Kapitulo 77

Problema ha Panurundon

MAARAM an mga tawo nga hi Jesus nakaon didto ha balay han Pariseo. Salit yinukot an nagkatirok ha gawas ngan naghinulat han iya paggawas. Diri hira pariho ha mga Pariseo nga nakontra ngan nagbabantay nga makayakan hiya hin sayop, lugod eksayted ngan mapasalamaton nga namati hira.

Siyahan nagsiring hiya ha mga disipulo: “Pag-ikmat kamo ha libadura han mga Pariseo, nga amo an pagkahipokrito.” Sugad han iginpakita durante han pangaon, puno hin pagkahipokrito an sistema han relihiyon han mga Pariseo. Pero bisan kon naitatago nira an ira karaotan pinaagi han pakita nga pagkarelihiyoso, mabubuhayhag gihapon ito. Nagsiring hi Jesus: “Waray igintago hin maopay nga diri mabubuhayhag, ngan waray sekreto nga diri mahibabaroan.”

Gin-utro ni Jesus an pagparig-on nga iya ginsiring ha 12 nga apostol han ginsugo hira nga magsangyaw ha bug-os nga Galilea. Nagsiring hiya: “Ayaw kamo kahadlok ha mga nakakamatay han lawas ngan waray na nahihimo katapos hito.” Diri nahingangalimtan han Dios bisan an usa nga maya, salit ginpasarig ni Jesus an mga sumurunod nga diri hira hingangalimtan han Dios. Nagsiring hiya: “Kon dad-on kamo ha atubangan han nagkakatirok nga mga tawo, mga opisyal han gobyerno, ngan mga may awtoridad, . . . an baraan nga espiritu magtututdo kon ano an iyo isisiring hito nga oras.”

Katapos, usa han mga tawo an naghangyo: “Magturutdo, sugoa an akon bugto nga bahinan ako han panurundon.” Sumala ha Balaud ni Moises, an suhag nga lalaki makarawat hin doble nga bahin han panurundon, salit waray na unta angay pagdiskusyonan. Pero posible nga karuyag han lalaki nga madugangan pa an iya bahin.

Husto la nga waray manginlabot hi Jesus. “Hin-o an nagpili ha akon nga hukom o paragtuhay niyo nga duha?” nagpakiana hiya. Katapos naghatag hiya ha mga tawo hin importante nga sagdon: “Padayon nga magbantay kamo ngan mag-ikmat kontra han ngatanan nga klase hin kahakog, kay bisan kon damu an panag-iya han usa nga tawo, an iya kinabuhi diri nadepende ha iya mga gintatag-iya.” Oo, bisan kon damu an gintatag-iya han usa, mamamatay la gihapon hiya ngan babayaan ito ngatanan. Basi pabug-atan ini ngan ipakita nga kalurongan an diri pagtipig han maopay nga relasyon ha Dios, naghatag hi Jesus hin ilustrasyon.

Nagsiring hiya: “Damu an ani han uma han usa nga riko nga tawo. Salit ha iya kasingkasing nangatadongan hiya, ‘Yana nga waray na ako nabubutangan han akon mga inani, ano an akon bubuhaton?’ Katapos nagsiring hiya, ‘Ini an akon bubuhaton: Rurub-on ko an akon mga bodega ngan magtitindog hin durodagku, ngan didto ko ibubutang an ngatanan nga inani ngan mag-opay nga butang, ngan masiring ako ha akon kalag: “Kalag, damu na an mag-opay nga butang nga imo natirok para ha tiarabot nga katuigan; salit pahuway, kaon, inom, ngan paglipay.”’ Pero an Dios nagsiring ha iya, ‘Ikaw nga lurong, yana nga gab-i kukuhaon nira an imo kalag. Hin-o an magtatag-iya han imo mga gintirok?’”

Ini an konklusyon ni Jesus: “Ito an nahitatabo ha tawo nga nagtitirok hin bahandi para ha iya kalugaringon kondi diri riko ha Dios.” Bisan kon an mga disipulo bangin diri masulay han kalurongan nga pagtirok hin bahandi, mahimo hira maulang ha ira bug-os-kalag nga pag-alagad kan Jehova tungod han mga kabaraka ha kada adlaw. Salit ginsalingabot ni Jesus an higayon nga utruhon an iya maopay nga sagdon mga usa ngan tunga ka tuig na an naglabay didto ha Sermon ha Bukid.

Nagsiring hiya ha mga disipulo: “Tungod hini, susumatan ko kamo: Ayaw na kamo kabaraka han iyo kalag kon ano an iyo kakaunon o han iyo lawas kon ano an iyo igbabado. . . . Kitaa an mga uwak. Diri hira nagsasabwag o nag-aani ngan waray hira mga kamalig o bodega. Pero ginpapakaon hira han Dios. . . . Kitaa kon paonan-o natubo an mga bukad, diri ito nagtatrabaho o nagtatahi hin bado, pero susumatan ko kamo: Hi Solomon, bisan kon harangdon, waray makagbado hin sugad kaopay han mga bukad. . . .

“Salit ayaw na kamo pagpinamiling han iyo kakaunon ngan iinumon, ngan ayaw na kamo kabaraka hin sobra, kay ini ngatanan an gintitinguha gud han mga tawo ha kalibotan, pero maaram an iyo Amay nga ginkikinahanglan niyo ini. Lugod, padayon nga pamilnga an iya Ginhadian, ngan ini nga mga butang idudugang ha iyo.”

Importante gud nga pamalandungon ini nga mga pulong ni Jesus labi na ha panahon han kakurian. Ha pagkamatuod, an sobra nga nababaraka ha mga panginahanglan ha materyal ngan hinay-hinay nga nagpapasibaya ha pag-alagad ha Dios, nagpapakita hin kakulang hin pagtoo ha abilidad han Dios ha pagtagana para ha Iya mga surugoon. Lucas 12:1-31; Deuteronomio 21:17.

▪ Ano an posible nga hinungdan nga nagpakiana an tawo mahitungod han panurundon, ngan ano an iginsagdon ni Jesus?

▪ Ano nga ilustrasyon an iginhatag ni Jesus? Ano an ginpapabug-atan hito?

▪ Ano an iginsagdon utro ni Jesus, ngan kay ano nga angayan ito?