Kapitulo 67

Waray Nira Maaresto hi Jesus

SAMTANG nagpapadayon an Piyesta han mga Tabernakulo, an mga lider han relihiyon nagsugo hin mga opisyal basi arestuhon hi Jesus. Pero waray hiya tumago. Lugod, padayon nga nagsangyaw hiya ha publiko, nasiring: “Halipot na la an panahon nga makakaupod ko kamo antes ako kumadto ha nagsugo ha akon. Bibilngon ako niyo, pero diri niyo ako hiaagian, ngan diri kamo makakakadto ha akon kakadtoan.”

Waray ito masabti han mga Judio, salit nagpakianahay hira: “Mapakain ini nga tawo, nga diri naton hiya hiaagian? Makadto ba hiya ha mga Judio nga kaupod han mga Griego ngan magtututdo ha mga Griego? Ano an iya karuyag sidngon hini: ‘Bibilngon ako niyo, pero diri niyo ako hiaagian, ngan diri kamo makakakadto ha akon kakadtoan’?” Syempre, an ginhihisgotan ni Jesus amo an iya kamatayon ngan pagkabanhaw ngadto ha langit, diin diri makakasunod an iya mga kaaway.

Ikapito ngan ultimo na nga adlaw han piyesta. Kada aga han piyesta, usa nga saserdote an nagbubuhos hin tubig nga tikang ha Karigoan ha Siloam, basi umawas ha ubos han altar. Posible nga basi ipahinumdom ha mga tawo ini nga adlaw-adlaw nga seremonya, nagsiring hi Jesus ha daku nga tingog: “An bisan hin-o nga nauuhaw, pakadi, ngan paiinumon ko hiya. An natoo ha akon, sumala ha ginsisiring han Kasuratan, ‘Maawas tikang ha iya kasingkasing an mga salog han tubig nga naghahatag hin kinabuhi.’”

Ha pagkamatuod, ginhihisgotan ni Jesus an mag-opay gud nga resulta kon ibuhos na an baraan nga espiritu. Ito nga pagbuhos nahitabo han sumunod nga tuig han Pentekostes. Hito nga panahon, inawas an mga salog han tubig nga naghahatag hin kinabuhi han nagsangyaw ha mga tawo an 120 nga disipulo. Pero antes hito, waray pa makarawat an espiritu kay an mga disipulo han Kristo waray pa dihugi han baraan nga espiritu ngan waray pa tawaga basi mabuhi ha langit.

Sugad nga reaksyon ha igintutdo ni Jesus, an iba nagsiring: “Hiya gud An Propeta,” matin-aw nga an ira gin-uunabi amo an propeta nga labaw pa kan Moises nga iginsaad nga maabot. An iba nagsiring: “Hiya an Kristo.” Pero an iba rumiwa: “Ha Galilea gud ba magtitikang an Kristo? Diri ba an Kasuratan nasiring nga an Kristo magtitikang ha tulin ni David, ngan ha baryo han Betlehem nga gin-ukyan hadto ni David?”

Salit nagkabahin-bahin an mga tawo. Karuyag han iba nga arestuhon hi Jesus, pero waray gud nag-aresto ha iya. Han binalik an mga opisyal nga diri upod hi Jesus, an punoan nga mga saserdote ngan an mga Pariseo nagpakiana: “Kay ano nga waray niyo hiya dad-a nganhi?”

“Waray pa gud iba nga tawo nga nagyakan ha sugad nga paagi,” binaton an mga opisyal.

Nasina gud an mga lider han relihiyon, salit nagyakan hira hin nakakatamay, hin pakaraot, ngan hin nakakainsulto. Nagsiring hira: “Nalimbongan ba liwat kamo? Waray tinoo ha iya nga mga lider o mga Pariseo, diri ba? Pero ini nga mga tawo nga diri nasabot han Balaud mga ginpanhimaraot.”

Tungod hito, hi Nicodemo nga Pariseo ngan usa nga magmarando han mga Judio (o membro han Sanhedrin), waray kahadlok nga nagyakan basi depensahan hi Jesus. Bangin nahinunumdoman mo nga duha ngan tunga ka tuig na an naglabay, hi Nicodemo kinadto kan Jesus ha gab-i ngan iginpahayag an iya pagtoo. Yana hi Nicodemo nagsiring: “Diri uyon ha aton Balaud nga hukman an tawo kon waray pa hiya mapamatii basi hibaroan kon ano an iya ginbubuhat, diri ba?”

Nagdugang an kasina han mga Pariseo nga gindepensahan hi Jesus han usa ha ira. “Taga-Galilea ka ba liwat?” nakakainsulto nga nagpakiana hira. “Usisaha ngan hibabaroan mo nga waray propeta nga magtitikang ha Galilea.”

Bisan kon diri direkta nga nasiring an Kasuratan nga usa nga propeta an magtitikang ha Galilea, nag-uunabi ito nga an Kristo magtitikang didto, nga makikita hito nga lugar an “duro nga lamrag.” Dugang pa, natawo hi Jesus ha Betlehem, ngan tulin hiya ni David. Bisan kon bangin maaram hito an mga Pariseo, posible nga hira an nagpasarang han sayop nga ginhuhunahuna han mga tawo mahitungod kan Jesus. Juan 7:32-52; Isaias 9:1, 2; Mateo 4:13-17.

▪ Ano an nahitatabo ha kada aga han piyesta, ngan paonan-o ito posible nga ginpabug-atan ni Jesus?

▪ Kay ano nga waray maaresto han mga opisyal hi Jesus? Ano an reaksyon han mga lider han relihiyon?

▪ Hin-o hi Nicodemo, ano an iya ginbuhat para kan Jesus? Ano an reaksyon han iya igkasi-Pariseo?

▪ Ano an pamatuod nga an Kristo magtitikang ha Galilea?