Kapitulo 118

Pagtraydor Ngan Pag-aresto

LAHOS na ha katutnga han gab-i han igin-upod ni Judas ngadto ha hardin han Getsemani an daku nga grupo han mga sundalo, punoan nga mga saserdote, mga Pariseo, ngan iba pa. Nagkauruyon an mga saserdote nga baydan hiya hin 30 nga silber nga sinselyo para ha pagtraydor kan Jesus.

Han binaya hi Judas ha panihapon han Paskua, kinadto dayon hiya ha punoan nga mga saserdote. Madagmit nga gintirok nira an ira mga opisyal, pati an usa ka grupo han kasundalohan. Posible nga gindara anay hira ni Judas ha balay diin nagsaurog han Paskua hi Jesus ngan an mga apostol. Pero binaya na hira, salit an damu nga tawo nga may dara nga mga armas, mga lampara, ngan mga sulô sinunod kan Judas ha paggawas ha Jerusalem ngan ha paglatas ha Walog han Kidron.

Samtang ginpapangunahan ni Judas an damu nga tawo pagsagka ngadto ha Bukid han mga Olibo, sigurado hiya kon diin makikita hi Jesus. Han naglabay nga semana, han hi Jesus ngan an mga apostol nagbalik-balik ha Betania ngan Jerusalem, agsob nga nahapit hira ha hardin han Getsemani basi pumahuway ngan mag-iristorya. Pero yana nga hi Jesus posible nga diri nakikita ha kasisidman ha ilarom han mga kahoy nga olibo, paonan-o hiya makikilala han mga sundalo? Bangin waray pa nira hiya makita. Salit naghatag ha ira hin tigaman hi Judas, nga nasiring: “An akon harokan, amo ito hiya; arestoha niyo hiya ngan dad-a nga gwardyado hin maopay.”

Nag-uuna hi Judas ha damu nga tawo ngadto ha hardin; didto nakita niya hi Jesus ngan an mga apostol, ngan diniretso hiya pagdaop ha iya. “Maopay nga gab-i, Rabbi!” siring niya ngan ginharokan hiya.

“Kay ano nga aanhi ka?” nasisina nga nagpakiana hi Jesus. Katapos, ginbaton niya an iya kalugaringon nga pakiana: “Judas, gintatraydoran mo ba an Anak han tawo pinaagi hin harok?” Pero sobra na ini nga traydor! Naglakat hi Jesus hin pipira ka pitad tipaunhan basi malamragan han naglalaga nga mga sulô ngan mga lampara, ngan nagpakiana: “Hin-o an iyo ginbibiling?”

Binaton hira: “Hi Jesus nga Nazareno.”

“Ako an iyo ginbibiling,” binaton hiya, samtang waray kahadlok nga natindog ha atubangan nira ngatanan. Nahipausa gud hira han iya kaisog ngan diri hira maaram kon ano an mahitatabo, salit inatras hira ngan nagkatutumba.

“Ginsidngan ko na kamo nga ako an iyo ginbibiling,” kalmado nga nagsiring hi Jesus. “Salit kon ako an iyo ginbibiling, palakta hira.” Antes hini, han nakadto hira ha kwarto ha igbaw, gin-unabi ni Jesus han nag-ampo hiya ha Amay nga iya ginhirotan hira ngan waray bisan usa ha ira nga nawara “labot la han anak han kabungkagan.” Salit naghangyo hiya nga palakton an iya mga sumurunod basi matuman an iya ginsiring.

Han naulian na an mga sundalo, nanindog hira, ngan gin-gapos hi Jesus. Nasabtan han mga apostol an mahitatabo salit nagpakiana hira: “Ginoo, maninigbas ba kami pinaagi hin espada?” Waray pa pakakabaton hi Jesus, gintigbas na ni Pedro hi Malco, an uripon han hitaas nga saserdote, gamit an usa han duha nga espada nga ira dara. Waray maigo ni Pedro an ulo han uripon pero napalong an too nga talinga niya.

“Husto na,” ginsaway hiya ni Jesus. Han ginkaptan niya an talinga ni Malco, natambal an samad. Katapos, nagtutdo hiya hin importante nga leksyon han ginsugo niya hi Pedro: “Itakob an imo espada kay an ngatanan nga nagamit hin espada, mamamatay pinaagi hin espada. Naghuhunahuna ka ba nga diri ako makakahangyo ha akon Amay nga padad-an ako yana hin sobra 12 ka lehiyon nga anghel?”

Andam hi Jesus magpaaresto, kay nagsiring hiya: “Paonan-o matutuman an Kasuratan nga kinahanglan mahitabo ini ha sugad nga paagi?” Nagpadayon hiya: “Diri gud ba ako mainom ha kopa nga iginhatag ha akon han Amay?” Nauyon gud hiya ha kaburut-on han Dios para ha iya!

Katapos nagpakiana hiya ha mga tawo: “Kinanhi ba kamo basi arestuhon ako nga baga hin kawatan, nga nagdara pa kamo hin mga espada ngan mga ibaralbag?” Nagsiring pa hiya: “Kada adlaw nagliliningkod ako ha templo basi magtutdo pero waray ako niyo arestoha. Kondi nahitatabo ini ngatanan basi matuman an ginsurat han mga propeta.”

Hito nga takna, gin-aresto ngan gin-gapos hi Jesus han grupo han kasundalohan, han kumander ha militar ngan han mga opisyal han mga Judio. Han nakita ini han mga apostol, ginbayaan nira hiya ngan namalagiw. Pero may batan-on nga lalaki—posible nga an disipulo nga hi Marcos—nga nag-inupod ha damu nga tawo. Bangin tikang hiya ha balay diin nagsaurog hi Jesus han Paskua, katapos nagsinunod hiya ha mga tawo. Pero yana nakilal-an hiya, ngan nagsari hira pag-aresto ha iya. Kondi nahukasan hiya han iya lino nga bado ngan nakapalagiw. Mateo 26:47-56; Marcos 14:43-52; Lucas 22:47-53; Juan 17:12; 18:3-12.

▪ Kay ano nga sigurado hi Judas nga makikita niya hi Jesus ha hardin han Getsemani?

▪ Paonan-o iginpakita ni Jesus nga nababaraka hiya ha iya mga apostol?

▪ Ano an ginbuhat ni Pedro basi depensahan hi Jesus, pero ano an ginsiring ni Jesus kan Pedro tungod hito?

▪ Paonan-o iginpakita ni Jesus nga nauyon gud hiya ha kaburut-on han Dios para ha iya?

▪ Han ginbayaan hi Jesus han mga apostol, hin-o an nagsinunod, ngan ano an nahitabo ha iya?