Kapitulo 71

Waray Gud Tumoo an mga Pariseo

NAHADLOK an mga kag-anak han buta hadto nga makililimos han iginpatawag hira han mga Pariseo. Maaram hira nga ginkasarabotan nga an bisan hin-o nga tumoo kan Jesus papaiwason ha sinagoga. Ito nga pagdirî nga makig-upod ha iba ha komunidad mahimo magresulta hin duro nga kakurian, labi na ha pobre nga pamilya. Salit naghirot gud an mga kag-anak.

“Ini ba an iyo anak nga ginsisiring niyo nga natawo nga buta?” nagpakiana an mga Pariseo. “Kay ano man nga nakakakita na hiya yana?”

“Maaram kami nga hiya an amon anak ngan natawo hiya nga buta,” siring han mga kag-anak. “Pero diri kami maaram kon paonan-o hiya nakakita, ngan diri liwat kami maaram kon hin-o an nagpukrat han iya mga mata.” Sigurado nga ginsumatan hira han ira anak han ngatanan, pero maaramon nga nagsiring hira: “Hiya an pakianhi niyo. Daku na hiya. Hiya an magsusumat ha iyo.”

Salit, gintawag na liwat hiya han mga Pariseo. Nagsari hira pagtarhog ha iya pinaagi ha pagsiring nga nakatirok hira hin ebidensya kontra kan Jesus. “Himayaa an Dios,” nagsugo hira. “Maaram kami nga ito nga tawo makasasala.”

Ito nga buta hadto waray rumiwa ha ira akusasyon, ngan nagsiring: “Kon makasasala man hiya, diri ako maaram.” Pero nagsumat hiya: “Maaram gud ako nga bisan kon buta ako hadto, yana nakakakita na ako.”

Basi makabiling hin sayop ha iya testimonya, nagpakiana utro an mga Pariseo: “Ano an iya ginbuhat ha imo? Paonan-o niya ginpukrat an imo mga mata?”

“Ginsumatan ko na kamo,” nagreklamo hiya, “pero waray kamo pamati. Kay ano nga karuyag niyo mabatian ito utro?” Nakakainsulto nga nagpakiana hiya: “Diri niyo karuyag nga magin mga disipulo niya, diri ba?”

Tungod hito nasina an mga Pariseo. “Disipulo ka hito nga tawo,” nag-akusar hira, “pero kami mga disipulo ni Moises. Maaram kami nga an Dios nakiistorya kan Moises; pero mahitungod hito nga tawo, diri kami maaram kon diin hiya tikang.”

Nahipausa an mapainubsanon nga makililimos salit nagsiring hiya: “Urusahon gud nga diri kamo maaram kon diin tikang hiya nga nagpukrat han akon mga mata.” Ano an aton mahibabaroan hini? Nangatadongan an makililimos basado ha gintotoohan han mga tawo: “Maaram kita nga an Dios diri namamati ha magpakasasala, pero namamati hiya ha bisan hin-o nga may kahadlok ha Dios ngan nagbubuhat han iya kaburut-on. Tikang hadto waray pa gud hinbatian nga nagpukrat han mga mata hin natawo nga buta.” Salit matin-aw an iginpapasabot hito: “Kon ini nga tawo diri tikang ha Dios, diri hiya makakahimo hin bisan ano.”

Waray makabaton an mga Pariseo ha sugad kaprangka ngan kaklaro nga pangatadongan. Diri nira makarawat ito nga kamatuoran, salit nasina hira ha iya: “Natawo ka nga makasasala, kay ano nga gintututdoan mo kami?” Katapos ginpagawas nira hiya, posible nga ginpaiwas hiya ha sinagoga.

Hinbaroan ni Jesus an ginbuhat han mga Pariseo, ngan han nakit-an niya an lalaki, iya ginpakianhan: “Natoo ka ba ha Anak han tawo?”

An buta hadto nga makililimos binaton: “Hin-o hiya, ginoo, basi tumoo ako ha iya?”

“An imo kaistorya yana amo hiya,” nagsumat hi Jesus.

Yinukbo dayon an lalaki ha iya ngan nagsiring: “Natoo gud ako ha iya, Ginoo.”

Katapos nagsaysay hi Jesus: “Kinanhi ako ha kalibotan tungod hini nga paghukom: basi makakita an diri nakakakita ngan mabuta an mga nakakakita.”

An mga Pariseo nga nagpipinamati nagpakiana: “Naghuhunahuna ka ba nga mga buta liwat kami?” Kon kakarawaton nira nga nabutahan an ira hunahuna, may rason unta hira han ira pagkontra kan Jesus. Nagsiring pa hi Jesus: “Kon buta kamo, waray unta kamo sala.” Pero nag-insister hira nga diri hira buta ngan diri nanginginahanglan hin espirituwal nga kalamrag. Salit nagsiring hiya: “Yana nasiring kamo, ‘Nakakakita kami.’ Nakakasala pa gihapon kamo.” Juan 9:19-41.

▪ Kay ano nga nahadlok an mga kag-anak han buta hadto han iginpatawag hira han mga Pariseo? Paonan-o hira naghirot ha pagbaton?

▪ Paonan-o an mga Pariseo nagsari pagtarhog ha lalaki nga buta hadto?

▪ Ano nga pangatadongan han lalaki an nakapasina ha mga Pariseo?

▪ Kay ano nga waray rason nga kontrahon han mga Pariseo hi Jesus?