Kapitulo 65

Patago nga Kinadto ha Jerusalem

KATRAKDAG na han 32 C.E., ngan hirani na an Piyesta han mga Tabernakulo. Ginhimo ni Jesus ha Galilea an kadam-an han iya buruhaton tikang han Paskua han 31 C.E., han gin-ikaparatay hiya han mga Judio. Tikang hadto, posible nga kinadto la hi Jesus ha Jerusalem basi tumambong ha tulo nga piyesta han mga Judio nga ginsiselebrar kada tuig.

Gin-aghat hi Jesus han iya kabugtoan: “Baya dinhi ngan kadto ha Judea.” An Jerusalem amo an kapital nga syudad han Judea ngan sentro han buruhaton ha relihiyon han bug-os nga nasud. Nangatadongan an iya kabugtoan: “An naruruyag makilala han publiko diri nagtatago han iya ginbubuhat.”

Bisan kon diri natoo hira Santiago, Simon, Jose, ngan Judas nga an ira magurang nga hi Jesus amo gud an Mesias, karuyag nira nga maghimo hiya hin mga milagro ha atubangan han ngatanan ha piyesta. Pero maaram hi Jesus han peligro. Nagsiring hiya: “An kalibotan waray rason nga masina ha iyo, pero nasisina ito ha akon, kay nagpapamatuod ako nga maraot an mga buhat hito.” Salit ginsidngan niya an iya kabugtoan: “Kadto kamo ha piyesta; diri pa ako makadto hini nga piyesta.”

An Piyesta han mga Tabernakulo pito ka adlaw nga selebrasyon. Ha ikawalo ka adlaw natatapos ito pinaagi hin sagrado nga mga buruhaton. Nagtitigaman ito nga tapos na an panguma hito nga tuig ngan panahon na han pagkalipay ngan pagpasalamat. Pipira ka adlaw katapos linarga an kabugtoan ni Jesus kaupod han damu nga nagbibiyahe basi tumambong, patago nga kinadto hi Jesus upod an mga disipulo, nga nalikay ha publiko. Ha Samaria hira inagi, imbes nga ha dalan hirani ha Salog Jordan nga agsob agian han kadam-an nga tawo.

Tungod kay kinahanglan ni Jesus ngan han iya mga kaupod hin mauukyan ha usa nga baryo han Samaria, nagsugo hiya hin mga mensahero nga mag-una basi mag-andam. Pero waray maruyag an mga tawo nga asikasuhon hi Jesus han hinbaroan nira nga tikadto hiya ha Jerusalem. Salit nasisina nga nagpakiana hira Santiago ngan Juan: “Ginoo, karuyag mo ba nga magpalusad kami hin kalayo tikang ha langit basi bungkagon hira?” Ginsaway hira ni Jesus, ngan kinadto hira ha iba nga baryo.

Samtang nagbabaktas hira, usa nga eskriba an nagsiring: “Magturutdo, maupod ako ha imo bisan diin ka kumadto.”

Hi Jesus binaton: “An mga garong may mga lungib ngan an katamsihan may mga salag, kondi an Anak han tawo waray kalugaringon nga urukyan nga makakaturogan.” Iginsaysay ni Jesus nga an eskriba makakaeksperyensya hin kakurian kon hiya magin Iya sumurunod. Ngan baga hin iginpapakita hito nga an eskriba diri maruruyag hito nga pagkinabuhi kay mapahitas-on hiya.

Katapos nagsiring hi Jesus ha usa pa nga lalaki: “Sunod ha akon.”

“Tuguti anay ako pag-uli ngan paglubong ha akon tatay,” binaton hiya.

“Pabay-i an mga patay nga maglubong han ira mga patay,” siring ni Jesus, “kondi lakat lugod ngan ipasamwak ha bisan diin an Ginhadian han Dios.” Matin-aw nga waray pa mamatay an tatay han lalaki, kay kon patay na, waray unta hiya dida basi magpinamati kan Jesus. Posible nga naghangyo hiya hin panahon tubtob nga mamatay an iya tatay. Diri hiya andam nga unahon ha iya kinabuhi an Ginhadian han Dios.

Samtang nagbabaktas hira pakadto ha Jerusalem, usa pa nga lalaki an nagsiring: “Ginoo, maupod ako ha imo, kondi tuguti anay ako pagsarit ha akon pamilya.”

Hi Jesus binaton: “Waray tawo nga nakapot ha arado ngan nalingi an takos makasulod ha Ginhadian han Dios.” An mga magigin disipulo ni Jesus kinahanglan nakapokus ha buruhaton han Ginhadian. Sugad la nga an pag-arado mahihiwi kon an nag-aarado diri nakapokus ha unhan, sugad man an nalingi hini nga daan nga sistema mahipapakdol ha dalan ngadto ha kinabuhi nga waray kataposan. Juan 7:2-10; Lucas 9:51-62; Mateo 8:19-22.

▪ Hin-o an kabugtoan ni Jesus, ngan ano an ira paghunahuna ha iya?

▪ Kay ano nga waray batasan an mga Samaritano, ngan ano an karuyag himoon nira Santiago ngan Juan?

▪ Samtang nagbabaktas, ano an tulo nga higayon nga nakiistorya hi Jesus? Paonan-o niya ginpabug-atan nga kinahanglan an pagsakripisyo?