Kapitulo 45

Waray Laumi nga Magin Disipulo

MAKAHARADLOK gud an kiritaon han paglusad ni Jesus ha baybayon! Tikang ha hirani nga lubnganan, dinalagan ngadto ha iya an duha nga mapintas nga lalaki. Ginsaniban hira hin demonyo. Posible nga mas bayolente an usa ngan mas maiha na nga nag-aantos kay kontrolado han demonyo, salit hiya la an ginhisgotan.

Maiha na nga diri nagbabado inin makalolooy nga lalaki nga naukoy ha mga lubnganan. Adlaw ngan gab-i naggiginuliat hiya ngan ginsasamad hin bato an iya kalugaringon. Bayolente gud hiya, salit waray naruruyag pag-agi hito nga dalan. Makadamu na hiya gaposa hin kadena pero nauutod niya ito, pati an puthaw ha iya mga tiil. Waray gud nakakapugong ha iya.

Han hirani na hiya kan Jesus, yinukbo hiya ngan ginpaguliat han mga demonyo nga nagkukontrol ha iya: “Ano an imo tuyo ha akon, Jesus, Anak han Gihitaasi nga Dios? Pagsumpa ha Dios nga diri mo ako pasasakitan.”

Ginsinidngan hiya ni Jesus: “Gawas tikang hito nga tawo, ikaw nga maraot nga espiritu.” Pero ginpakianhan hiya ni Jesus: “Ano an imo ngaran?”

Binaton hiya: “Lehiyon an akon ngaran, kay damu kami.” Nalilipay gud an mga demonyo kon nagsasakit an ira ginsasaniban, ngan posible nga karuyag hiton talawan nga mga espiritu nga magkaurupod ha pag-atake. Pero han nakada hira ha atubangan ni Jesus, nagpinakimalooy hira nga diri hira pakadtoon ha kahiladman. Nakita na liwat naton nga gamhanan hi Jesus; nadaog niya bisan an mapintas nga mga demonyo. Iginpapakita liwat hini nga maaram an mga demonyo nga an paglabog ha ira ha kahiladman, upod han ira lider nga hi Satanas nga Yawa, amo an paghukom ha ira han Dios ha tidaraon.

May panon hin mga 2,000 nga baboy nga nangangaon ha hirani nga bukid. Salit an mga demonyo nagsiring: “Pakadtoa kami ha mga baboy basi makasulod kami ha ira.” An mga demonyo posible nga naabat hin diri normal ngan sadistiko nga kalipay ha pagsanib ha mga tawo ngan mga hayop. Han gintugotan hira ni Jesus, an ngatanan nga 2,000 nga baboy nagdadlagan ngadto ha pangpang ngan nagkalulumos ha dagat.

Han nakita ito han mga nag-aataman, nagdadlagan hira basi manumat ha syudad ngan ha kaumhan. Salit an mga tawo kinadto basi kitaon an nahitabo. Pag-abot nira, nakita nira nga ginawas na ha iya an mga demonyo. Nakabado na hiya ngan maopay na an panhunahuna ngan nalingkod ha may tiil ni Jesus!

An nagpakakita nanumat kon paonan-o nag-opay an lalaki. Ginsumatan liwat nira an mga tawo han urusahon nga kamatay han mga baboy. Pakabati hito han mga tawo, nahadlok gud hira ngan ginhangyo hi Jesus nga bumaya ha ira lugar. Salit binaya hiya ngan sinakay ha baluto. An nag-opay nga lalaki nakimalooy kan Jesus nga tugotan hiya nga umupod ha ira. Pero nagsiring hi Jesus: “Uli ha imo mga paryente, ngan isumat ha ira an ngatanan nga ginbuhat ni Jehova para ha imo ngan an kalooy niya ha imo.”

Kasagaran nga gintutugon ni Jesus an iya mga gintambal nga diri manumat ha bisan hin-o, kay diri niya karuyag nga iba an hunahunaon han mga tawo tungod han ginpasobrahan nga mga sumat. Pero ito nga iginsugo ni Jesus naiiba kay ito nga lalaki nga nag-opay magpapamatuod ha mga tawo nga bangin diri na masangyawan ni Jesus. Samtang nakikita liwat ito nga lalaki napapamatud-an nga may gahum hi Jesus ha pagbuhat hin maopay, ngan nababalewaray hito an diri maopay nga sumat tungod ha kamatay han mga baboy.

An nag-opay nga lalaki sinugot ha sugo ni Jesus salit linakat hiya. Iginsumat niya ha bug-os nga Decapolis an ngatanan nga ginbuhat ni Jesus ha iya, salit nahipausa gud an mga tawo. Mateo 8:28-34; Marcos 5:1-20; Lucas 8:26-39; Pahayag 20:1-3.

▪ Kay ano nga usa la nga ginsaniban hin demonyo an ginhisgotan nga duha man an nakadto?

▪ Ano an nagpapakita nga maaram an mga demonyo nga ilalabog hira ha kahiladman ha tidaraon?

▪ Kay ano nga naruruyag an mga demonyo pagsanib ha mga tawo ngan hayop?

▪ Kay ano nga naiiba an iginsugo ni Jesus ha lalaki nga ginsaniban hadto?