Kapitulo 126

“Sigurado Gud nga Ini an Anak han Dios”

DIRI pa la maiha han ginbitay hi Jesus ha kahoy, nahitabo an misteryoso nga tulo ka oras nga pagsirom ha kaudtuhon. Diri ito tungod han eklipse ha kaadlawon, kay nahitatabo la ini kon gimata, pero kadayaw adto kay panahon han Paskua. Dugang pa, an eklipse ha kaadlawon pipira ka minutos la. Salit an Dios an nagpahinabo hito nga pagsirom! Posible nga napaundang hito an mga nagtatamay ngan nag-iinsulto kan Jesus.

Kon iton urusahon ngan makaharadlok nga pagsirom nahitabo antes ginsaway han usa nga makasasala an iya kaupod ngan ginhangyo hi Jesus nga hinumdoman hiya, bangin nakabulig ito nga magbasol hiya. Posible nga durante hito nga pagsirom dinaop ha pasakitan nga kahoy an upat nga babaye—an nanay ni Jesus ngan an bugto han iya nanay nga hi Salome, hi Maria Magdalena, ngan hi Maria nga nanay han burobata nga Santiago nga apostol. Kaupod liwat nira an hinigugma nga apostol ni Jesus nga hi Juan.

An kasingkasing han nanay ni Jesus sugad gud hin ‘ginbuno’ samtang nakikita niya nga ginbitay ngan duro an kasakit han iya anak nga iya ginmangnoan ngan ginpadaku! Pero an ginhuhunahuna ni Jesus diri an iya kasakit kondi an kaopayan han iya nanay. Nangalimbasog gud hiya ha pagtangdo kan Juan ngan ha pagsiring ha iya nanay: “Babaye, kitaa! An imo anak!” Katapos, samtang natangdo kan Maria, nagsiring hiya kan Juan: “Kitaa! An imo nanay!”

Hito nga paagi igintapod ni Jesus ha iya hinigugma gud nga apostol an pagmangno ha iya nanay, nga posible nga balo na. Ginhimo niya ini kay diri pa natoo ha iya an iba nga anak ni Maria. Salit maopay hiya nga susbaranan ha pagsuporta diri la han pisikal kondi han espirituwal nga panginahanglan liwat han iya nanay.

Han mga alas-3 ha kulop, hi Jesus nagsiring: “Nauuhaw ako.” Inabat niya nga baga hin nawad-an hiya hin proteksyon han iya Amay basi masarihan gud an iya integridad. Salit ginuliat hiya: “Dios ko, Dios ko, kay ano nga ginpabay-an mo ako?” Pakabati hito han mga naninindog didto, nagsiring hira: “Pamatii niyo! Gintatawag niya hi Elias.” Dinalagan dayon an usa ha ira basi kumuha hin espongha ngan igintunlob ito ha maaslom nga bino ngan iginbutang ha durho han tangbo basi painumon hiya. Pero an iba nagsiring: “Pabay-i hiya! Kitaon naton kon makanhi ba hi Elias pagtalwas ha iya.”

Pakatilaw ni Jesus han maaslom nga bino, nagsiring hiya: “Natuman na!” Oo, natuman niya an ngatanan nga iginsugo han iya Amay nga buhaton niya dinhi ha tuna. Ha kataposan nagsiring hiya: “Amay, igintatapod ko ha imo an akon espiritu.” Dida hito igintapod niya an iya kinabuhi ha Dios ngan nasarig nga ibabalik ito ha iya. Katapos dinuko hiya ngan namatay.

Ha ultimo nga pagginhawa ni Jesus, nagkaada hin makusog nga linog, salit nabuka an dagku nga mga bato. Tungod han kakusog hito, naabrihan an mga lubnganan ha gawas han Jerusalem ngan nahigawas an mga patay nga lawas. Nakita ito han mga naagi salit kinadto hira ha syudad basi isumat ito.

Dugang pa, han kamatay ni Jesus, an halapad nga kurtina ha templo han Dios nga nakakabahin han Baraan tikang ha Pinakabaraan nagisi tikang ha igbaw tubtob ha ubos. Posible nga iton maopay gud an dekorasyon nga kurtina mga 18 metros an kahitaas ngan duro kabug-at! Iton urusahon nga milagro diri la nagpapakita han kangalas han Dios ha mga nagpatay ha iya Anak kondi nagpapasabot liwat nga puydi na makasulod ha Pinakabaraan, ha langit mismo, tungod han kamatayon ni Jesus.

Han inabat han mga tawo an paglinog ngan nakita an mga panhitabo, nahadlok gud hira. An opisyal han mga sundalo nga gintaporan ha pagpatay nagdayaw ha Dios: “Sigurado gud nga ini an Anak han Dios.” Posible nga nakadto hiya han ginhisgotan an pag-angkon ni Jesus nga anak hiya han Dios han ginbibista hiya ha atubangan ni Pilato. Ngan yana kombinsido hiya nga hi Jesus amo an Anak han Dios, oo, nga hiya an pinakabantogan nga tawo nga nabuhi.

Apektado liwat an iba hinin milagroso nga mga panhitabo, ngan nanguli hira nga ginpupukpok an ira dughan tungod han duro nga kasubo ngan kaawod. Nabantad gud an damu nga kababayin-an nga disipulo ni Jesus nga apartado nga nagkinita hiton makatirigamnan gud nga mga panhitabo. Nakadto liwat hi apostol Juan. Mateo 27:45-56; Marcos 15:33-41; Lucas 23:44-49; 2:34, 35; Juan 19:25-30.

▪ Kay ano nga diri eklipse ha kaadlawon an hinungdan han tulo ka oras nga pagsirom?

▪ Han hirani na mamatay hi Jesus, ano nga susbaranan an iya iginpakita ha mga anak nga may mga kag-anak nga edaran na?

▪ Ano an upat nga pangataposan nga ginyakan ni Jesus antes hiya mamatay?

▪ Ano an nagin epekto han linog? Ano an kahulogan han kagisi han kurtina ha templo?

▪ Ano an epekto han mga milagro ha opisyal han kasundalohan?