Kapitulo 79

Usa nga Nasud an Nawara Pero May mga Nahibilin

WARAY pag-iha katapos makiistorya hi Jesus ha mga nagkatirirok ha gawas han balay han Pariseo, may mga nagsumat ha iya “mahitungod han mga taga-Galilea nga ginpatay . . . [han gobernador han Roma nga hi Ponsio] Pilato samtang naghahalad hira.” Posible nga ito nga mga taga-Galilea an ginpamatay han nagprotesta an yinukot nga Judio han gin-gamit ni Pilato an kwarta ha templo para ha paghimo hin kanal han tubig pakadto ha Jerusalem. Bangin karuyag ipasabot han mga nagsumat kan Jesus nga nahitabo ito nga trahedya ha mga taga-Galilea tungod han ira magraot nga buhat.

Kondi gintadong ni Jesus an ira panhunahuna pinaagi ha pagpakiana: “Naghuhunahuna ba kamo nga ha ngatanan nga taga-Galilea, hira an pinakasalaan kay nahitabo ito ha ira? Diri!” Katapos gin-gamit niya an nahitabo basi pahamangnoan an mga Judio: “Mahinunugad liwat kamo ngatanan ha ira kon diri kamo magbasol.”

Gin-unabi liwat ni Jesus an usa pa nga trahedya ha ira lugar nga posible may kalabotan ha paghimo han kanal. Nagpakiana hiya: “O naghuhunahuna ba kamo nga an 18 nga namatay tungod han karumpagi han torre ha Siloam mas makasasala kay ha iba nga mga tawo nga naukoy ha Jerusalem?” Diri. Namatay hira diri tungod han ira karaotan, siring niya. Lugod, “an panahon ngan an higayon” o hitabo nga diri ginlalaoman an hinungdan hito. Gin-gamit utro niya ito nga hitabo basi magpahamangno: “Mamamatay liwat kamo ngatanan pariho ha ira kon diri kamo magbasol.”

Katapos naghatag pa hi Jesus hin angayan nga ilustrasyon: “May usa ka tawo nga may igera ha iya uma, ngan kinadto hiya basi kitaon kon may bunga ito, pero waray hiya nakita. Ngan ginsidngan niya an parauma, ‘Tulo ka tuig na nga nagkikinanhi ako basi kitaon kon may bunga na ini nga igera, kondi waray ako nakikita. Pudla ito! Kay ano nga kakaragan la hito an tuna?’ Binaton ha iya an parauma, ‘Agaron, pabay-i anay ito hini nga tuig tubtob nga maukaran ko an palibot hito ngan mabutangan hin abuno. Katapos, kon magbunga ito, maopay. Pero kon diri, pudla ito.’”

Sobra tulo ka tuig na nga nangangalimbasog hi Jesus nga patuboon an pagtoo han Judio nga nasud. Pero pipira ka gatos la nga disipulo an nagin bunga han iya pangalimbasog. Yana nga mag-uupat ka tuig na an iya ministeryo, mas naniguro gud hiya ha pag-ukad ngan pag-abuno ha palibot han igera nga nagsisimbolo ha mga Judio, pinaagi han maduruto nga pagsangyaw ngan pagtutdo ha Judea ngan Perea. Pero nakarag la ito! Waray magbasol an nasud salit mabubungkag ito. Pero may mga nahibilin hito nga nasud nga nagbasol.

Waray pag-iha katapos hito, nagtutdo hi Jesus ha sinagoga ha adlaw han Sabbath. May babaye didto nga 18 ka tuig na nga diri nakakatindog hin tadong kay ginpapasakitan hiya hin demonyo. Mapinairon nga ginsidngan hiya ni Jesus: “Babaye, talwas ka na ha imo sakit.” Ginkaptan hiya ni Jesus ngan nakatindog dayon hin tadong, ngan gindayaw niya an Dios.

Pero nasina an punoan nga opisyal han sinagoga. “May unom ka adlaw ha pagtrabaho,” nagreklamo hiya. “Salit hito la nga mga adlaw kamo pagpatambal, diri ha adlaw han Sabbath.” Ginkilala han opisyal nga may gahum hi Jesus ha pagtambal pero ginkondenar niya an mga tawo ha pagpatambal ha adlaw han Sabbath!

“Mga hipokrito,” binaton hi Jesus, “diri ba ginbabadbaran niyo an toro o an asno ha kwadra ngan gintutugwayan ngadto ha maiinuman? Diri ba angay liwat talwason ha adlaw han Sabbath ini nga babaye nga anak ni Abraham, nga gin-gapos ni Satanas hin 18 ka tuig na?”

Pakabati hito han mga nakontra kan Jesus, naawod hira. Pero an mga tawo nalipay gud han ngatanan nga urusahon nga ginbuhat ni Jesus nga ira nakita. Salit gin-utro niya an duha nga ilustrasyon nga nagtatagna mahitungod han Ginhadian han Dios, nga iya iginsumat mga usa ka tuig na an naglabay samtang nalingkod ha baluto ha Dagat han Galilea. Lucas 13:1-21; Eklesiastes 9:11; Mateo 13:31-33.

▪ Ano nga mga trahedya an gin-unabi dinhi, ngan ano nga leksyon an igintutdo ni Jesus pinaagi hito?

▪ Ano an kahulogan han ilustrasyon mahitungod han waray bunga nga igera, sugad man han mga pangalimbasog nga ginhimo basi magbunga ito?

▪ Paonan-o ginkilala han punoan nga opisyal nga may gahum hi Jesus ha pagtambal? Paonan-o iginbuhayhag ni Jesus an pagkahipokrito han opisyal?