Kapitulo 105

Tinikangan han Makatirigamnan nga Adlaw

PAGBAYA ni Jesus ha Jerusalem han Lunes nga gab-i, binalik hiya ha Betania ha este nga bakilid han Bukid han mga Olibo. Natapos na an duha ka adlaw han iya kataposan nga ministeryo ha Jerusalem. Sigurado nga han gab-i hinuron na liwat hiya ha iya sangkay nga hi Lasaro. Ito an ikaupat ka gab-i niya ha Betania han inabot hiya didto han Biernes tikang ha Jerico.

Yana, temprano pa ha aga han Martes, Nisan 11, nagbabaktas na liwat hi Jesus ngan an mga disipulo. Makatirigamnan gud ito nga adlaw han iya ministeryo, an iya pinakaokupado nga adlaw. Ito an ultimo nga adlaw nga pagkadto niya ha templo, ngan pagsangyaw ha publiko antes han pagbista ngan pagpatay ha iya.

Amo gihapon nga dalan an gin-agian ni Jesus ngan han mga disipulo ha Bukid han mga Olibo ngadto ha Jerusalem. Ha dalan tikang ha Betania, nakita ni Pedro an kahoy nga iginsumpa ni Jesus ha naglabay nga aga. “Rabbi, kitaa!” nagsiring hiya, “an igera nga imo iginsumpa uga na.”

Kay ano nga ginpatay ni Jesus an kahoy? Iya iginsaysay an hinungdan: “Ha pagkamatuod, susumatan ko kamo: Kon may pagtoo kamo ngan diri nagruruhaduha, mahihimo niyo diri la an pariho han akon ginbuhat hito nga igera, kondi kon sidngan liwat niyo ini nga bukid [an Bukid han mga Olibo nga ira gintitindogan], ‘Magabot ka ngan mahilabog ngadto ha dagat,’ mahitatabo ito. Ngan an ngatanan nga iyo pangaroon pinaagi ha pag-ampo nga may pagtoo, makakarawat niyo.”

Salit han nauga an kahoy nga iginsumpa ni Jesus, naghatag hiya hin leksyon ha mga disipulo nga kinahanglan magkaada hira hin pagtoo ha Dios. Nagsiring hiya: “Too kamo nga an ngatanan nga iyo igin-aampo ngan gin-aaro sigurado nga makakarawat niyo.” Importante gud ito nga leksyon para ha ira, labi na kay diri mag-iiha maatubang hira hin magkuri nga pagsari! Pero an kauga han igera may koneksyon liwat ha kalidad han pagtoo.

An nasud han Israel malimbong pagkit-on, pariho han igera. Bisan kon an nasud may kasabotan ha Dios ngan baga hin nagtutuman han iya mga balaud, napamatud-an nga waray hira pagtoo, waray maopay nga bunga. Tungod han kawaray pagtoo, iginsasalikway nira bisan an Anak mismo han Dios! Salit han nauga an waray bunga nga igera, matin-aw nga iginpapakita ni Jesus kon ano an mahitatabo hiton waray bunga ngan waray pagtoo nga nasud.

Waray pag-iha, hi Jesus ngan an mga disipulo sinulod ha Jerusalem ngan sugad han ira nahiaraan, kinadto hira ha templo ngan nanutdo hi Jesus. Nahinunumdoman pa han punoan nga mga saserdote ngan katigurangan an ginbuhat ni Jesus han naglabay nga adlaw ha mga parabalyo hin kwarta, salit ginkwestyon nira ito: “Ha ano nga awtoridad ginbubuhat mo ini nga mga butang? Ngan hin-o an naghatag ha imo hini nga awtoridad?”

Binaton hi Jesus: “May ipapakiana liwat ako ha iyo. Kon mabaton niyo, babatunon ko kamo kon ha ano nga awtoridad ginbubuhat ko ini nga mga butang: Tikang diin an awtoridad ni Juan ha pagbawtismo, tikang ha langit o ha mga tawo?”

An mga saserdote ngan katigurangan nag-iristorya kon ano an ira ibabaton. “Kon sumiring kita, ‘Tikang ha langit,’ masiring hiya ha aton, ‘Kay ano man nga waray kamo tumoo ha iya?’ Pero kon sumiring kita, ‘Tikang ha mga tawo,’ delikado kita ha mga tawo kay natoo hira nga propeta hi Juan.”

Diri maaram an mga lider kon ano an ibabaton. Salit nagsiring hira: “Diri kami maaram.”

Tungod hito hi Jesus nagsiring: “Diri ko liwat isusumat ha iyo kon ha ano nga awtoridad ginbubuhat ko ini nga mga butang.” Mateo 21:19-27; Marcos 11:19-33; Lucas 20:1-8.

▪ Kay ano nga makatirigamnan gud an Martes, Nisan 11?

▪ Ano nga leksyon an igintutdo ni Jesus mahitungod han nauga nga igera?

▪ Ano an iginbaton ni Jesus ha mga nagkwestyon kon ha ano nga awtoridad ginbubuhat niya an mga butang?