Kapitulo 8

Pagpalagiw ha Mapintas nga Hadi

GINPUKAW ni Jose hi Maria kay may importante hiya nga isusumat. Nagpakita pa la ha iya an anghel ni Jehova nga nasiring: “Buhát, dad-a an bata ngan an imo asawa ngadto ha Ehipto. Ngan didto la anay kamo tubtob nga sidngan ko kamo nga bumalik, kay ginbibiling ni Herodes an bata basi patayon.”

Pinalagiw dayon hira nga tulo. Igo la ito kay nahibaroan ni Herodes nga ginlimbongan hiya han mga astrologo kay umuli na hira. Hinumdumi nga sadang unta hira bumalik basi isumat ha iya kon mabilngan nira hi Jesus. Nasina gud hi Herodes. Salit ha iya pangalimbasog nga patayon hi Jesus, nagsugo hiya nga pamatayon an ngatanan nga bata nga lalaki ha Betlehem ngan ha mga distrito hito, nga dos anyos tipaubos. Iginbasar niya ito nga karkulasyon ha impormasyon nga nahibaroan niya ha mga astrologo nga tikang ha Este.

Makangingirhat gud kitaon an pamatay ha ngatanan nga bata nga lalaki! Nasulod an mga sundalo ni Herodes ha kada balay. Ngan kon may makit-an hira nga bata nga lalaki, gin-aagaw nira ito ha nagkukugos nga nanay. Diri kita maaram kon pira an ira ginpamatay, kondi tungod han duro nga panangis ngan pannguyngoy han mga nanay, natuman an tagna ha Biblia pinaagi han propeta han Dios nga hi Jeremias.

Ha luyo nga bahin, talwas nga inabot ha Ehipto an pamilya ni Jose, ngan inukoy hira didto. Kondi usa ka gab-i, nagpakita utro kan Jose an anghel ni Jehova pinaagi hin inop, nga nasiring: “Buhát, dad-a an bata ngan an imo asawa ngadto ha Israel, kay patay na an mga nangangalimbasog pagpatay han bata.” Salit han binalik an pamilya ha ira natawhan nga tuna, natuman an usa pa nga tagna ha Biblia nga nasiring nga an Anak han Dios tatawagon tikang ha Ehipto.

Karuyag unta ni Jose nga umukoy ha Judea, ha bungto ha Betlehem nga ira gin-ukyan hadto antes hira pumalagiw ngadto ha Ehipto. Kondi nahibaro hiya nga an maraot nga anak ni Herodes nga hi Arquelao amo na an hadi ha Judea, ngan pinaagi hin usa pa nga inop ginpahamangnoan hiya ni Jehova han peligro. Salit hi Jose ngan an iya pamilya nagbiyahe tipanorte ngan inukoy hira ha bungto han Nazaret ha Galilea. Didto nagtubo hi Jesus hito nga bungto, nga hirayo ha sentro han buruhaton ha relihiyon han mga Judio. Mateo 2:13-23; Jeremias 31:15; Hosea 11:1.

▪ Han waray bumalik an mga astrologo, ano an makangingirhat nga ginbuhat ni Hadi Herodes, pero paonan-o napanalipdan hi Jesus?

▪ Pagbalik nira Jose tikang ha Ehipto, kay ano nga waray hira umukoy utro ha Betlehem?

▪ Ano nga mga tagna ha Biblia an natuman hito nga panahon?