Kapitulo 63

Sagdon ha Pagtadong

HAN hi Jesus ngan an iya mga apostol nakadto pa ha balay ha Capernaum, may iba nga gindiskusyonan an mga apostol labot han kon hin-o an gilalabawi ha ira. Posible nga nahitabo liwat ito han binalik hira ha Capernaum, han waray hi Jesus. Hi apostol Juan nagsiring: “Nakakita kami hin lalaki nga nagpapagawas hin mga demonyo pinaagi han imo ngaran, ngan gindid-an namon hiya kay diri naton hiya kaupod.”

Naghunahuna hi Juan nga an mga apostol la an grupo nga may katungod nga manambal. Salit para ha iya diri husto an ginbubuhat nga mga milagro hito nga tawo kay diri hiya kaupod han ira grupo.

Pero nagsagdon hi Jesus: “Ayaw hiya pagdid-i, kay waray makakahimo hin gamhanan nga buhat pinaagi han akon ngaran nga makakagyakan dayon hin maraot mahitungod ha akon, kay an diri nakontra ha aton, nadapig ha aton. Bisan hin-o nga nahatag ha iyo hin usa ka baso nga irimnon nga tubig tungod kay disipulo kamo han Kristo, ha pagkamatuod susumatan ko kamo, diri gud hiya mawawad-an hin balos.”

Diri kinahanglan mag-inupod ito nga tawo kan Jesus basi la magin dapig ha iya. Waray pa maorganisa an Kristiano nga kongregasyon, salit bisan kon diri hiya bahin ha ira grupo diri ito nagpapasabot nga iba an iya kongregasyon. Ito nga tawo natoo gud ha ngaran ni Jesus salit nakakapagawas hiya hin mga demonyo. An iya ginbubuhat uyon ha ginsiring ni Jesus nga angay hin balos. Kon sugad, diri gud hiya mawawad-an hin balos.

Kondi ano daw la kon nahipakdol ito nga tawo tungod han mga ginyakan ngan ginbuhat han mga apostol? Seryoso gud ito! Nagsiring hi Jesus: “An bisan hin-o nga nakakapakdol ha usa hini nga mga ubos nga may pagtoo, mas maopay pa nga higtan hiya ha liog hin daku nga gilingan nga bato pariho ha ginbibirik han asno ngan ilabog hiya ha dagat.”

Nagsiring hi Jesus nga sadang kuhaon han iya mga sumurunod an bisan ano nga sugad kabirilhon han kamot, tiil, o mata nga mahimo makapakdol ha ira. Mas maopay pa nga mawad-an hiton ginpapabilhan nga butang ngan makasulod ha Ginhadian han Dios kay ha tipigan ito pero ilalabog ha Gehenna (naglalaga nga basurahan hirani ha Jerusalem), nga nagsisimbolo han dayon nga kabungkagan.

Nagpahamangno liwat hiya: “Ayaw gud niyo pagtamaya an usa hini nga mga ubos, kay susumatan ko kamo nga an ira mga anghel ha langit pirme aadto ha atubangan han akon Amay ha langit.” Katapos iya iginpatin-aw an pagkapresyoso han “mga ubos” han nag-ilustrar hiya mahitungod han tawo nga may 100 nga karnero pero nawara an usa. Babayaan niya an 99 basi pamilngon an nawara, siring ni Jesus, ngan kon hiagian ito, mas malilipay hiya hito kay ha 99. “Sugad man,” nagsiring hi Jesus, “diri karuyag han akon Amay ha langit nga mawara an bisan usa la hini nga mga ubos.”

Posible nga nahunahuna niya an gindiskusyonan han mga apostol, salit nagsagdon hiya: “Magkaada kamo asin ha iyo kalugaringon, ngan makigmurayaw kamo ha usa kag usa.” Nagigin mas marasa an matab-ang nga pagkaon kon may asin. Salit, an simboliko nga asin nabulig basi masayon karawaton an ginsisiring han usa. Makakabulig ito nga matipigan an kamurayawan.

Pero tungod kay diri perpekto an tawo, usahay nahitatabo an diri pagsinabtanay. Hi Jesus naghatag liwat hin giya kon ano an hihimoon. “Kon an imo bugto nakasala,” siring niya, “kadtoa hiya ngan isaysay an iya sayop nga kamo la nga duha. Kon mamati hiya ha imo, nabuligan mo hiya nga buhaton an husto.” Kon diri hiya mamati, nagsagdon hi Jesus, “pag-upod hin usa o duha pa, basi an ngatanan nga ginsiring mapamatud-an han duha o tulo nga testigo.”

Sugad nga ultimo nga bubuhaton, hi Jesus nagsiring, kinahanglan isumat an problema ha “kongregasyon,” karuyag sidngon, ha mga paramangno han kongregasyon nga makakahimo hin hudisyal nga desisyon. Kon diri karawaton han nakasala an ira desisyon, siring niya, “tagda hiya sugad nga tawo han mga nasud ngan sugad nga parasukot hin buhis.”

Ha paghimo hin desisyon, kinahanglan sundon hin maopay han mga paramangno an mga instruksyon ha Pulong ni Jehova. Salit kon napamatud-an nira nga nakasala an indibiduwal ngan angay disiplinahon, an desisyon “gin-gapos na ha langit.” Ngan kon ira “badbaran ha tuna,” karuyag sidngon, napamatud-an nga waray sala an indibiduwal, ito liwat “ginbadbaran na ha langit.” Ha pagturotimbang han magigin desisyon, siring ni Jesus, “kon may duha o tulo nga nagkakatirok ha akon ngaran, aada ako ha butnga nira.” Mateo 18:6-20; Marcos 9:38-50; Lucas 9:49, 50.

▪ Kay ano nga ha panahon ni Jesus diri kinahanglan nga mag-inupod ha iya?

▪ Mationan-o kaseryoso an pakapakdol ha mga ubos? Paonan-o iginpatin-aw ni Jesus an ira pagkapresyoso?

▪ Ano an posible nga nakaaghat kan Jesus nga sagdonan an mga apostol nga magkaada asin ha ira kalugaringon?

▪ Ano an iginpapasabot han ‘paggapos’ ngan ‘pagbadbad’?