Kapitulo 85

Pagpamiling ha Nawara

DETERMINADO gud hi Jesus nga pamilngon ngan maagian an mga mapainubsanon nga mag-aalagad ha Dios. Salit nagpinamiling hiya ngan nakiistorya ha ngatanan mahitungod han Ginhadian, pati na ha kilala nga magpakasasala. Yana an sugad hito nga mga tawo dinaop ha iya basi mamati.

Han nakita han mga Pariseo ngan mga eskriba nga nakikig-upod hi Jesus ha mga tawo nga gintatagad nira nga waray pulos, ginpakaraot nira hiya. Nagsiring hira: “Gin-aabiabi hini nga tawo an magpakasasala ngan nakaon hiya upod nira.” Para ha mga Pariseo ngan mga eskriba, nakakaminos gud ito hin dignidad! Gintatratar nira an ordinaryo nga mga tawo sugad hin tapotapo ha ira mga tiil. Ha pagkamatuod, gin-gagamit nira an Hebreo nga pulong nga ‛am ha·’ aʹrets, o “mga tawo han tuna,” basi ipakita nga nangingil-aran hira ha sugad nga mga tawo.

Ha luyo nga bahin, may dignidad an pagtratar ni Jesus ha kada tagsa, buotan ngan napaid hiya ha ira. Salit damu hinin ubos nga mga tawo, pati na an kilala nga magpakasasala, an naruruyag gud mamati ha iya. Pero ano an iya reaksyon ha pakaraot han mga Pariseo han ginbuligan niya an gintatagad nira nga mga waray pulos?

Ginbaton ni Jesus pinaagi hin ilustrasyon an ira pagkontra. Nagyakan hiya uyon ha opinyon han mga Pariseo, nga baga hin matadong hira ngan talwas ha toril han Dios, samtang an waray pulos nga mga ‛am ha·’aʹrets nagpapatlaag ngan nagkawawara.

Nagpakiana hiya: “Kon an bisan hin-o ha iyo nga may 100 nga karnero mawad-an hin usa, diri ba babayaan niya an 99 ha kamingawan ngan bibilngon ito tubtob nga hiagian? Ngan kon hiagian niya ito, papas-anon niya ito ngan maglilipay. Pag-uli niya, tatawagon niya an iya kasangkayan ngan mga amyaw ngan masiring ha ira, ‘Pagkalipay kita, kay hin-agian ko na an akon karnero nga nawara.’”

Katapos, iginsaysay ni Jesus an aplikasyon hito nga ilustrasyon: “Susumatan ko kamo, mas daku an kalipay ha langit tungod ha usa nga makasasala nga nagbabasol kay ha 99 nga matadong nga diri kinahanglan magbasol.”

Naghuhunahuna an mga Pariseo nga matadong hira salit waray hira angay pagbasolan. Han ginpakaraot hi Jesus han iba ha ira mga duha ka tuig na an naglabay tungod kay kumaon hiya upod han mga parasukot hin buhis ngan magpakasasala, iya ginsidngan hira: “Kinanhi ako, diri para ha magtadong, kondi para ha magpakasasala.” An nagpapakamatadong nga mga Pariseo nga diri naabat nga angay hira magbasol, diri nakakahatag hin kalipay ha langit. Pero nakakalipay an magpakasasala nga totoo nga nagbabasol.

Basi mas pabug-atan nga an pagbalik han nawara nga magpakasasala naghahatag hin daku nga kalipay, nagsaysay hi Jesus hin usa pa nga ilustrasyon: “Kon an usa nga babaye nga may 10 ka drakma nga sinselyo mawad-an hin usa, diri ba magdadagkot hiya hin lampara ngan maninilhig ha balay ngan pamimilngon ito hin maopay tubtob nga hiagian? Ngan kon hiagian niya ito, tatawagon niya an iya kasangkayan nga kababayin-an ngan mga amyaw. Masiring hiya, ‘Pagkalipay kita, kay hin-agian ko na an akon drakma nga sinselyo nga nawara.’”

Katapos, nagsaysay hi Jesus hin pariho nga aplikasyon: “Susumatan ko kamo, nagkakalipay an mga anghel han Dios tungod ha usa nga makasasala nga nagbabasol.”

Makatirigamnan gud ito nga mahigugmaon nga pagtagad han mga anghel ha pagbalik han nawara nga magpakasasala! Labi na kay iton gintatagad hadto nga mga ubos ngan ginkakangil-aran nga mga ‛am ha·’aʹrets ha urhi nagin bahin han Ginhadian han Dios ha langit. Nakakarawat hira hin mas hitaas nga katungdanan ha langit kay ha mga anghel! Pero imbes nga maawa o mainsulto, mapainubsanon nga nasasabtan han mga anghel nga inin magpakasasala nga mga tawo inatubang ngan naglampos ha mga kahimtang ha kinabuhi nga mabulig ha ira nga magin mapinairon ngan maloloy-on nga mga hadi ngan saserdote ha langit. Lucas 15:1-10; Mateo 9:13; 1 Corinto 6:2, 3; Pahayag 20:6.

▪ Kay ano nga nakig-upod hi Jesus ha kilala nga magpakasasala? Ano an pakaraot ha iya han mga Pariseo tungod hito?

▪ Ano an pagtagad han mga Pariseo ha ordinaryo nga mga tawo?

▪ Ano nga mga ilustrasyon an iginsaysay ni Jesus? Ano an aton mahibabaroan tikang hito?

▪ Kay ano nga makatirigamnan an pagkalipay han mga anghel?