Kapitulo 74

Sagdon kan Marta Ngan Instruksyon ha Pag-ampo

DURANTE han ministeryo ni Jesus ha Judea, kinadto hiya ha baryo han Betania. Taga-didto an magburugto nga hira Marta, Maria, ngan Lasaro. Bangin nakilala hira ni Jesus han nagtitikang pa la an iya ministeryo ngan nagin duok niya nga kasangkayan. Hini nga higayon, kinadto hiya ha balay nira Marta ngan gin-abiabi hiya.

Karuyag gud ni Marta nga ihatag kan Jesus an pinakamaopay. Syempre, daku nga kadungganan kon bumisita ha imo balay an iginsaad nga Mesias! Salit nagin okupado hi Marta ha pag-andam hin damu nga pagkaon, ngan ha iba pa nga arasikasuhon basi magin makalilipay ngan komportable an pagbisita ni Jesus.

Pero an bugto ni Marta nga hi Maria nalingkod ha may tiil han Ginoo ngan namamati. Waray pag-iha, dinaop kan Jesus hi Marta ngan nagsiring: “Ginoo, diri ako ginbubuligan han akon bugto ha mga buruhaton, diri mo ba hiya sisidngan? Alayon sidnga hiya nga buligan ako.”

Kondi waray ginsiring hi Jesus kan Maria. Lugod ginsagdonan niya hi Marta tungod han sobra nga kabaraka ha materyal nga mga butang. “Marta, Marta,” buotan nga nagsaway hiya, “nababaraka ngan okupado ka ha damu nga butang. Pero pipira la nga butang an ginkikinahanglan, o usa la ngani.” Karuyag sidngon ni Jesus nga diri angay maghatag hin daku nga panahon ha pag-andam hin damu nga putahe para ha usa ka pangaon. Tama na an pipira o bisan usa la nga putahe.

Maopay an intensyon ni Marta; karuyag niya magin maabiabihon. Pero tungod han iya kabaraka ha materyal, waray hiya makapahimulos han pagtutdo han Anak mismo han Dios! Salit nagsiring hi Jesus: “Ginpili ni Maria an maopay nga butang, ngan diri ito kukuhaon ha iya.”

Katapos, ha lain nga higayon, usa nga disipulo an naghangyo kan Jesus: “Ginoo, tutdui kami kon paonan-o mag-aampo, pariho han pagtutdo ni Juan ha iya mga disipulo.” Posible nga diri hiya presente han nagtutdo hi Jesus han modelo nga pag-ampo mga usa ngan tunga ka tuig na an naglabay ha Sermon ha Bukid. Salit igintutdo na liwat ito niya pero naghatag hiya hin ilustrasyon basi pabug-atan nga kinahanglan padayon nga mag-ampo.

“Pananglitan, usa ha iyo an may sangkay,” siring ni Jesus, “ngan kinadto ka ha iya ha katutnga han gab-i ngan nagsiring ha iya, ‘Sangkay, pautanga ako hin tulo nga tinapay kay may sangkay ako nga inabot pa la tikang ha biyahe ngan waray ako ipapakaon ha iya.’ Pero an tagbalay binaton: ‘Ayaw ako pagdisturboha. Nakatrangka na an purtahan, ngan nahigda na kami han akon gudtiay pa nga mga anak. Diri ako makakabuhát ngan makakahatag ha imo hin bisan ano.’ Susumatan ko kamo: Bisan kon diri hiya bumuhát ngan maghatag hin bisan ano tungod han ira pagin magsangkay, sigurado nga mabuhát hiya ngan mahatag han iya ginkikinahanglan tungod han iya padayon nga pagpirit.”

Diri hito iginpapasabot nga hi Jehova nga Dios diri naruruyag pagbaton ha mga pangamuyo, pariho han sangkay ha istorya. Iginpapatin-aw la ni Jesus nga kon an sangkay naghatag tungod han padayon nga paghangyo, labi na gud nga mahatag an aton mahigugmaon nga Amay ha langit! Salit nagpadayon hi Jesus: “Susumatan ko kamo: Padayon nga mangaro kay ihahatag ito ha iyo, padayon nga mamiling kay hiaagian ito niyo, padayon nga magtuktok kay aabrihan kamo. Kay an bisan hin-o nga nangangaro may nakakarawat, an bisan hin-o nga namimiling nakakaagi, ngan an bisan hin-o nga nagtutuktok inaabrihan.”

Katapos gin-unabi ni Jesus an diri-perpekto ngan makasasala nga mga amay: “Ha pagkamatuod, hin-o nga tatay an mahatag hin halas kon an iya anak mangaro hin isda? O kon mangaro liwat hiya hin bonay, mahatag ba hiya hin iskorpyon? Salit kon kamo nga magraot maaram humatag ha iyo mga anak hin mag-opay nga regalo, labi na gud nga mahatag an iyo Amay ha langit hin baraan nga espiritu ha mga nangangaro ha iya!” Epektibo gud ito nga pag-aghat ni Jesus nga padayon kita nga mag-ampo. Lucas 10:38–11:13.

▪ Kay ano nga damu an igin-andam ni Marta para kan Jesus?

▪ Ano an ginbuhat ni Maria, ngan kay ano nga hiya an ginkumendasyonan ni Jesus imbes nga hi Marta?

▪ Kay ano nga igintutdo utro ni Jesus an pag-ampo?

▪ Paonan-o igin-ilustrar ni Jesus nga kinahanglan padayon nga mag-ampo?