Kapitulo 54

“Totoo nga Tinapay Tikang ha Langit”

DAMU gud an nahitabo ha naglabay nga adlaw. Milagroso nga ginpakaon ni Jesus an yinukot ngan ginlikyan an mga tawo nga nagplano nga himoon hiya nga hadi. Han gab-i, naglakat hiya ha mabalud nga Dagat han Galilea; gintalwas hi Pedro nga nagtikalunod han naglakat ha mabalud nga dagat; ngan ginpakalma an mga balud basi diri malunod an mga disipulo.

Hirani ha Capernaum, nabilngan hi Jesus han mga tawo nga milagroso nga iya ginpakaon didto dapit ha Dagat han Galilea, ngan nagpakiana hira: “Rabbi, kakan-o ka inabot dinhi?” Ginsaway hira ni Jesus kay ginpinamiling la nira hiya basi makakaon na liwat hin libre. Gin-aghat niya hira nga mangalimbasog, diri para ha pagkaon nga nadudunot, kondi para ha pagkaon nga diri nadudunot nga naghahatag hin kinabuhi nga waray kataposan. Salit nagpakiana hira: “Ano an amon bubuhaton basi mahimo an buruhaton nga nalilipayan han Dios?”

Usa la an ginsiring ni Jesus nga pinakaimportante. Siring niya: “Ini an nalilipayan han Dios, nga magpakita kamo hin pagtoo ha Iya ginsugo.”

Pero diri natoo an mga tawo ha iya bisan pa han ngatanan nga milagro nga iya ginbuhat, kay nagpakiana la gihapon hira: “Kon sugad, ano an imo bubuhaton sugad nga tigaman basi makita namon ito ngan tumoo kami ha imo? Ano nga milagro an imo bubuhaton? An amon kaapoy-apoyan nangaon hin manna ha kamingawan, sugad la han nahisurat, ‘Naghatag hiya ha ira hin tinapay tikang ha langit basi kaunon.’”

Sugad nga baton ha ira pangaro hin tigaman, iginpatin-aw ni Jesus an Burabod han milagroso nga mga tagana. Nagsiring hiya: “Diri hi Moises an naghatag ha iyo han tinapay tikang ha langit, kondi an akon Amay an naghahatag ha iyo han totoo nga tinapay tikang ha langit. Kay an tinapay nga ginhahatag han Dios amo an usa nga tikang ha langit ngan naghahatag hin kinabuhi ha kalibotan.”

“Ginoo,” siring nira, “tagi kami pirme hito nga tinapay.”

“Ako an tinapay nga naghahatag hin kinabuhi,” siring ni Jesus. “An napakanhi ha akon diri na gud magugutom, ngan an nagpapakita hin pagtoo ha akon diri na gud uuhawon. Kondi nagsiring na ako ha iyo nga bisan kon nakikita niyo ako, diri kamo natoo. An ngatanan nga iginhahatag ha akon han Amay makanhi ha akon, ngan an napakanhi ha akon diri ko gud paiiwason, kay linusad ako tikang ha langit diri ha pagbuhat han akon kaburut-on, kondi ha pagbuhat han kaburut-on han nagsugo ha akon. Ini an kaburut-on han nagsugo ha akon, nga diri ko mawara an bisan usa han ngatanan nga iginhatag ha akon, kondi sadang ko hira banhawon ha kataposan nga adlaw. Kay kaburut-on han akon Amay nga an tagsa nga nakilala ha Anak ngan nagpapakita hin pagtoo magkaada kinabuhi nga waray kataposan.”

Tungod hito nagngurutob an mga Judio ha ginsiring ni Jesus nga, “Ako an tinapay tikang ha langit.” Ha ira pagkita ordinaryo la hiya nga anak han tawo, salit pariho ha mga taga-Nazaret, waray liwat hira tumoo ngan nagsiring: “Diri ba hiya hi Jesus nga anak ni Jose, nga an mga kag-anak kilala naton? Kay ano nga nasiring hiya yana, ‘Linusad ako tikang ha langit’?”

“Ayaw na kamo pagreklamo,” siring ni Jesus. “Waray tawo nga makakakanhi ha akon gawas la kon igpahirani hiya han Amay nga nagsugo ha akon, ngan babanhawon ko hiya ha kataposan nga adlaw. Sumala ha sinurat han mga Propeta, ‘Hira ngatanan tututdoan ni Jehova.’ An tagsa nga namamati ha Amay ngan nahibabaro napakanhi ha akon. Waray pa tawo nga nakakita ha Amay, labot la ha iya nga tikang ha Dios. Hiya la an nakakita ha Amay. Ha pagkamatuod susumatan ko kamo, An natoo may kinabuhi nga waray kataposan.”

Hi Jesus nagpadayon: “Ako an tinapay nga naghahatag hin kinabuhi. An iyo kaapoy-apoyan kinaon hin manna ha kamingawan pero namatay la gihapon hira. Pero bisan hin-o nga kumaon han tinapay nga tikang ha langit diri mamamatay. Ako an buhi nga tinapay tikang ha langit. Bisan hin-o nga kumaon hini nga tinapay mabubuhi ha kadayonan.” Oo, pinaagi ha pagpakita hin pagtoo kan Jesus, nga ginpakanhi han Dios, an mga tawo magkakaada hin kinabuhi nga waray kataposan. Diri ito maihahatag han manna, o han bisan ano nga tinapay!

An pagsaysay mahitungod han tinapay tikang ha langit nahitabo waray pag-iha katapos mabilngan han mga tawo hi Jesus hirani ha Capernaum. Kondi padayon nga ginhisgotan ito han nagtutdo hi Jesus ha sinagoga ha Capernaum. Juan 6:25-51, 59; Salmo 78:24; Isaias 54:13; Mateo 13:55-57.

▪ Ano an mga nahitabo antes hisgotan ni Jesus an tinapay tikang ha langit?

▪ Tungod han ginbuhat pa la ni Jesus, kay ano nga diri angay an pangaro hin tigaman?

▪ Kay ano nga nagngurutob an mga Judio han nagsiring hi Jesus nga hiya an totoo nga tinapay tikang ha langit?

▪ Diin iginsaysay an mahitungod han tinapay tikang ha langit?