Kapitulo 50

Pagpangandam ha Pagtimaraot

KATAPOS tagan ni Jesus hin instruksyon an mga disipulo ha pagsangyaw, ginpahamangnoan niya hira mahitungod han mga parakontra. Nagsiring hiya: “Kitaa! Sugad kamo hin mga karnero nga ginsusugo ko ngadto ha butnga han mga lobo . . . Pag-ikmat kamo ha mga tawo kay dadad-on kamo nira ha mga korte, ngan lalatiguhon kamo ha ira mga sinagoga. Oo, dadad-on kamo ha mga gobernador ngan mga hadi tungod ha akon.”

Bisan pa kon duro nga pagtitimarauton an iya mga sumurunod, nagsaad hi Jesus: “Kon dad-on kamo, ayaw kamo kabaraka kon paonan-o kamo magyayakan o kon ano an iyo igsisiring, kay hibabaroan niyo an iyo yayaknon hito nga takna, kay diri kamo an nagyayakan, kondi an espiritu han iyo Amay an nagyayakan pinaagi ha iyo.”

“Dugang pa,” siring ni Jesus, “itutubyan han bugto ha kamatayon an iya bugto, ngan han amay an iya anak, ngan kukontrahon han mga anak an ira mga kag-anak ngan ipapapatay hira.” Nagsiring pa hiya: “Mapupungot ha iyo an ngatanan nga tawo tungod ha akon ngaran, pero an magpailob tubtob ha kataposan amo an matatalwas.”

An pagsangyaw amo an pinakaimportante. Salit ginpabug-atan ni Jesus nga kinahanglan magin maaramon basi makapadayon ha buruhaton. “Kon pagtimarauton kamo ha usa nga syudad, pakadto kamo ha iba nga lugar,” siring niya, “kay ha pagkamatuod, susumatan ko kamo: Diri niyo malilibot an ngatanan nga syudad ha Israel tubtob nga umabot an Anak han tawo.”

Hi Jesus naghatag hin instruksyon, pahamangno, ngan pagparig-on ha 12 nga apostol, pero para liwat ito ha makikigbahin ha bug-os kalibotan nga pagsangyaw katapos han iya kamatayon ngan pagkabanhaw. Masasabtan ini ha iya ginsiring nga ‘mapupungot an ngatanan nga tawo’ ha iya mga disipulo, diri la an mga Israelita nga ginpasangyawan ha mga apostol. Dugang pa, ha halipot nga panahon han pagsangyaw han mga apostol, nga iginsugo ni Jesus, waray hira dad-a ha mga gobernador ngan mga hadi. Waray liwat mga tumuroo hadto nga iginpapatay han ira mga kapamilya.

Nagsiring hiya nga diri matatapos han mga disipulo an paglibot ha pagsangyaw “tubtob nga umabot an Anak han tawo.” Dinhi, igintatagna niya nga diri pa matatapos han iya mga disipulo an paglibot ha inuukyan nga tuna ha pagsangyaw han naestablisar nga Ginhadian han Dios, maabot na an ginhimaya nga Hadi nga hi Jesu-Kristo nga magpapadapat han paghukom ni Jehova ha Armagedon.

Naghatag pa hi Jesus hin instruksyon ha pagsangyaw: “An disipulo diri labaw ha iya magturutdo, o an uripon diri labaw ha iya agaron.” Salit an iya mga sumurunod mamaltratuhon ngan pakakarauton liwat pariho ha iya tungod ha pagsangyaw han Ginhadian han Dios. Pero nagpahamangno hiya: “Ayaw kamo kahadlok ha nakakamatay han lawas kondi diri nakakamatay han kalag; lugod, mahadlok kamo ha iya nga nakakabungkag han kalag ngan han lawas ha Gehenna.”

Hi Jesus an magpapakita hin susbaranan hini nga bahin. Waray kahadlok nga aantuson niya an kamatayon imbes nga ikompromiso an iya pagkamaunungon kan Jehova nga Dios, an makagarahum ha ngatanan. Oo, hi Jehova an nakakabungkag han “kalag” han tawo (an paglaom nga kinabuhi ha tidaraon sugad nga tawo), o an nakakabanhaw ha tawo basi mabuhi ha waray kataposan. Mahigugmaon ngan maloloy-on gud nga Amay hi Jehova!

Katapos, ginparig-on ni Jesus an mga disipulo pinaagi hin ilustrasyon nga nagpapabug-at han mahigugmaon nga pagmangno ni Jehova ha ira. “An duha nga maya iginbabaligya ha gutiay gud nga kantidad hin sinselyo, diri ba?” nagpakiana hiya. “Pero waray usa hito an nahuhulog ha tuna nga diri hinbabaroan han iyo Amay. Maaram hiya bisan han kadamu han iyo buhok ha ulo. Salit ayaw kahadlok: Mas importante kamo kay ha damu nga maya.”

An mensahe han Ginhadian nga iginpapasangyaw ni Jesus ha mga disipulo magbabahin-bahin ha mga pamilya, kay an iba nga membro nakarawat hito ngan an iba diri. Nagsiring hiya: “Ayaw kamo paghunahuna nga kinanhi ako pagdara hin kamurayawan ha tuna; kinanhi ako diri pagdara hin kamurayawan, kondi hin espada.” Salit kinahanglan nga may kaisog an usa nga membro han pamilya kon kakarawaton niya an kamatuoran ha Biblia. “An mas nagpapalangga ha amay o iroy kay ha akon diri takos ha akon,” siring ni Jesus, “ngan an mas nagpapalangga ha anak nga lalaki o anak nga babaye kay ha akon diri takos ha akon.”

Gintapos ni Jesus an iya mga instruksyon pinaagi ha pag-esplikar nga an nakarawat ha iya mga disipulo, nakarawat liwat ha iya. “Ngan an nahatag hin bisan usa la ka baso hin matugnaw nga tubig ha usa hini nga gudtiay tungod kay disipulo ko hiya, susumatan ko kamo: Diri gud hiya mawawad-an hin balos.” Mateo 10:16-42.

▪ Ano an pahamangno ni Jesus ha iya mga disipulo?

▪ Paonan-o hira ginparig-on ngan ginliaw ni Jesus?

▪ Kay ano nga an mga instruksyon ni Jesus para liwat ha mga Kristiano yana?

▪ Kay ano nga an disipulo diri labaw ha magturutdo?