Kapitulo 131

Ultimo nga mga Pagpakita, Ngan han Pentekostes 33 C.E.

NAGPLANO hi Jesus nga makigkita ha 11 nga apostol ha bukid ha Galilea. Posible nga ginsumatan liwat an iba nga disipulo mahitungod hito, ngan sobra 500 ka tawo an kinadto. Makalilipay gud ito nga katirok han nagpakita hi Jesus ngan nagtutdo ha ira!

Usa han iginsaysay ni Jesus ha damu nga tawo amo an paghatag han Dios ha iya han ngatanan nga awtoridad ha langit ngan ha tuna. Nagsagda hiya: “Kadto kamo ha mga tawo han ngatanan nga nasud ngan tutdui hira basi magin akon mga disipulo, bawtismuhi hira ha ngaran han Amay ngan han Anak ngan han baraan nga espiritu, tutdui hira ha pagtuman han ngatanan nga akon iginsugo ha iyo.”

Hunahuna la! An kalalakin-an, kababayin-an, ngan an kabataan ginsugo nga buligan an iba nga magin mga disipulo. Pero pupugngan han mga parakontra an ira pagsangyaw ngan panutdo, salit ginpasarig hira ni Jesus: “Hinumdumi niyo nga kaupod niyo ako ha ngatanan nga adlaw tubtob ha ikatarapos hini nga sistema.” Padayon nga makakaupod hi Jesus han iya mga sumurunod pinaagi han baraan nga espiritu, basi buligan hira ha pagtuman han ira ministeryo.

Ha kabug-osan, nagpakita hi Jesus ha mga disipulo ha sulod hin 40 ka adlaw tikang nga nabanhaw hiya. Ha iya mga pagpakita, gintutdoan niya hira mahitungod han Ginhadian han Dios ngan ginpabug-atan niya kon ano an ira mga responsabilidad sugad nga mga disipulo. Ha usa nga higayon, nagpakita pa ngani hiya ha iya bugto ha nanay nga hi Santiago ngan ginkombinse inin diri tumuroo hadto nga Hiya gud an Kristo.

Han nakadto pa an mga apostol ha Galilea, ginsugo hira ni Jesus nga bumalik ha Jerusalem. Han nakigkita hiya ha ira didto, nagsiring hiya: “Ayaw kamo pagbaya ha Jerusalem, lugod padayon nga maghulat kamo ha iginsaad han Amay nga hinbatian niyo ha akon; kay hi Juan nagbawtismo ha tubig, pero diri mag-iiha katapos hini, babawtismohan kamo pinaagi han baraan nga espiritu.”

Waray pag-iha, nakigkita utro hi Jesus ha mga apostol ngan igin-upod hira tipagawas ha syudad tubtob ha Betania, nga nahimumutang ha este nga bakilid han Bukid han mga Olibo. Diri katoohan nga bisan pa han ngatanan nga ginsiring ni Jesus nga diri mag-iiha makadto na hiya ha langit, natoo la gihapon hira nga dinhi ha tuna ig-iestablisar an iya Ginhadian. Salit nagpakiana hira: “Ginoo, igpapahiuli mo ba an Ginhadian ha Israel hini nga panahon?”

Imbes nga tadungon an ira sayop nga pagsabot, nagsiring la hi Jesus: “Diri niyo kinahanglan hibaroan an mga panahon o itinanda nga mga adlaw, kay an Amay la an may awtoridad ha pagdesisyon.” Katapos, ginpabug-atan na liwat niya an buruhaton nga iya iginsugo ha ira: “Makarawat kamo hin gahum kon an baraan nga espiritu umabot na ha iyo, ngan magigin mga saksi ko kamo ha Jerusalem, ha bug-os nga Judea ngan Samaria, ngan tubtob ha pinakahirayo nga lugar ha tuna.”

Samtang nagkikinita hira kan Jesus, nagtipaigbaw hiya ngadto ha langit, gintabonan hiya hin dampog ngan waray na nira hiya makita. Katapos mabag-o an iya pisikal nga lawas, sinaka hiya ha langit sugad nga espiritu nga persona. Han nagkikinita ha langit an 11 nga apostol, may tinindog ha sapit nira nga 2 nga lalaki nga busag an bado. Ini nga nagpakatawo nga mga anghel nagpakiana: “Mga taga-Galilea, kay ano nga nagkikinita kamo ha langit? Hi Jesus nga gindara ngadto ha langit makanhi ha paagi nga pariho han nakita niyo nga pagkadto niya ha langit.”

An pagbaya ni Jesus ha tuna waray ig-anunsyo ha publiko, ngan an iya magtinumanon la nga sumurunod an nakakita. Salit mabalik hiya ha pariho nga paagi—diri ito ig-aanunsyo ha publiko ngan an iya magtinumanon nga sumurunod la an makakasabot nga binalik na hiya ngan nagtikang na an iya presensya ha pagmando han Ginhadian.

Yana, an mga apostol linusad ha Bukid han mga Olibo, ginlatas an Walog han Kidron, ngan sinulod utro ha Jerusalem. Nagpabilin hira didto sugad nga pagsunod han sugo ni Jesus. Paglabay hin 10 ka adlaw, ha Piyesta han mga Judio han Pentekostes 33 C.E., samtang nagkakatirok an 120 nga disipulo ha kwarto ha igbaw didto ha Jerusalem, tigda la nga may hinbatian nga aringasa nga pariho hin haganas han makusog nga hangin ha bug-os nga balay. Nakakita hira hin mga dila nga sugad hin kalayo, ngan an tagsa hito hinugdon ha ulo han kada usa ha ira, ngan hira ngatanan nakayakan hin iba-iba nga linggwahe. Ito an pagbuhos han baraan nga espiritu nga iginsaad ni Jesus! Mateo 28:16-20; Lucas 24:49-52; 1 Corinto 15:5-7; Buhat 1:3-15; 2:1-4.

▪ Antes bumaya hi Jesus, hin-o an iya mga ginsugo didto ha bukid ha Galilea? Ano an iya mga iginsugo?

▪ Ano an iginpasarig ni Jesus ha iya mga disipulo? Ha ano nga paagi padayon nga makakaupod hiya nira?

▪ Tikang nga nabanhaw hi Jesus, mationan-o kaiha hiya nagpakita ha mga disipulo? Ano an iya igintutdo ha ira?

▪ Nagpakita hi Jesus ha usa nga diri tumuroo hadto antes hiya mamatay. Hin-o hiya?

▪ Ano an duha nga ultimo nga pakigkita ni Jesus ha iya mga apostol? Ano an mga nahitabo durante hito?

▪ Ha ano nga paagi mabalik hi Jesus nga pariho han iya pagbaya?

▪ Ano an nahitabo han Pentekostes 33 C.E.?