaksyon ni Jesus?

▪ Kay ano nga waray mamati kan Jesus an lalaki nga nag-opay na, ngan ano an mga resulta hito?