Kapitulo 111

Tigaman han Kataposan nga mga Adlaw

MARTES na nga kulop. Han nalingkod hi Jesus ha Bukid han mga Olibo ngan ginkikinita an templo ha ubos, dinaop ha iya hira Pedro, Andres, Santiago, ngan Juan nga hira la. Nababaraka hira ha templo, kay nagtagna pa la hi Jesus nga waray usa nga bato nga magpapabilin ha bawbaw han usa nga bato nga diri marurumpag.

Pero bangin diri la ito an ira ginhunahuna han dinaop hira kan Jesus. Pipira ka semana pa la an naglabay, naghisgot hiya mahitungod han iya “presensya,” nga hito nga panahon ‘igpapahayag an Anak han tawo.’ Ha naglabay, ginsumatan niya hira mahitungod han “ikatarapos hini nga sistema.” Salit karuyag gud mahibaro hito an mga apostol.

“Sumati kami,” siring nira, “San-o ini mahitatabo [an kabungkag han Jerusalem ngan han templo hito], ngan ano an magigin tigaman han imo presensya ngan han ikatarapos hini nga sistema?” Kon sugad, tulo an ira iginpakiana. Siyahan, karuyag nira mahibaro kon san-o mahitatabo an kabungkag han Jerusalem ngan han templo hito, ikaduha, an presensya ni Jesus kon magmando na hiya ha Ginhadian, ngan ikatulo, an kataposan hini nga bug-os nga sistema.

Hilaba an baton ni Jesus hiton tulo nga pakiana. Naghatag hiya hin tigaman kon san-o matatapos an Judio nga sistema; pero may igindugang pa hiya. Naghatag liwat hiya hin tigaman nga magpapahamangno ha iya magigin mga disipulo basi mahibaro hira nga nagkikinabuhi na hira durante han iya presensya ngan hirani na ha kataposan hinin bug-os nga sistema.

Paglabay han mga tuig, nakita han mga apostol nga natutuman an tagna ni Jesus. Oo, nagtikang ito mahitabo ha ira panahon. Salit an mga Kristiano nga buhi pa paglabay han 37 ka tuig, han 70 C.E., waray matigdai han nabungkag an Judio nga sistema ngan an templo.

Pero an presensya han Kristo waray umabot han 70 C.E. Maiha pa umabot an iya presensya ha pagmando ha Ginhadian. Kondi san-o? Mahibabaroan ini kon aton hisgotan an tagna ni Jesus.

Nagtagna hiya nga magkakaada “mga girra ngan mga sumat mahitungod han girra.” “An mga nasud makikig-away ha iba nga nasud,” siring niya, ngan magkakaada gutom, mga linog, ngan mga epidemya. An iya mga disipulo kapupungtan ngan papatayon. Maabot an buwa nga mga propeta ngan damu an ira maisisimang. Magdadamu an karaotan, ngan magtutugnaw an gugma han kadam-an. Ha pariho nga panahon, an maopay nga sumat han Ginhadian isasangyaw sugad nga pamatuod ha ngatanan nga nasud.

Bisan kon limitado an katumanan han tagna ni Jesus antes mabungkag an Jerusalem han 70 C.E., may daku nga katumanan ito durante han iya presensya ngan ha ikatarapos hini nga sistema. Ha pag-usisa hin maopay han mga panhitabo tikang han 1914, makikita nga nagtikang na hito nga tuig an daku nga katumanan han importante gud nga tagna ni Jesus.

An usa pa nga bahin han tigaman nga gin-unabi ni Jesus amo an pag-abot han “mangil-ad nga butang nga hinungdan han kabungkagan.” Han 66 C.E., ito nga mangil-ad nga butang amo an “nagkakampo nga kasundalohan” han Roma nga naglikos han Jerusalem ngan nagdaot han pader han templo. “An mangil-ad nga butang” natindog ha lugar nga diri angay hito tindogan.

Ha daku nga katumanan han tigaman, an mangil-ad nga butang amo an League of Nations ngan an kasaliwan hito, an United Nations. Ini nga organisasyon nga para ha kamurayawan han bug-os nga kalibotan gintatagad han Kakristianohan sugad nga kasaliwan han Ginhadian han Dios. Mangil-ad gud ito! Salit ha itinanda nga panahon, aatakehon han mga gobyerno nga membro han UN an Kakristianohan (ginpapadagawan han Jerusalem) ngan bubungkagon ito.

Nagtagna hi Jesus: “Maabot an daku nga kasakitan nga waray pa mahitabo tikang ha tinikangan han kalibotan tubtob yana, ngan diri na gud mahitatabo utro.” Daku gud nga kasakitan an kabungkag han Jerusalem han 70 C.E., nga sobra usa ka milyon an namatay. An daku nga katumanan hito nga bahin han tagna ni Jesus magigin labaw pa hito.

Sarig ha Dios ha Kataposan nga mga Adlaw

Han Martes, Nisan 11, han hirani na matunod an adlaw, nagpadayon hi Jesus ha pakiistorya ha mga apostol mahitungod han tigaman han iya presensya kon magmando na hiya ha Ginhadian, ngan han kataposan han sistema. Ginpahamangnoan niya hira nga diri lumanat ha buwa nga mga Kristo. Pangangalimbasogan hito nga “isimang bisan an mga pinili, kon posible,” siring niya. Pero pariho han mga agila nga nakakakita bisan ha hirayo, an mga pinili magkakatirirok diin aadto an totoo nga espirituwal nga pagkaon, kaupod han totoo nga Kristo ha iya diri nakikita nga presensya. Diri hira maisisimang ngan diri magkakatirirok ngadto ha buwa nga Kristo.

An buwa nga mga Kristo dayag nga nagpapakita. Ha kabaliktaran, an presensya ni Jesus diri makikita. Nagsiring hi Jesus nga katapos magtikang an kasakitan, “An adlaw magsisirom, [ngan] an bulan diri maglalamrag.” Oo, ito an pinakamadulom nga panahon ha kasaysayan han tawo. An adlaw sugad hin magsisirom durante ha kaadlawon, ngan an bulan sugad hin diri maglalamrag ha kagab-ihon.

“Mababay-og an gamhanan nga mga butang ha langit,” siring ni Jesus. Iginpapasabot niya nga makikita ha literal nga langit nga may makaharadlok nga mahitatabo. Maieksperyensyahan an duro gud nga kahadlok ngan kamadarahog nga waray pa mahitabo ha kasaysayan han tawo.

Sugad nga resulta, nagsiring hiya nga “mag-aantos an mga nasud . . . ngan malilisang tungod han hagubuhob han mabalud nga dagat. An mga tawo madidismayo tungod ha kahadlok ngan pagpinamulat han mga mahitatabo ha bug-os nga inuukyan nga tuna.” Oo, samtang nagtitikahirani an kataposan han pinakamadulom nga panahon ha kasaysayan han tawo, “makikita ha langit an tigaman han Anak han tawo, ngan an ngatanan nga tribo ha tuna magpupukpok han ira dughan tungod ha kasubo.”

Pero diri ngatanan masusubo kon ‘an Anak han tawo lumusad nga may gahum’ ha pagbungkag hinin maraot nga sistema. An “mga pinili,” an 144,000 nga makakaupod han Kristo ha iya Ginhadian ha langit diri masusubo, pati an ira mga kaupod, an gin-unabi ni Jesus nga iya “iba nga mga karnero.” Bisan kon nagkikinabuhi hira ha pinakamadulom nga panahon ha kasaysayan han tawo, namamati hira han pag-aghat ni Jesus: “Kon magtikang na mahitabo ini nga mga butang, tindog kamo hin tadong ngan hangad kamo kay an iyo katalwasan hirani na.”

Basi an mga disipulo ni Jesus nga magkikinabuhi ha kataposan nga mga adlaw mahibaro nga hirani na an kataposan, naghatag hiya hini nga ilustrasyon: “Tagda an igera ngan an iba nga mga kahoy. Kon nananaringsing ito, maaram kamo nga hirani na an katpaso. Ha pariho nga paagi, kon makita niyo nga nahitatabo na ini nga mga butang, makakasiguro kamo nga hirani na an Ginhadian han Dios. Ha pagkamatuod susumatan ko kamo: Diri gud malabay ini nga henerasyon tubtob nga mahitabo ini ngatanan.”

Salit, kon makita han mga disipulo nga natutuman na an damu nga bahin han tigaman, mahibabaroan nira nga hirani na an kataposan hini nga sistema ngan hirani na wad-on han Ginhadian han Dios an ngatanan nga karaotan. Ginsagdonan ni Jesus an mga disipulo nga magkikinabuhi durante ha makatirigamnan nga kataposan nga mga adlaw.

Nagsagdon hiya: “Tagi hin atensyon an iyo kalugaringon nga an iyo kasingkasing diri mabug-atan han sobra nga pagkinaon, pag-ininom, ngan han mga kabaraka ha kinabuhi, ngan ito nga adlaw tigda nga maabot ha iyo sugad hin lit-ag. Kay maabot ito ha ngatanan nga naukoy ha bug-os nga tuna. Salit padayon nga magmata, ngan mangamuyo kamo ha ngatanan nga panahon nga makapalagiw kamo hini ngatanan nga butang nga itinanda nga mahitatabo ngan makatindog kamo ha atubangan han Anak han tawo.”

Maaramon Ngan Diri-maaramon nga mga Birhen

Ginbaton ni Jesus an mga pakiana han mga apostol mahitungod han tigaman han iya presensya kon magmando na hiya ha Ginhadian. Yana, iya iginhatag an iba pa nga bahin han tigaman pinaagi han tulo nga parabola o ilustrasyon.

An katumanan han tagsa nga ilustrasyon makikita han mga magkikinabuhi durante han iya presensya. Ini an iya siyahan nga ilustrasyon: “An Ginhadian han langit pariho hin napulo nga birhen nga nagdara han ira mga lampara ngan ginawas pagtapo ha karaslon nga lalaki. An lima ha ira diri-maaramon, ngan an lima maaramon.”

Han nagsiring hi Jesus nga “an Ginhadian han langit pariho hin napulo nga birhen,” diri niya iginpapasabot nga diri-maaramon an katunga han magigin manurunod han Ginhadian ha langit ngan an katunga maaramon! Karuyag la niya sidngon nga mahitungod han Ginhadian ha langit, may bahin nga kapariho hini o hito, o nga an mga kahimtang may kalabotan ha Ginhadian magigin pariho hito.

An napulo nga birhen nagsisimbolo ha ngatanan nga Kristiano nga magigin bahin o natoo nga magigin bahin han Ginhadian ha langit. Han Pentekostes 33 C.E., iginsaad nga an Kristiano nga kongregasyon ikakasal ha ginbanhaw ngan ginhimaya nga Karaslon nga Lalaki, hi Jesu-Kristo. Pero waray unabiha kon san-o gud mahitatabo ha tidaraon ito nga kasal.

Ha ilustrasyon, an napulo nga birhen ginawas basi tapoon an karaslon nga lalaki ngan umupod ha prosesyon ha kasal. Kon umabot hiya, ilalawag nira an ira mga lampara ha aagian han prosesyon, salit ira ginpapasidunggan hiya samtang iya gindadara an iya maarasawa ngadto ha balay nga igin-andam para ha iya maarasawa. Pero nagsaysay hi Jesus: “An mga diri-maaramon nagdara han ira mga lampara kondi waray pagdara hin reserba nga lana, pero an mga maaramon nagdara han ira mga lampara ngan hin reserba nga lana. Han waray pa aabot an karaslon nga lalaki, ginpiraw hira ngan nanhingaturog.”

An kadelatar han karaslon nga lalaki nagpapasabot nga maiha pa an presensya han Kristo sugad nga nagmamando nga Hadi. Nagtikang hiya pagmando han tuig 1914. Durante han hilawig nga kagab-ihon antes hito, nanhingaturog an ngatanan nga birhen. Pero waray hira kondenara tungod hito. Ginkondenar an diri-maaramon nga mga birhen kay waray hira reserba nga lana. Iginsaysay ni Jesus kon paonan-o nakamata an mga birhen antes umabot an karaslon nga lalaki: “Ha katutnga han gab-i may nagsinggit, ‘Aadi na an karaslon nga lalaki! Gawas na kamo pagtapo ha iya.’ Binuhát an napulo nga birhen ngan gin-andam an ira mga lampara. An mga diri-maaramon nagsiring ha mga maaramon, ‘Tagi kami han iyo lana kay mapaparong na an amon mga lampara.’ An mga maaramon binaton: ‘Bangin magkulang ini ha aton ngatanan. Kadto lugod kamo ha parabaligya ngan palit kamo han para ha iyo.’”

An lana nagsisimbolo ha giniyahan nga Pulong han Dios nga padayon nga nagpapalaga ha totoo nga mga Kristiano sugad nga mga sugâ. Presyoso gud ha ira ito nga Pulong, pati an baraan nga espiritu nga nabulig ha ira nga masabtan ito. An espirituwal nga lana nabulig ha maaramon nga mga birhen ha paglawag samtang natapo ha karaslon nga lalaki durante ha prosesyon ngadto ha panagtawo ha kasal. Pero an diri-maaramon nga mga birhen waray dara nga reserba nga lana, an espirituwal nga lana nga kinahanglanon gud.

Iginsaysay ni Jesus an nahitabo: “Paglakat [han diri-maaramon nga mga birhen] basi pumalit [hin lana], inabot an karaslon nga lalaki, ngan an mga birhen nga andam na inupod ha iya ngadto ha panagtawo ha kasal, ngan ginsadhan an purtahan. Katapos, inabot an lima nga birhen ngan nagsiring, ‘Ginoo, Ginoo, abrihi kami!’ Binaton hiya, ‘Susumatan ko kamo han kamatuoran, diri ako nakilala ha iyo.’”

Katapos umabot an Kristo ha iya Ginhadian ha langit, an maaramon nga mga birhen nga klase nga amo an totoo nga dinihogan nga mga Kristiano nagmata, siring pa, ha ira pribilehiyo nga paghatag hin kalamrag hinin madulom nga kalibotan sugad nga pagdayaw ha binalik nga Karaslon nga Lalaki. Pero an ginsisimbolohan han diri-maaramon nga mga birhen diri andam ha pagtapo basi maghatag hin kadayawan. Salit pag-abot han panahon, waray abrihi han Kristo an purtahan basi diri hira makasulod ngadto ha panagtawo ha kasal ha langit. Iya ginpabay-an hira ha gawas ha madulom ngan hilarom nga kagab-ihon han kalibotan, basi mamatay upod han iba pa nga magburuhat han karaotan. “Salit, padayon kamo nga magbantay,” siring ni Jesus, “kay diri kamo maaram han adlaw ngan han oras.”

Ilustrasyon Mahitungod han mga Talanton

Didto ha Bukid han mga Olibo, nagsaysay hi Jesus ha mga apostol hin usa pa nga ilustrasyon, an ikaduha ha tulo nga ilustrasyon. Han naglabay nga pipira ka adlaw, han nakadto hiya ha Jerico, naghatag hiya hin ilustrasyon mahitungod han mga mina basi ipakita nga maiha pa umabot an Ginhadian. Bisan kon an iya ilustrasyon yana may mga kaparihoan hito, nagsasaysay ini han katumanan han mga buruhaton durante han presensya han Kristo kon magmando na hiya ha Ginhadian. Iginpapakita hini nga an iya mga disipulo kinahanglan magtrabaho samtang aanhi pa ha tuna basi padamuon an “iya mga panag-iya.”

Hi Jesus nagsiring: “An Ginhadian [o an mga kahimtang nga may kalabotan ha Ginhadian] pariho liwat hin tawo nga mabiyahe ha iba nga nasud. Antes hiya lumakat, gintawag niya an iya mga uripon ngan igintapod ha ira an iya mga panag-iya.” Hi Jesus amo an tawo nga magbibiyahe ha iba nga nasud, salit igintapod niya an iya mga panag-iya ha iya mga uripon—an mga disipulo nga magigin bahin han Ginhadian ha langit. Diri ito materyal nga mga panag-iya, lugod nagrirepresentar ito han sugo nga magsangyaw ngan bumulig ha damu pa basi magin mga disipulo.

Igintapod ni Jesus ha iya mga uripon an iya mga panag-iya han hirani na hiya sumaka ha langit. Paonan-o? Ginsugo niya hira nga padayon nga igsangyaw an mensahe han Ginhadian tubtob ha higrayo nga lugar ha tuna. Sumala kan Jesus: “May gintagan hiya hin lima ka talanton, may gintagan hin duha, ngan may gintagan hin usa. An kada tagsa gintagan sumala han ira abilidad, katapos nagbiyahe hiya.”

An walo nga talanton—an mga panag-iya han Kristo—igintapod sumala ha mga abilidad, o mga potensyal ha pag-alagad han mga uripon. Ha siyahan nga siglo, an mga nakakarawat han lima nga talanton matin-aw nga nag-uupod han mga apostol. Iginsaysay ni Jesus nga an mga uripon nga gintaporan hin lima ngan duha nga talanton nakapatubo hin doble pinaagi han ira pagsangyaw han Ginhadian ngan pagbulig ha iba nga magin disipulo. Pero an uripon nga gintaporan hin usa nga talanton waray makapatubo kay iginlubong ito ha tuna.

Nagpadayon hi Jesus: “Paglabay hin maiha nga panahon, inabot an agaron hito nga mga uripon ngan nakigtuhay ha ira.” Binalik an Kristo han ika-20 ka siglo, katapos hin mga 1,900 ka tuig basi makigtuhay, salit “maiha nga panahon” gud ito.

Katapos nagsaysay hi Jesus: “An kinarawat hin lima ka talanton dinaop dara an lima pa ka talanton, nga nasiring, ‘Agaron, gintaporan mo ako hin lima ka talanton; kitaa, nakaganansya ako hin lima.’ An iya agaron nagsiring: ‘Maopay an imo ginbuhat, matataporan ngan matinumanon nga uripon! Tungod kay matinumanon ka ha gutiay nga butang, tataporan ko ikaw hin damu nga butang. Malipay ka upod han imo agaron.’” An uripon nga gintaporan hin duha ka talanton nakapatubo liwat hin doble, salit pariho nga kumendasyon ngan balos an iya nakarawat.

Kondi paonan-o maglilipay iton magtinumanon nga uripon kaupod han ira Agaron? An kalipay han ira Agaron, hi Jesu-Kristo, amo an pagkarawat han Ginhadian han pagbalik niya ha iya Amay ha langit. May kalabotan han magtinumanon nga uripon ha moderno nga panahon, daku gud an ira kalipay kay gintaporan hira hin dugang nga mga responsabilidad ha Ginhadian, ngan kon matapos an ira kinabuhi dinhi ha tuna ngan banhawon hira ngadto ha Ginhadian ha langit, magigin waray gud kapariho an ira kalipay. Pero ano an mahitatabo ha ikatulo nga uripon?

“Agaron, maaram ako nga istrikto ka,” nagreklamo ito nga uripon. “Salit tungod ha kahadlok, linakat ako basi ilubong ha tuna an imo talanton. Adi ibabalik ko na ha imo.” Tinuyo nga waray magtrabaho ito nga uripon kay waray hiya magsangyaw ngan waray buligi an iba nga magin disipulo. Salit an agaron nagsiring nga “maraot ngan hubya” ito nga uripon, ngan nagdesisyon hiya: “Kuhaa ha iya an talanton. . . . Ilabog ha kasisidman ha gawas an waray pulos nga uripon. Didto hiya magtatangis ngan mangingigot an iya mga ngipon.” Adton maraot nga uripon nga klase nga ginlabog ha gawas, diri gud makakaeksperyensya hin kalipay ha pag-alagad.

Naghahatag ini hin importante nga leksyon para ha ngatanan nga natoo nga sumurunod hira han Kristo. Basi hira kumendasyonan ngan balosan niya, ngan diri ilabog ha kasisidman ha gawas ngan bungkagon, kinahanglan magtrabaho hira basi madugangan an mga panag-iya han ira Agaron ha langit pinaagi ha bug-os nga pakigbahin ha pagsangyaw. Maduruto ka ba hini nga buruhaton?

Kon Magmando na an Kristo ha Ginhadian

Hi Jesus ngan an iya mga disipulo aadto pa ha Bukid han mga Olibo. Sugad nga baton han ira pakiana mahitungod han iya presensya ngan han ikatarapos hini nga sistema, iya iginhatag yana an ikatulo nga ilustrasyon. Nagsiring hiya: “Pag-abot han Anak han tawo nga may daku nga awtoridad upod an ngatanan nga anghel, malingkod hiya ha iya harangdon nga trono.”

An pag-abot mahitatabo kon hirani na gud an kataposan hini nga sistema. Pero ha ano nga katuyoan? Nagsaysay hi Jesus: “An ngatanan nga nasud titirukon ha iya atubangan, ngan iya bubulagbulagon an mga tawo pariho ha ginbubuhat han paraataman kon iginbubulag niya an mga karnero ha mga kanding. Iya ibubutang an mga karnero ha iya too, kondi an mga kanding ha iya wala.”

Iginsaysay ni Jesus an mahitatabo ha mga inuyonan: “Katapos, an Hadi masiring ha mga aada ha iya too: ‘Kadi kamo nga binendisyonan han akon Amay, panunda niyo an Ginhadian nga igin-andam ha iyo tikang pa ha tinikangan han kalibotan.’” An mga karnero hini nga ilustrasyon diri magmamando upod han Kristo ha langit kondi makakapanunod han Ginhadian kay magigin tunan-on nga sakop hira hito. An “tinikangan han kalibotan” nagtikang han hira Adan ngan Eva nagkaada hin mga anak nga magpapahimulos han pagtubos han Dios ha katawohan.

Pero kay ano nga an mga karnero iginbutang ha too nga kamot han Hadi sugad nga mga inuyonan? “Kay han ginugutom ako,” siring han hadi, “iyo ako ginpakaon; han gin-uuhaw ako, iyo ako ginpainom. Han estranghero ako, iyo ako gin-abiabi; han waray ako iginsusul-ot, iyo ako gintagan hin bado. Han nagkasakit ako, iyo ako ginmangnoan. Han napriso ako, iyo ako ginbisita.”

Tungod kay an mga karnero aanhi ha tuna, nagpakiana hira kon paonan-o hira nagbuhat hin maopay ha ira Hadi ha langit. “Ginoo, kakan-o ka namon nakita nga ginugutom ngan ginpakaon ka namon, o gin-uuhaw ngan ginpainom ka namon?” nagpakiana hira. “Kakan-o ka namon nakita nga nagin estranghero ngan gin-abiabi ka namon, o waray iginsusul-ot ngan gintagan ka namon hin bado? Kakan-o ka namon nakita nga may sakit o priso ngan ginbisita ka namon?”

Binaton an Hadi: “Ha pagkamatuod susumatan ko kamo: Anoman an ginbuhat niyo ha usa nga pinakaubos hini nga akon kabugtoan, ginbuhat niyo ha akon.” An kabugtoan han Kristo amo an mga nanhibilin ha tuna han 144,000 nga magmamando kaupod niya ha langit. Ngan kon may maopay nga ginbuhat ha ira, sugad hin ginbuhat liwat ito ha iya.

Sunod, an Hadi nagsiring ha mga kanding: “Iwas kamo ha akon, kamo nga ginhukman han Dios ngadto ha kalayo nga waray kataposan nga igin-andam para ha Yawa ngan ha iya mga anghel. Kay han ginugutom ako, waray ako niyo pakaona; ngan han gin-uuhaw ako, waray ako niyo painoma. Han estranghero ako, waray ako niyo abiabiha; han waray ako iginsusul-ot, waray ako niyo tagi hin bado; han may sakit ngan priso ako, waray ako niyo mangnoi.”

Pero nagreklamo an mga kanding: “Ginoo, kakan-o ka namon nakita nga ginugutom o gin-uuhaw o nagin estranghero o waray iginsusul-ot o may sakit o priso ngan waray ka namon asikasoha?” Pariho an basihan ha paghukom ha maraot nga mga kanding ngan ha maopay nga mga karnero. Nagsiring hi Jesus: “Anoman an waray niyo buhata ha usa hini nga mga ubos [han akon kabugtoan], waray niyo buhata ha akon.”

Salit an presensya han Kristo ha pagmando ha Ginhadian, antes han kataposan hinin maraot nga sistema ha daku nga kasakitan, mag-uupod hin panahon ha paghukom. An mga kanding “huhukman . . . hin permanente nga kamatayon, pero an magtadong [an mga karnero] makarawat hin kinabuhi nga waray kataposan.” Mateo 24:2–25:46; 13:40, 49; Marcos 13:3-37; Lucas 21:7-36; 19:43, 44; 17:20-30; 2 Timoteo 3:1-5; Juan 10:16; Pahayag 14:1-3.

▪ Kay ano nga nagpakiana an mga apostol, pero ano pa an posible nga ira ginhuhunahuna?

▪ Ano nga bahin han tagna ni Jesus an natuman han 70 C.E., pero ano an waray matuman hito nga panahon?

▪ Kakan-o nagkaada siyahan nga katumanan an tagna ni Jesus, pero kakan-o ito nagkaada daku nga katumanan?

▪ Ano an mangil-ad nga butang ha siyahan ngan ultimo nga katumanan?

▪ Kay ano nga an ultimo nga katumanan han daku nga kasakitan waray mahitabo han nabungkag an Jerusalem?

▪ Ano nga mga panhitabo an nagpapakita han presensya han Kristo?

▪ San-o an “ngatanan nga tribo ha tuna magpupukpok han ira dughan tungod ha kasubo,” pero ano an bubuhaton han mga sumurunod han Kristo?

▪ Ano nga ilustrasyon ni Jesus an mabulig ha iya magigin mga disipulo nga masabtan kon hirani na an kataposan?

▪ Ano an iginsagdon ni Jesus ha iya mga disipulo nga magkikinabuhi ha kataposan nga mga adlaw?

▪ Hin-o an ginrirepresentaran han napulo nga birhen?

▪ Kakan-o iginsaad nga ipakasal an Kristiano nga kongregasyon ha karaslon nga lalaki, pero kakan-o inabot an karaslon nga lalaki basi dad-on an iya maarasawa ngadto ha panagtawo ha kasal?

▪ Ano an ginrirepresentaran han lana? An pagkaada hito nabulig ha maaramon nga mga birhen nga buhaton an ano?

▪ Diin hihimoon an panagtawo ha kasal?

▪ Ano nga daku nga balos an nawara han diri-maaramon nga mga birhen, ngan ano an nahitabo ha ira?

▪ Ano an igintututdo han ilustrasyon mahitungod han mga talanton?

▪ Hin-o an mga uripon, ngan ano an mga panag-iya nga igintapod ha ira?

▪ Kakan-o inabot an agaron basi makigtuhay, ngan ano an iya hinbaroan?

▪ Ano nga kalipay an naeksperyensyahan han matinumanon nga mga uripon, ngan ano an nahitabo ha ikatulo ngan maraot nga uripon?

▪ Durante han presensya han Kristo, ano nga paghukom an iya bubuhaton?

▪ Paonan-o nagin manurunod han Ginhadian an mga karnero?

▪ Kakan-o nagtikang an “tinikangan han kalibotan”?

▪ Ano an basihan ha paghukom ha mga tawo kon mga karnero hira o mga kanding?