Kapitulo 122

Tikang kan Pilato Gindara kan Herodes Ngan Iginbalik

BISAN kon waray magnigar hi Jesus kan Pilato nga usa hiya nga hadi, nagsaysay hiya nga an iya Ginhadian diri tarhog ha Roma. “An akon ginhadian diri dinhi hini nga kalibotan,” siring niya. “Kon aanhi ha kalibotan an akon ginhadian, makikig-away unta an akon mga sumurunod basi diri ako maitubyan ha mga Judio. Pero sugad han ginsiring ko, an akon ginhadian diri dinhi hini nga kalibotan.” Tulo ka beses nga iginsumat ni Jesus nga may Ginhadian hiya, pero diri dinhi ha tuna.

Kondi ginpakianhan pa hiya ni Pilato: “Kon sugad, hadi ka ba?” Karuyag niya sidngon, hadi ka ba bisan kon an imo Ginhadian diri dinhi hini nga kalibotan?

Ginklaro ni Jesus nga husto an pagsabot ni Pilato. Binaton hiya: “Ikaw mismo an nasiring nga hadi ako. Tungod hini natawo ako, ngan tungod hini kinanhi ako ha kalibotan, basi magpamatuod han kamatuoran. An tagsa nga nadapig ha kamatuoran namamati ha akon tingog.”

Oo, an pagpamatuod han “kamatuoran” amo gud an katuyoan ni Jesus ha pagkanhi ha tuna, labi na an kamatuoran mahitungod han iya Ginhadian. Andam hiya magin matinumanon bisan pa mamatay hiya tungod hito nga kamatuoran. Bisan kon hi Pilato nagpakiana, “Ano an kamatuoran?” waray na hiya maghulat hin dugang nga esplikasyon. An iya nabatian igo na basi makahimo hin desisyon.

Kinadto na liwat hi Pilato ha mga tawo nga naghuhulat ha gawas han palasyo. Posible nga sapit niya hi Jesus han ginsidngan niya an punoan nga mga saserdote ngan an ira mga kaupod: “Waray ako nakikita nga sayop hini nga tawo.”

Nasina an mga tawo hito nga desisyon, salit nag-insister hira: “Nagigin hinungdan han kasamok an iya igintututdo ha mga tawo ha bug-os nga Judea, tikang pa ha Galilea tubtob dinhi.”

Sigurado nga nahipausa gud hi Pilato ha sobra nga kapanatiko han mga Judio. Salit, samtang naggiginuliat an punoan nga mga saserdote ngan an katigurangan, inatubang hi Pilato kan Jesus ngan ginpakianhan: “Diri ka ba nakakabati nga damu an igin-aakusar ha imo?” Pero waray bumaton hi Jesus. Nahipausa hi Pilato kay kalmado hi Jesus bisan pa han grabe nga mga akusasyon.

Han hinbaroan ni Pilato nga taga-Galilea hi Jesus, nakahunahuna hiya hin paagi basi makagawas ha responsabilidad. An magmarando ha Galilea nga hi Herodes Antipas (anak ni Herodes nga Bantogan), nakadto ha Jerusalem para ha Paskua, salit igintubyan ni Pilato hi Jesus ha iya. Ginpapugotan hadto ni Herodes Antipas hi Juan nga Parabaptis, ngan han hinbatian niya nga nagbubuhat hi Jesus hin mga milagro nahadlok gud hiya kay kahuna niya nga hi Jesus amo hi Juan nga ginbanhaw.

Yana, nalilipay gud hi Herodes nga makikita niya hi Jesus. Diri kay interesado hiya ha kaopayan ni Jesus o karuyag niya masiguro kon an mga akusasyon ha iya totoo o diri. Lugod, karuyag la niya mag-usisa ngan naglalaom nga makakita han mga milagro ni Jesus.

Pero waray buhata ni Jesus an ginlalaoman ni Herodes. Ha pagkamatuod, waray hiya bumaton han ginpakianhan hiya. Tungod kay napakyas, ginhimo hiya nga pataraw-an ni Herodes ngan han iya mga gwardya nga sundalo. Ginsul-utan hiya hin magarbo nga bado ngan gintamay. Katapos iginbalik hiya kan Pilato. Salit nagin magsangkay hi Herodes ngan hi Pilato, kay hadto magkaaway hira.

Han iginbalik hi Jesus, iginpatawag ni Pilato an punoan nga mga saserdote, an Judio nga mga opisyal, ngan an mga tawo. Nagsiring hiya: “Gindara niyo ha akon ini nga tawo nga gin-aakusaran nga nagsusulsol ha mga tawo nga magrebelde. Yana kitaa! gin-imbistigar ko hiya ha iyo atubangan pero waray ako nakita nga basihan han iyo mga akusasyon ha iya. Ha pagkamatuod, hi Herodes waray liwat nakita ha iya nga sala kay iginbalik hiya ha aton, ngan waray hiya nabuhat nga angay hin kamatayon. Salit sisirotan ko hiya ngan bubuhian.”

Duha ka beses iginpahayag ni Pilato nga waray sala hi Jesus. Karuyag gud niya nga buhian hi Jesus, kay nasantop niya nga igintubyan la hiya tungod han kaawa han mga saserdote. Samtang nagsasari hi Pilato nga buhian hi Jesus, mas nakombinse pa hiya nga buhaton ito. Han nalingkod hiya ha lingkoran ha paghukom, nagpatugon ha iya an iya asawa nga nasiring: “Ayaw paglabot hiton matadong nga tawo, kay nag-inop ako hin makaharadlok [posible nga tikang ha Dios] mahitungod ha iya yana nga adlaw.”

Maaram hi Pilato nga angay gud niya buhian ini nga tawo nga waray sala, pero paonan-o? Juan 18:36-38; Lucas 23:4-16; Mateo 27:12-14, 18, 19; 14:1, 2; Marcos 15:2-5.

▪ Ano an iginbaton ni Jesus ha pakiana mahitungod han iya pagin hadi?

▪ Ano an “kamatuoran” nga tungod hito kinanhi hi Jesus ha tuna basi magpamatuod?

▪ Ano an desisyon ni Pilato, ngan ano an reaksyon han mga tawo? Ano an ginbuhat ni Pilato kan Jesus?

▪ Hin-o hi Herodes Antipas? Kay ano nga nalilipay gud hiya nga makita hi Jesus, ngan ano an iya ginbuhat kan Jesus?

▪ Kay ano nga karuyag gud ni Pilato nga buhian hi Jesus?