Kapitulo 10

An Ginhadian han Dios Nagmamando!

1, 2. Paonan-o pinamamatud-an nga waray mahihimo an mga gobyerno han tawo?

 BANGIN nakaeksperiensia ka na ha pagpalit hin usa nga kasangkapan, ngan nadiskobrehan mo nga guba ngay-an. Sidngon naton nga nagtawag ka hin usa nga paraayad. Kondi, katapos gud nga “naayad” niya an kasangkapan, naguba ito. Makasurubo gud iton!

² Pariho ito ha mga gobyerno han tawo. An katawohan pirme nga naghihingyap hin usa nga gobyerno nga magsisiguro han kamurayawan ngan kalipayan. Kondi, an daku nga mga pangalimbasug nga maayad an mga guba ha sosiedad diri gud malampuson. Damu na an ginhimo nga mga kasabutan para ha kamurayawan—ngan gintatalapas. Dugang pa, ano nga gobyerno an nakakapahunong han kakablas, maraut nga panhunahuna ha iba, krimen, sakit, ngan kabungkagan ha palibot? An pagmando han tawo diri na maaayad. Bisan an maaramon nga hi Hadi Salomon han Israel nagpakiana: “Mahitungod han tunan-on nga tawo, paonan-o niya hisasabtan an iya dalan?”—Proberbios 20:24.

3. (a) Ano an tema han pagwali ni Jesus? (b) Paonan-o iginsasaysay han iba nga mga tawo an Ginhadian han Dios?

³ Ayaw pagturaw! An marig-on nga gobyerno ha kalibotan diri la usa ka inup. Amo ito an tema han pagwali ni Jesus. Iya tinawag ito nga “an ginhadian han Dios,” ngan iya gintutdoan an iya mga sumuronod nga mag-ampo para hito. (Lukas 11:2; 21:31) Siyempre, an Ginhadian han Dios usahay gin-uunabi ha relihiyoso nga mga katirok. Ha pagkamatuod, minilyon an nag-aampo para hito adlaw-adlaw kon gin-uulit nira an Pag-ampo han Ginoo (tinatawag liwat nga Amay Namon o modelo nga pag-ampo). Kondi magkalainlain an baton han mga tawo kon ginpapakianhan, “Ano an Ginhadian han Dios?” An iba nasiring, “Aada ito ha imo kasingkasing.”  Tinatawag ito han iba nga langit. An Biblia naghahatag hin matin-aw nga baton, sugad han aton makikita.

USA NGA GINHADIAN NGA MAY KATUYOAN

4, 5. Kay ano nga ginpili ni Jehova an usa ka bag-o nga pagpakita han iya pagkasoberano, ngan ano an tutumanon hito?

⁴ Hi Jehova nga Dios pirme nga Hadi, o Soberano nga Magmarando, han uniberso. An kamatuoran nga iya ginlarang an ngatanan nga mga butang an nagbubutang ha iya dida hiton hitaas nga posisyon. (1 Kronikas 29:11; Salmo 103:19; Buhat 4:24) Kondi an Ginhadian nga iginwali ni Jesus usa nga sanga, o ikaduha, ha pagkasoberano ha uniberso han Dios. Iton Mesianiko nga Ginhadian mayada espisipiko nga katuyoan, kondi ano ito?

⁵ Sugad han iginsaysay ha kapitulo 6, an siyahan tawhanon nga mag-asawa nagrebelde kontra ha awtoridad han Dios. Tungod han mga isyu nga iginbangon, ginpili ni Jehova an usa ka bag-o nga pagpakita han iya pagkasoberano. Iginpahibaro han Dios an iya katuyoan ha paghatag hin usa ka “binhi” nga magbubungkag han Halas, hi Satanas, ngan kuhaon an mga epekto han sala nga napanunod han katawohan. An siyahan nga “binhi” amo hi Jesu-Kristo, ngan “an ginhadian han Dios” amo an instrumento nga bug-os nga magpipirde kan Satanas. Pinaagi hini nga Ginhadian, ibabalik ni Jesu-Kristo an pagmando ha tuna ha ngaran ni Jehova ngan ibibindikar an matadong nga pagkasoberano han Dios ha ngatanan nga panahon.—Genesis 3:15; Salmo 2:2-9.

6, 7. (a) Hain an Ginhadian, ngan hin-o an Hadi ngan an iya kaupod nga mga magmarando? (b) Hin-o an mga sakop han Ginhadian?

⁶ Sumala han usa nga hubad han mga pulong ni Jesus ha magraut nga mga Pariseo, hiya nagsiring: “An ginhadian han Dios aada ha sulud niyo.” (Lukas 17:21, King James Version) Karuyag sidngon ba ni Jesus nga an Ginhadian aada ha maraut nga mga kasingkasing hadton maglimbong nga mga tawo? Diri. An labaw ka husto nga hubad han orihinal nga Griego mababasa: “An ginhadian han Dios aada ha butnga niyo.” (New World Translation) Salit hi Jesus, nga aada ha butnga nira, gin-uunabi an iya kalugaringon sugad nga tidaraon nga Hadi. Diri gud kay usa ka butang nga aada ha kasingkasing han usa nga tawo, an Ginhadian han Dios usa ka totoo, nagios nga gobyerno nga mayada usa nga magmarando ngan mga sakop. Ito an langitnon nga gobyerno, kay tinatawag  ito nga “an ginhadian han mga langit” ngan “an ginhadian han Dios.” (Mateo 13:11; Lukas 8:10) Ha bisyon, hinkit-an ni propeta Daniel an Magmarando nga “sugad han anak han tawo” nga gindara ha atubangan han Dios nga Makagagahum-ha-ngatanan ngan tinagan hin nagpapabilin nga “pagmando ngan himaya ngan ginhadian, basi nga an mga tawo, mga nasud ngan mga yinaknan ngatanan mag-alagad ha iya.” (Daniel 7:13, 14) Hin-o ini nga Hadi? Bueno, an Biblia nagtatawag kan Jesu-Kristo nga “an Anak han tawo.” (Mateo 12:40; Lukas 17:26) Oo, ginpili ni Jehova an iya Anak, hi Jesu-Kristo, nga magin Hadi.

⁷ Hi Jesus diri nag-uusahan ha pagmando. Upod niya an 144,000 nga “ginpalit tikang ha tuna” basi magin kaupod niya nga mga hadi ngan mga saserdote. (Pahayag 5:9, 10; 14:1, 3; Lukas 22:28-30) An mga sakop han Ginhadian han Dios magigin usa ka bug-os kalibotan nga pamilya han mga tawo nga nagpapasakop ha pagmando ni Kristo. (Salmo 72:7, 8) Kondi, paonan-o kita makakasiguro nga an Ginhadian tinuod nga magbibindikar han pagkasoberano han Dios ngan ibabalik an paraiso nga mga kahimtang ha aton tuna?

AN PAGKATOTOO HAN GINHADIAN HAN DIOS

8, 9. (a) Paonan-o naton mahimo iilustrar an pagkamasasarigan han mga saad han Ginhadian han Dios? (b) Kay ano nga makakasiguro kita han pagkatotoo han Ginhadian?

⁸ Hunahunaa nga nabungkag han kalayo an imo balay. Yana usa nga sangkay nga mayada mga materyales ha pagtukod hin usa nga balay an nagsasaad nga mabulig ha pagtukod han imo balay ngan magtatagana hin pagkaon para ha imo pamilya. Kon iton nga sangkay pirme nga nagsusumat ha imo han kamatuoran, diri ka ba matoo ha iya? Pananglitan kinabuwasan inuli ka ha balay tikang ha trabaho ngan nakita mo nga an mga trabahador nagtikang ha paglimpyo han mga nahibilin han sunog ngan nagdara hin pagkaon para ha imo pamilya. Sigurado nga bug-os nga nasarig ka nga maabot an panahon, nga diri la mahibabalik an mga butang kondi magigin maoroopay pa ngani kay ha siyahan.

⁹ Sugad man, ginsisiguro ha aton ni Jehova an pagkatotoo han Ginhadian. Sugad han ipinapakita ha libro han Biblia nga Hebreohanon, damu nga mga bahin han Balaud an nagpadagaw han kahikayan han Ginhadian. (Hebreo 10:1) An matagnaon nga paglantaw  han Ginhadian han Dios nakita liwat ha tunan-on nga ginhadian ha Israel. Diri adto ordinaryo nga gobyerno, kay an mga magmarando liningkod ha “trono ni Jehova.” (1 Kronikas 29:23) Dugang pa, igintagna ito: “An setro diri makukuha tikang kan Juda, bisan an tungkod han magmarando tikang ha butnga han iya mga tiil, tubtub nga umabot hi Shiloh; ngan ha iya masugot an ngatanan nga katawohan.” (Genesis 49:10) a Oo, ngada hini nga Judeano nga tulin han kahadian matatawo hi Jesus, an permanente nga Hadi han gobyerno han Dios.—Lukas 1:32, 33.

10. (a) Kan-o gintukod an pundasyon han Mesianiko nga Ginhadian han Dios? (b) Ano iton importante nga buruhaton ha tuna an pangungunahan han magigin igkasi mga magmarando ni Jesus?

¹⁰ An pundasyon han Mesianiko nga Ginhadian han Dios gintukod pinaagi ha pagpilia han mga apostol ni Jesus. (Efeso 2:19, 20; Pahayag 21:14) Hira an siyahan han 144,000 nga magmamando ha langit sugad nga kaupod nga mga hadi upod ni Jesu-Kristo. Samtang hahani ha tuna, ini nga magigin igkasi mga magmarando amo an mangunguna ha pagtestigo nga kampanya, ha pagsunod han sugo ni Jesus: “Lakat . . . ngan manhimo kamo hin mga disipulo ha ngatanan nga mga nasud, bawtismohan hira ha ngaran han Amay ngan han Anak ngan han baraan nga espiritu.”—Mateo 28:19.

11. Paonan-o ginbubuhat an buruhaton nga pagwali-ha-Ginhadian yana nga adlaw, ngan ano an nahihimo hito?

¹¹ An sugo nga maghimo hin mga disipulo ginbubuhat yana ha waray-kapariho nga sukol. An mga Saksi ni Jehova nagpapasamwak han maopay nga sumat han Ginhadian ha bug-os nga kalibotan, uyon han matagnaon nga mga pulong ni Jesus: “Inin maopay nga sumat han ginhadian igwawali ha bug-os inuukyan nga tuna ha pagpamatuod ha ngatanan nga mga nasud; ngan niyan an kataposan maabot.” (Mateo 24:14) Sugad nga bahin han pagwali-han-Ginhadian nga buruhaton, usa ka daku nga programa han pagtutdo an ginbubuhat. Adton nagpapasakop ha mga balaud ngan mga prinsipyo han Ginhadian han Dios nakakaeksperiensia na hin kamurayawan ngan pagkaurosa nga diri nahihimo han mga gobyerno  han tawo. Ini ngatanan matin-aw nga nagpapamatuod nga totoo an Ginhadian han Dios!

12. (a) Kay ano nga angayan nga tawagon an mga parasamwak han Ginhadian nga mga Saksi ni Jehova? (b) Paonan-o naiiba an Ginhadian han Dios tikang ha mga gobyerno han tawo?

¹² Hi Jehova nagsiring ha mga Israelita: “Kamo an akon mga saksi, . . . an akon surogoon nga akon pinili.” (Isaias 43:10-12) Hi Jesus, “an Matinumanon nga Saksi,” madasigon nga nagpahayag han maopay nga sumat han Ginhadian. (Pahayag 1:5; Mateo 4:17) Salit angayan la nga tag-iyahon han mga parasamwak han Ginhadian yana nga adlaw an hatag han Dios nga ngaran nga mga Saksi ni Jehova. Kondi kay ano nga an mga Saksi nagasto  hin daku nga panahon ngan pangalimbasug ha pakiistorya ha iba mahitungod han Ginhadian han Dios? Ginbubuhat nira ini tungod kay an Ginhadian amola an paglaom han katawohan. Diri na mag-iiha mabubungkag an mga gobyerno han tawo, kondi an Ginhadian han Dios diri gud. Ha Isaias 9:6, 7 tinatawag an Magmarando hito, hi Jesus, nga “Prinsipe han Kamurayawan” ngan nagdudugang: “Mawawaray kataposan an kahuraan han hadianon nga pagmando ngan han kamurayawan.” An Ginhadian han Dios diri sugad han mga gobyerno han tawo—nga hahani yana, buwas waray na. Tinuod, an Daniel 2:44 nasiring: “An Dios han langit magpapabangon hin usa nga ginhadian nga diri gud magugunaw. Ngan an ginhadian mismo diri itatapod ha iba nga katawohan. . . . Ito matindog ha kadayonan.”

13. (a) Ano an pipira nga mga problema nga malampuson nga aatubangon han Ginhadian han Dios? (b) Kay ano nga makakasiguro kita nga matutuman an mga saad han Dios?

¹³ Hin-o nga tawhanon nga hadi an makakahimo ha pagtapos han girra, krimen, sakit, gutom, ngan kawaray mga balay? Dugang pa, hin-o nga tunan-on nga magmarando an makakagbanhaw hadton nagkamatay? An Ginhadian han Dios ngan an Hadi hito amo an magbubuhat hini nga mga butang. Diri-magkakaada depekto an Ginhadian, diri sugad han guba nga kasangkapan nga padayon nga nagkikinahanglan hin pag-ayad. Lugod, an Ginhadian han Dios maglalampos, kay hi Jehova nagsasaad: “An akon pulong nga nagawas ha akon baba . . . diri mabalik ha akon nga waray resulta, kondi magtutuman ito hadton akon karuyag, ngan ini maglalampos dida ha butang ngain ko ini iginpapadara.” (Isaias 55:11) An katuyoan han Dios diri mapapakyas, kondi san-o magtitikang an pagmando han Ginhadian?

PAGMANDO HAN GINHADIAN—SAN-O?

14. Ano an sayop nga pagsabot han mga disipulo ni Jesus mahitungod han Ginhadian, kondi ano an hinbabaroan ni Jesus mahitungod han iya pagmando?

¹⁴ “Ginoo, imo ba iginbabalik an ginhadian ha Israel hini nga panahon?” Ini nga pakiana nga iginpakiana han mga disipulo ni Jesus nagpahayag nga hiton nga panahon diri hira maaram han katuyoan han Ginhadian han Dios ngan han itinanda nga panahon han pagtikang hito ha pagmando. Ha pagpahamangno ha ira nga diri magbanabana mahitungod hito nga butang, hi Jesus nagsiring:  “Diri para ha iyo an mahibaro ha mga panahon o mga kapanahonan nga iginbutang han Amay ha iya kalugaringon nga kagamhanan.” Maaram hi Jesus nga an iya pagmando ha tuna igin-andam para ha tidaraon, maiha pa katapos han iya pagkabanhaw ngan pagsaka ngadto ha langit. (Buhat 1:6-11; Lukas 19:11, 12, 15) Igintagna ini han Kasuratan. Paonan-o?

15. Paonan-o an Salmo 110:1 naghahatag ha aton hin pagsabot mahitungod han panahon han pagmando ni Jesus?

¹⁵ Matagnaon nga gintawag hi Jesus sugad nga “Ginoo,” hi Hadi David nagsiring: “Hi Jehova siniring ha akon Ginoo: ‘Lingkod ha akon too nga kamot tubtub nga ibutang ko an imo mga kaaway nga turumbanan han imo mga tiil’” (Salmo 110:1; itanding an Buhat 2:34-36.) Ipinapakita hini nga tagna nga an pagmando ni Jesus diri magtitikang dayon katapos han iya pagsaka ngadto ha langit. Lugod, maghuhulat hiya ha too nga kamot han Dios. (Hebreo 10:12, 13) Tubtub san-o magpapadayon ini nga paghulat? San-o magtitikang an iya pagmando? An Biblia nabulig ha aton nga hibaroan an mga baton.

16. Ano an nahitabu han 607 A.K.P., ngan paonan-o nga may kalabutan ini ha Ginhadian han Dios?

¹⁶ An amola nga siyudad ha bug-os nga tuna nga dida hito iginbutang ni Jehova an iya ngaran amo an Jerusalem. (1 Hadi 11:36) Amo liwat ito an kapital han inuyonan-han-Dios tunan-on nga ginhadian nga ladawan han langitnon nga Ginhadian han Dios. Salit, an kabungkagan han Jerusalem pinaagi han mga Babilonyahanon han 607 A.K.P. importante gud. Ini nga hitabu nagtigaman han tinikangan han hilawig nga paghunong han direkta nga pagmando han Dios ha iya katawohan ha tuna. Mga unom ka siglo an naglabay, ipinakita ni Jesus nga ini nga peryodo han napahunong nga pagmando nagpapadayon pa gihapon, kay hiya nagsiring: “An Jerusalem pagtatamakan han mga nasud, tubtub nga matuman an itinanda nga mga panahon han mga nasud.”—Lukas 21:24.

17. (a) Ano “an itinanda nga mga panahon han mga nasud,” ngan tubtub san-o ito magpapadayon? (b) Kan-o nagtikang ngan natapos “an itinanda nga mga panahon han mga nasud”?

¹⁷ Durante han “itinanda nga mga panahon han mga nasud,” an kalibotanon nga mga gobyerno tutugotan ha pagpahunong han pagmando nga inuyonan han Dios. Iton nga peryodo nagtikang ha kabungkagan han Jerusalem han 607 A.K.P., ngan ipinakita ni  Daniel nga magpapadayon ito ha “pito nga mga panahon.” (Daniel 4:23-25) Mationan-o kahilawig iton? Ipinapakita han Biblia nga an tulo ngan tunga nga “mga panahon” amo an 1,260 ka adlaw. (Pahayag 12:6, 14) An doble hiton nga peryodo, o pito nga mga panahon, magigin 2,520 ka adlaw. Kondi waray makatirigamnan nga nahitabu ha kataposan hiton halipot nga peryodo han panahon. Kondi, pinaagi ha paggamit han “usa ka adlaw ha usa ka tuig” ha tagna ni Daniel ngan pag-ihap hin 2,520 ka tuig tikang han 607 A.K.P., maabot kita ha tuig 1914 K.P.—Numeros 14:34; Esekiel 4:6.

18. Ano an ginbuhat ni Jesus katapos gud nga nakarawat niya an gahum ha Ginhadian, ngan paonan-o nakaapekto ini ha tuna?

¹⁸ Nagtikang ba hi Jesus ha pagmando ha langit hiton nga panahon? An Kasuratanhon nga mga hinungdan ha pagsiring nga nagtikang hiya paghihisgutan ha masunod nga kapitulo. Siyempre, an tinikangan han pagmando ni Jesus diri titigamnan han kamurayawan dayon ha tuna. Ipinapakita han Pahayag 12:7-12 nga katapos gud nga nakarawat an Ginhadian, paiiwason ni Jesus hi Satanas ngan an demonyo nga mga anghel tikang ha langit. Mangangahulogan ini hin kasakit para ha tuna, kondi makalilipay basahon nga an Yawa mayada na la “halipot nga peryodo han panahon” nga nahibibilin. Diri na mag-iiha, magkakalipay kita diri la tungod kay nagmamando an Ginhadian han Dios kondi liwat tungod kay magdadara ito hin mga bendisyon ha tuna ngan ha masinugtanon nga katawohan. (Salmo 72:7, 8) Paonan-o kita nahibaro nga mahitatabu ito ha diri na mag-iiha?

[Footnote]

SARIHI AN IMO KAHIBARO

Ano an Ginhadian han Dios, ngan tikang diin ito nagmamando?

Hin-o an nagmamando ha Ginhadian, ngan hin-o an mga sakop hito?

Paonan-o ginsisiguro ha aton ni Jehova nga totoo an iya Ginhadian?

Kan-o nagtikang ngan natapos “an itinanda nga mga panahon han mga nasud”?

[Mga Pakiana]

[Kahon ha pahina 94]

PIPIRA HAN IMPORTANTE NGA MGA HITABU MAY KALABUTAN HA GINHADIAN HAN DIOS

• Iginpapahibaro ni Jehova an iya katuyoan ha paghatag hin usa nga “binhi” nga magbubungkag ha Halas, hi Satanas nga Yawa.—Genesis 3:15.

• Han 1943 A.K.P., iginpapasabot ni Jehova nga ini nga “binhi” magigin usa ka tawhanon nga tulin ni Abraham.—Genesis 12:1-3, 7; 22:18.

• An Balaud nga kauyonan nga iginhatag ha Israel han 1513 A.K.P., “nagpapadagaw han magopay nga mga butang nga maabut.”—Eksodo 24:6-8; Hebreo 10:1.

• An tunan-on nga ginhadian han Israel nagtikang han 1117 A.K.P., ngan nagpadayon ito ha urhi ha tulin ni David.—1 Samuel 11:15; 2 Samuel 7:8, 16.

• Ginbungkag an Jerusalem han 607 A.K.P., ngan nagtikang “an itinanda nga mga panahon han mga nasud.”—2 Hadi 25:8-10, 25, 26; Lukas 21:24.

• Han 29 K.P., gindihogan hi Jesus sugad nga Pinili-nga-Hadi ngan nagtikang ha iya tunan-on nga ministeryo.—Mateo 3:16, 17; 4:17; 21:9-11.

• Han 33 K.P., hi Jesus sinaka ngadto ha langit, basi maghulat didto ha too nga kamot han Dios tubtub nga magtikang an iya pagmando.—Buhat 5:30, 31; Hebreo 10:12, 13.

• Hi Jesus nahitrono ha langitnon nga Ginhadian han 1914 K.P. han natapos “an itinanda nga mga panahon han mga nasud.”—Pahayag 11:15.

• Hi Satanas ngan an iya mga demonyo iginhulog ha palibot han tuna ngan nagpauswag han kasakitan ha katawohan.—Pahayag 12:9-12.

• Hi Jesus nagmamangno han bug-os kalibotan nga pagwali han maopay nga sumat han Ginhadian han Dios.—Mateo 24:14; 28:19, 20.