Kapitulo 108

Waray Nira Madakop hi Jesus ha Iya mga Pulong

NAGTITINUTDO pa hi Jesus ha templo ngan iya pa la iginbuhayhag an karaotan han iya mga kaaway pinaagi han tulo nga ilustrasyon, salit nasina an mga Pariseo ngan nagsarabot hira kon paonan-o madadakop hiya ha iya mga pulong basi maaresto hiya. Nagplano hira ngan ginpakadto an ira mga sumurunod, upod an mga membro han partido ni Herodes, basi bilngan hiya hin sayop.

“Magturutdo,” nagsiring hira, “maaram kami nga nagsusumat ka han kamatuoran ngan nagtututdo han dalan han Dios uyon ha kamatuoran, ngan waray ka ginpapaurog, kay an imo ginkikita diri an gawas nga hitsura han tawo. Salit sumati kami, Ha imo hunahuna, uyon ba ha balaud nga magbayad hin buhis ha Cesar o diri?”

Waray mauwat hi Jesus han pag-ulog-ulog. Nasantop niya nga kon sumiring hiya, ‘Diri uyon ha balaud o diri husto nga magbayad hin buhis,’ aakusaran hiya nga nagrirebelde ha Roma. Pero kon sumiring hiya, ‘Oo, kinahanglan kamo magbayad hin buhis,’ masisina ha iya an mga Judio nga nangangalas ha pagin sakop han Roma. Salit binaton hiya: “Kay ano nga ginsasarihan niyo ako, mga hipokrito? Ipakita ha akon an sinselyo nga iginbabayad ha buhis.”

Han gintagan hiya hin sinselyo, nagpakiana hiya: “Kan kanay ini ladawan ngan titulo?”

Binaton hira: “Kan Cesar.”

“Kon sugad, ihatag ha Cesar an mga butang han Cesar, pero ihatag ha Dios an mga butang han Dios.” Han hinbatian nira an maopay gud nga baton ni Jesus, nahipausa hira. Ngan binaya hira ngan waray na hiya disturboha.

Nakita han mga Saduseo, nga diri natoo han pagkabanhaw, nga waray nahimo an mga Pariseo kontra kan Jesus salit dinaop hira ha iya ngan nagpakiana: “Magturutdo, hi Moises nagsiring: ‘Kon an usa nga tawo mamatay nga waray mga anak ha iya asawa, kinahanglan pangasaw-on han iya bugto an iya asawa basi magkaada mga anak para ha iya.’ May pito nga magburugto dinhi ha amon. An suhag nag-asawa ngan namatay, pero tungod kay waray hiya mga anak, an iya asawa ginpangasawa han iya bugto. Sugad liwat hito an nahitabo ha ikaduha, ikatulo, tubtob ha ikapito. Paglabay han panahon, namatay an babaye. Kon sugad, ha pagkabanhaw, hin-o ha pito an iya magigin bana, kay nagin asawa hiya nira ngatanan?”

Hi Jesus binaton: “Diri ba tungod hini nagsasayop kamo, kay diri kamo maaram han Kasuratan ngan han gahum han Dios? Kay kon banhawon hira, an kalalakin-an diri na mag-aasawa ngan an kababayin-an diri na pangangasaw-on, kondi magigin sugad na hira hin mga anghel ha langit. Pero mahitungod han mga patay nga mababanhaw, waray ba niyo mabasa an iginsurat ni Moises mahitungod han tunukon nga tanom, nga didto nagsiring ha iya an Dios: ‘Ako an Dios ni Abraham ngan Dios ni Isaac ngan Dios ni Jacob’? Hiya an Dios, diri han mga patay, kondi han mga buhi. Nagsasayop gud kamo.”

Nahipausa na liwat an mga tawo ha iya baton. Bisan an iba nga mga eskriba nagsiring: “Magturutdo, tama gud an imo ginsiring.”

Han nakita han mga Pariseo nga waray makatingog an mga Saduseo ha ginsiring ni Jesus, dinaop hira ha iya sugad nga usa ka grupo. Basi sarihan pa hiya, usa nga eskriba nga kaupod nira an nagpakiana: “Magturutdo, ano an pinakaimportante nga sugo ha Balaud?”

Binaton hi Jesus: “An siyahan, ‘Pamati, O Israel, hi Jehova an aton Dios, ngan uusa la hi Jehova. Higugmaa hi Jehova nga imo Dios ha bug-os mo nga kasingkasing, ha bug-os mo nga kalag, ha bug-os mo nga hunahuna, ngan ha bug-os mo nga kusog.’ An ikaduha amo ini, ‘Higugmaa an imo igkasi-tawo sugad ha imo kalugaringon.’ Waray iba nga sugo nga mas importante hini.” Ha pagkamatuod, nagsiring pa hi Jesus: “Hini nga duha nga sugo iginbasar an bug-os nga Balaud ngan an mga pulong han mga Propeta.”

“Magturutdo, uyon gud ha kamatuoran an imo ginyakan,” inuyon an eskriba. “‘Uusa la an Dios, ngan labot ha Iya waray na iba,’ ngan an paghigugma ha iya ha bug-os nga kasingkasing, ha bug-os nga pagsabot, ngan ha bug-os nga kusog, ngan an paghigugma ha igkasi-tawo sugad ha kalugaringon, mas maopay gud kay ha ngatanan nga bug-os nga mga halad nga sinunog ngan mga halad nga hayop.”

Maaram hi Jesus nga husto gud an baton han eskriba, salit nagsiring hiya: “Diri ka hirayo ha Ginhadian han Dios.”

Tulo ka adlaw na—Domingo, Lunes, ngan Martes—nga nagtitinutdo hi Jesus ha templo. Nalilipay gud an mga tawo ha pagpinamati ha iya, pero karuyag han mga lider han relihiyon nga patayon hiya, kondi tubtob yana waray pa matuman an ira mga plano. Mateo 22:15-40; Marcos 12:13-34; Lucas 20:20-40.

▪ Ano an ginplano han mga Pariseo basi madakop hi Jesus ha iya mga pulong? Ano an resulta kon bumaton hiya hin Oo o Diri?

▪ Ano an baton ni Jesus ha mga Saduseo salit waray nira hiya madakop ha iya mga pulong?

▪ Ano pa an ginhimo han mga Pariseo basi sarihan hi Jesus, ngan ano an resulta?

▪ Durante han ultimo nga ministeryo ni Jesus ha Jerusalem, pira ka adlaw hiya nagtutdo ha templo, ngan ano an epekto hito?