Kapitulo 19

Pagtutdo ha Usa nga Samaritana

HAN hi Jesus ngan an iya mga disipulo nagbibiyahe tikang ha Judea pakadto ha Galilea, inagi hira ha distrito han Samaria. Pagkaudto, pinahuway hira ha atabay hirani ha syudad han Sicar kay nakapoy hira pagbinaktas. Ini nga atabay ginhimo ni Jacob mga siglo na an naglabay ngan aada pa ito tubtob yana, hirani ha syudad han Nablus.

Samtang napahuway hi Jesus, an iya mga disipulo kinadto ha syudad basi pumalit hin pagkaon. Han may inalog nga Samaritana, nagsiring hi Jesus: “Alayon, tagi ako hin maiinom.”

Ha kabug-osan, an mga Judio ngan mga Samaritano diri nakikiistorya ha kada tagsa tungod han maiha na nga problema ha diskriminasyon. Salit, tungod ha kahipausa nagpakiana an babaye: “Kay ano nga bisan kon Judio ka naaro ka hin maiinom ha akon nga Samaritana?”

Binaton hi Jesus: “Kon maaram ka la han waray bayad nga regalo han Dios ngan kon hin-o an nasiring ha imo, ‘Alayon, tagi ako hin maiinom,’ maaro ka gud ha iya, ngan tatagan ka niya hin tubig nga buhi.”

Nagsiring an Samaritana: “Mano, waray ka ngani timba ha pagsarok, ngan hilarom an atabay. Salit diin ka man makuha hin tubig nga buhi? Mas maopay ka ba kay ha amon kaapoy-apoyan nga hi Jacob, nga naghatag ha amon hini nga atabay, ngan hiya mismo ininom dinhi pati an iya mga anak ngan kabakahan?”

“An tagsa nga nainom hini nga tubig uuhawon utro,” binaton hi Jesus. “An bisan hin-o nga nainom han tubig nga akon ihahatag diri na gud uuhawon, kay an tubig nga ihahatag ko ha iya magigin pariho hin burabod dida ha iya nga nagbubugwak basi maghatag hin kinabuhi nga waray kataposan.”

An babaye nagsiring: “Mano, tagi ako hito nga tubig, basi diri na ako uhawon ngan diri na magbinalik-balik nganhi ha pag-alog.”

Nagsiring ha iya hi Jesus: “Tawaga an imo bana ngan balik nganhi.”

“Waray ako bana,” binaton an babaye.

Inuyon hito hi Jesus. “Husto an imo ginsiring nga waray ka bana, kay lima an imo nagin bana, ngan an lalaki nga iginkakaupod mo yana diri mo bana.”

“Mano, ha akon pag-abat usa ka nga propeta,” nahipapausa nga nagsiring an babaye. Nakita an iya interes ha espirituwal han nagsiring hiya nga an mga Samaritano “nagsingba dinhi hini nga bukid [ha Gerisim, nga hirani didto], pero nasiring kamo [an mga Judio] nga ha Jerusalem la kinahanglan magsingba an mga tawo.”

Kondi an lugar ha pagsingba diri amo an importante, siring ni Jesus. “Maabot an panahon,” siring niya, “nga an totoo nga mga magsiringba magsisingba ha Amay uyon ha espiritu ngan ha kamatuoran, kay ginbibiling gud han Amay an mga sugad ha ira nga magsisingba ha iya. An Dios Espiritu, ngan an nagsisingba ha iya kinahanglan magsingba uyon ha espiritu ngan ha kamatuoran.”

Bumilib gud an babaye. “Maaram ako nga makanhi an Mesias, nga tinatawag nga Kristo,” siring niya. “Pag-abot niya, dayag nga igsusumat niya ha amon an ngatanan.”

“Ako nga nakikiistorya ha imo amo hiya,” nagpakilala hi Jesus. Hunahunaa la! Ito nga babaye nga naalog kon udto, bangin basi makalikay ha iba nga kababayin-an ha bungto nga nagmiminos ha iya tungod han iya pagkinabuhi, ginpakitaan ni Jesus hin pabor ha espesyal nga paagi. Direkta nga ginsumatan hiya ni Jesus han diri niya dayag nga iginsusumat ha iba. Ano an nagin resulta?

Damu nga Taga-Samaria an Tinoo

Pagbalik han mga disipulo tikang ha Sicar, may dara na hira nga pagkaon, ngan nakita nira hi Jesus nga nakadto la gihapon ha atabay ni Jacob, may kaistorya nga Samaritana. Pag-abot nira, linakat an babaye pero ginbayaan an iya tibod, ngan kinadto ha syudad.

Tungod kay interesado gud ha iginsumat ni Jesus, ginsidngan han babaye an mga tawo ha syudad: “Kadi kamo, kitaa niyo an tawo nga nagsumat ha akon han ngatanan nga akon ginbuhat.” Ngan basi mapukaw an ira interes, nagpakiana hiya: “Posible ba nga hiya an Kristo?” Natuman an iya katuyoan tungod hito nga pakiana—kinadto an mga tawo basi makita an iya ginsiring.

Hito nga oras, ginsinidngan hi Jesus han mga disipulo nga kumaon han ira dara nga pagkaon. Pero nagsiring hiya: “May pagkaon ako nga diri niyo hinbabaroan.”

Salit nag-iristorya an mga disipulo: “Waray iba nga nagdara ha iya hin pagkaon, diri ba?” Nagsiring hi Jesus: “An akon pagkaon amo an pagbuhat han kaburut-on han nagsugo ha akon ngan paghuman han iya buruhaton. Diri ba nasiring kamo nga upat pa ka bulan antes an pag-ani?” Basi ipasabot nga espirituwal nga pag-ani an iya gin-uunabi, nagsiring hiya: “Kitaa niyo an kaumhan, hinog na an aranihon. Nakarawat na han mag-arani an suhol ngan nagtitirok hiya han bunga para ha kinabuhi nga waray kataposan, salit magkakalipay an magsarabwag ngan an mag-arani.”

Posible nga nakikita na ni Jesus an daku nga epekto han iya pakiistorya ha Samaritana kay damu an natoo ha iya tungod ha pamatuod han babaye. Nagpapamatuod an Samaritana ha iya mga kahimungto: “Iya iginsumat ha akon an ngatanan nga akon ginbuhat.” Salit han kinadto kan Jesus ha atabay an mga taga-Sicar, ira ginhawiran hiya basi makiistorya pa ha ira, ngan nagpabilin hiya didto hin duha ka adlaw.

Han nagpipinamati an mga Samaritano kan Jesus, mas damu pa an tinoo. Katapos nagsiring hira ha babaye: “Natoo kami diri tungod han imo ginsiring, kay kami mismo nakabati ngan nahibaro nga ini nga tawo amo gud an paratalwas han kalibotan.” An Samaritana maopay gud nga susbaranan kon paonan-o kita magpapamatuod mahitungod han Kristo pinaagi ha pagpukaw han interes han mga namamati ha aton basi mag-usisa pa hira!

Hinumdumi nga upat pa ka bulan antes an pag-ani—sigurado nga pag-ani ito han sebada nga ginhihimo ha katsaringsing ha Palestina. Salit posible nga nahitabo ito han Nobyembre o Disyembre. Nagpapasabot ito nga katapos han Paskua han 30 C.E., walo ka bulan o sobra pa nga nanutdo ngan nanbawtismo ha Judea hi Jesus ngan an iya mga disipulo. Tiuli na hira yana ha ira lugar ha Galilea. Ano an mahitatabo didto? Juan 4:3-43.

▪ Kay ano nga nahipausa an Samaritana han nakiistorya ha iya hi Jesus?

▪ Ano an igintutdo ha iya ni Jesus mahitungod han tubig nga buhi ngan han lugar ha pagsingba?

▪ Paonan-o hi Jesus nagpakilala ha Samaritana, ngan kay ano nga talagsahon gud ito?

▪ Ano nga pamatuod an ginhimo han Samaritana ngan ano an resulta?

▪ Ano an koneksyon han pagkaon ni Jesus ha pag-ani?

▪ Paonan-o naton hibabaroan an kaihaon han ministeryo ni Jesus ha Judea katapos han Paskua han 30 C.E.?