Atohi an mga Puwersa han Magraut nga Espiritu!
Kapitulo 12
Atohi an mga Puwersa han Magraut nga Espiritu!
1. Paonan-o ginmios hi Jesus han atubangon niya an magraut nga espiritu?
KATAPOS gud han iya bawtismo, nagpakadto hi Jesu-Kristo ha kamingawan han Judea basi mag-ampo ngan mamalandong. Didto nangalimbasug hi Satanas nga Yawa ha pagsulay ha iya nga magtalapas ha balaud han Dios. Kondi, iginsalikway ni Jesus an pagsulay han Yawa ngan waray malimbongi. Inatubang ni Jesus an iba magraut nga espiritu durante han iya ministeryo ha tuna. Kondi, paulit-ulit, nga iya ginsaway ngan inatohan hira.—Lukas 4:1-13; 8:26-34; 9:37-43.
2. Ano nga mga pakiana an paghihisgutan naton?
2 An mga asoy han Biblia nga nagsasaysay hiton nga mga hitabu sadang makakombinse ha aton nga naeksister an mga puwersa han magraut nga espiritu. Nangangalimbasug hira ha paglimbong ha mga tawo. Kondi maaatohan naton inin magraut nga espiritu. Kondi, diin nagtikang an magraut nga espiritu? Kay ano nga nangangalimbasug hira ha paglimbong ha mga tawo? Ngan ano nga mga paagi an ginagamit nira basi matuman an ira mga tuyo? An paghibaro ha mga baton ha sugad hini nga mga pakiana mabulig ha imo ha pag-ato ha mga puwersa han magraut nga espiritu.
MAGRAUT NGA ESPIRITU—AN IRA TINIKANGAN NGAN TUYO
3. Paonan-o nagkaada Satanas nga Yawa?
3 Hi Jehova nga Dios naghimo hin damu gud espiritu nga mga linarang maiha na antes pa niya larangon an mga tawo. (Job 38:4, 7) Sugad han iginsaysay ha Kapitulo 6, usa hini nga mga anghel an naghingyap nga kinahanglan singbahon hiya han mga tawo imbes nga singbahon hi Jehova. Ha pagpadayon hiton nga tuyo, inin maraut nga anghel kinontra ngan ginpakaraut an Maglalarang, nagpasabot pa ngani ha siyahan nga babaye nga an Dios usa nga buwaon. Angayan, kon sugad, nga inin rebelyoso espiritu nga linarang nakilala sugad nga hi Satanas (parakontra) nga Yawa (parapakaraut).—Genesis 3:1-5; Job 1:6.
4. Paonan-o nakasala an pipira nga mga anghel han adlaw ni Noe?
4 Ha urhi, an iba nga mga anghel dinapig kan Satanas nga Yawa. Han mga adlaw han matadong nga tawo nga hi Noe, binayaan han iba hini an ira pag-alagad ha langit ngan nagsul-ot hin unodnon nga mga lawas basi matagbaw an ira kaipa ha seksuwal nga relasyon ha tunan-on nga kababayin-an. Sigurado nga gin-impluwensiahan ni Satanas iton nga mga anghel nga buhaton iton matinalapasnon nga buhat. Nagtugway ito ha ira pagin amay han dagku nga mga anak nga tinatawag nga Nephilim, nga nagin mga madarahug ha panraugdaug. Han ginpahanabu ni Jehova an daku nga Baha, ginbungkag hito an malimbongon nga katawohan ngan inin diri-natural nga mga anak han matinalapasnon nga mga anghel. An rebelyoso nga mga anghel nakapalagiw ha kabungkagan pinaagi ha paghukas han ira unodnon nga mga lawas ngan binalik ngadto ha espiritu nga lugar. Kondi ginpugngan han Dios ini nga mga demonyo pinaagi ha pagtrato ha ira sugad nga mga isinalikway nga mag-uukoy ha espirituwal nga kasisidman. (Genesis 6:1-7, 17; Judas 6) Kondi hi Satanas, “an magmarando han mga demonyo,” ngan an iya magraut nga mga anghel nagpapadayon ha ira pagrebelde. (Lukas 11:15) Ano an ira tuyo?
5. Ano an tuyo ni Satanas ngan han iya mga demonyo, ngan ano an ginagamit nira basi mahilit-ag an mga tawo?
5 An maraut nga tuyo ni Satanas ngan han mga demonyo amo an pagbirik ha mga tawo pahirayo kan Jehova nga Dios. Salit, ini nga magraut naglilimbong, naghahadluk, ngan nag-aatake ha katawohan ha bug-os nga kasaysayan han tawo. (Pahayag 12:9) An moderno nga mga ehemplo nagpapamatuod nga an pag-atake han mga demonyo labaw nga maraut gud yana kay ha kan-o pa man. Basi mahilit-ag an katawohan, agsub nga ginagamit han mga demonyo an ngatanan nga klase han espiritismo. Paonan-o ginagamit han mga demonyo ini nga espiritismo, ngan paonan-o mo pananalipdan an imo kalugaringon?
KON PAONAN-O NANGANGALIMBASUG AN MAGRAUT NGA ESPIRITU NGA MALIMBONGAN KA
6. Ano an espiritismo, ngan ano an pipira nga mga klase hito?
6 Ano an espiritismo? Amo ito an kahidabi ha mga demonyo, o magraut nga espiritu, direkta man o pinaagi han tawhanon nga espiritista. An tuyo han mga demonyo ha paggamit han espiritismo sugad han paggamit han mga parapangayam ha paon. Nakakadani ito ha magigin biktima. Ngan kon paonan-o nga an parapangayam nagamit hin magkalainlain nga paon ha pagdani ha mga hayop ngada ha iya lit-ag, sugad man an magraut nga espiritu nag-aaghat ha magkalainlain nga klase han espiritismo basi an mga tawo mahiilarum han ira gahum. (Itanding an Salmo 119:110.) An pipira hini nga klase amo an pagtigo, mahika, pamiling hin mga tigaman, barang, mga lumay, pagkonsulta ha mga espiritista, ngan pakiistorya ha mga patay.
7. Mationan-o kahaluag an pagsarang han espiritismo, ngan kay ano nga nag-uuswag ito bisan ha tinatawag nga Kristiano nga katunaan?
7 Malampuson an paon, kay an espiritismo nakakadani ha mga tawo ha bug-os nga kalibotan. Adton nag-uukoy ha mga baryo ha kagurangan nakonsulta ha tambalan nga mga tawo, ngan an mga nag-oopisina ha mga siyudad nakonsulta ha mga astrologo. An espiritismo nag-uuswag bisan ha tinatawag nga Kristiano nga katunaan. An mga pagsaliksik nagpapakita nga ha Estados Unidos la, mga 30 nga mga magasin nga may gintarampo nga sirkulasyon nga sobra 10,000,000 nga nakasentro ha magkalainlain nga klase han espiritismo. An mga taga-Brazil nagasto hin sobra 500 ka milyon dolyar para ha mga kagamitan ha espiritismo kada tuig. Kondi, 80 porsiyento hadton natambong ha espiritistiko nga mga sentro han pagsingba hiton nga nasud amo an bawtisado nga mga Katoliko nga natambong liwat ha Misa. Tungod kay damu nga mga klero an nagbubuhat han espiritismo, damu nga relihiyoso nga mga tawo an naghuhunahuna nga an pagbuhat hito kinakarawat han Dios. Kondi totoo ba ito?
KON KAY ANO NGA GINHUHUKMAN HAN BIBLIA AN PAGBUHAT HAN ESPIRITISMO
8. Ano an Kasuratanhon nga panhunahuna mahitungod han espiritismo?
8 Kon gintututdoan ka nga an pipira nga klase han espiritismo amo an paagi han pagkomunikar ha magopay nga espiritu, bangin mahipausa ka ha paghibaro kon ano an ginsisiring han Biblia mahitungod han espiritismo. An katawohan ni Jehova ginpahamangnoan: “Diri kamo kumadto ha mga espiritista, ngan diri kamo kumunsulta ha propesyonal nga mga paratagna han mga hitabu, basi diri kamo mahugawan nira.” (Lebitiko 19:31; 20:6, 27) An libro han Biblia nga Pahayag nagpapahamangno nga “adton nagbubuhat han espiritismo” hingangadto ha “linaw nga naglalaga hin kalayo ngan asupre. Ini nangangahulogan han ikaduha [waray kataposan] nga kamatayon.” (Pahayag 21:8; 22:15) An ngatanan nga klase han espiritismo diri inuuyonan ni Jehova nga Dios. (Deuteronomio 18:10-12) Kay ano nga sugad hito?
9. Kay ano nga makakasiring kita nga an mga mensahe yana nga adlaw tikang ha kalibotan han mga espiritu diri nagtitikang kan Jehova?
9 Hi Jehova nagsugo hin magopay nga espiritu, o magtadong nga mga anghel, ha pagkomunikar ha pipira nga mga tawo antes makompleto an Biblia. Tikang nga nakompleto ito, an Pulong han Dios naghahatag hin giya nga ginkikinahanglan han mga tawo basi mag-alagad kan Jehova ha paagi nga kinakarawat niya. (2 Timoteo 3:16, 17; Hebreo 1:1, 2) Diri niya ginbabalewaray an iya baraan nga Pulong pinaagi ha paghatag hin mga mensahe ha mga espiritista. An ngatanan han sugad nga mga mensahe yana nga adlaw tikang ha kalibotan han mga espiritu nagtitikang ha magraut nga espiritu. An pagbuhat han espiritismo makakagtugway liwat ha pag-atake han mga demonyo o mahiilarum pa ngani ha gahum han magraut nga espiritu. Salit, an Dios mahigugmaon nga nagpapahamangno ha aton nga diri mahiupod ha bisan ano nga mga buhat han espiritismo. (Deuteronomio 18:14; Galasia 5:19-21) Dugang pa, kon magpadayon kita ha pagbuhat han espiritismo katapos nga hinbaroan an panhunahuna ni Jehova bahin hito, nadapig kita ha rebelyoso magraut nga espiritu ngan magigin mga kaaway han Dios.—1 Samuel 15:23; 1 Kronikas 10:13, 14; Salmo 5:4.
10. Ano an pagtigo, ngan kay ano nga sadang likyan naton ito?
10 Usa nga popular nga klase han espiritismo amo an pagtigo—an pagsari nga mahibaroan an tidaraon o an mga butang nga diri-hinbabaroan pinaagi han bulig han mga espiritu. An pipira nga klase han pagtigo amo an astrolohiya, pagkita ha bola nga kristal, paghatag-kahulogan ha mga inup, panhimalad, ngan pagsumat-han-kapalaran pinaagi ha paggamit han mga baraha. Damu an naghuhunahuna han pagtigo sugad nga diri nakakadaot nga kaliawan, kondi ipinapakita han Biblia nga mayada duok nga kalabutan an mga parapanigo-han-kapalaran ngan an magraut nga espiritu. Pananglitan, gin-uunabi han Buhat 16:16-19 an “usa nga demonyo han pagtigo” nga nakahimo ha usa nga daragita nga buhaton an “kaabtik han panagna.” Kondi, nawara an iya abilidad ha pagsumat han tidaraon han ginpaiwas an demonyo. Matin-aw, an pagtigo usa ka paon nga ginagamit han mga demonyo ha pagdani ha mga tawo ngada ha ira lit-ag.
11. Paonan-o an pagsari ha pagkomunikar ha mga patay naglilit-ag ha usa ka tawo?
11 Kon nabibido ka ha kamatay han usa nga hinigugma nga membro han pamilya o usa ka duok nga sangkay, masayon ka madani han usa pa nga paon. Bangin tagan ka han usa nga espiritista hin espesyal nga impormasyon o bangin makiistorya ha usa ka tingog nga baga in tingog hiton namatay nga tawo. Pag-ikmat! An mga pagsari ha pakiistorya ha mga patay makakagtugway ngada ha lit-ag. Kay ano? Tungod kay an patay diri na nakakagyakan. Sugad la han bangin nahinunumduman mo, an Pulong han Dios matin-aw nga nasiring nga ha kamatayon an tawo “nabalik ngadto ha iya tuna; hiton nga adlaw an iya mga hunahuna nawawara.” An patay “diri maaram han bisan ano.” (Salmo 146:4; Eklesiastes 9:5, 10) Dugang pa, an mga demonyo an tinuod nga hinbabaroan nga nagsusubad han tingog han mga patay ngan naghahatag ha espiritista hin impormasyon mahitungod han usa nga namatay. (1 Samuel 28:3-19) Salit “bisan hin-o nga namamakiana ha patay” nahililit-ag han magraut nga espiritu ngan nagbubuhat kontra han kaburut-on ni Jehova nga Dios.—Deuteronomio 18:11, 12; Isaias 8:19.
TIKANG HA PAGDANI NGADTO HA PAG-ATAKE
12, 13. Ano an ebidensia nga an mga demonyo nagpapadayon ha pagsulay ngan pagsamok ha mga tawo?
12 Kon imo ginsusunod an sagdon han Pulong han Dios mahitungod han espiritismo, imo isasalikway an paon han mga demonyo. (Itanding an Salmo 141:9, 10; Roma 12:9.) Nangangahulogan ba ini nga an magraut nga espiritu mahunong ha pangalimbasug ha pagdakop ha imo? Diri gud! Katapos sulayon hi Jesus hin tulo ka beses, hi Satanas “binulag ha iya tubtub ha lain kombenyente nga panahon.” (Lukas 4:13) Sugad man, an magtig-a an ulo nga espiritu diri la nagdadani ha mga tawo kondi liwat naatake ha ira.
13 Hinumdumi an aton una nga paghisgut han pag-atake ni Satanas ha surogoon han Dios nga hi Job. Ginpahanabu han Yawa an kawara han iya mga hayupan ngan namatay an haros ngatanan han iya mga surogoon. Ginpatay pa ngani ni Satanas an mga anak ni Job. Sunod, ginhampak niya hi Job hin maul-ol nga sakit. Kondi hi Job nagpabilin ha iya integridad ha Dios ngan ginbendisyonan hin daku gud. (Job 1:7-19; 2:7, 8; 42:12) Tikang hadto, ginhihimo han mga demonyo an mga tawo nga magin ngula o buta ngan padayon nga nalilipay ha pag-antos han mga tawo. (Mateo 9:32, 33; 12:22; Markos 5:2-5) Yana nga adlaw, ipinapakita han mga sumat nga ginsasamok han mga demonyo an mga tawo ha seksuwal nga buhat ngan ginduduso an iba tubtub nga malurong. Ira gin-aaghat pa ngani an iba nga pumatay ngan mag-unay, nga mga sala kontra ha Dios. (Deuteronomio 5:17; 1 Juan 3:15) Kondi, yinukot nga mga tawo nga nahilit-ag hadto hinin magraut nga espiritu an binulag hito. Paonan-o nagin posible ini para ha ira? Ira ginbubuhat ito pinaagi ha pagbuhat han importante nga mga pitad.
KON PAONAN-O AN PAG-ATO HA MAGRAUT NGA ESPIRITU
14. Uyon han susbaranan han siyahan-siglo nga mga Kristiano ha Efeso, paonan-o mo maaatohan an magraut nga espiritu?
14 Ano an usa nga paagi nga maaatohan mo an magraut nga espiritu ngan mapapanalipdan mo an imo kalugaringon ngan an imo pamilya tikang ha ira mga lit-ag? An siyahan-siglo nga mga Kristiano ha Efeso nga nagbuhat anay han espiritismo antes magin magtinoohon nagbuhat hin positibo nga mga pitad. Aton mababasa nga “damu hadton nagbuhat han mahika an nagdara han ira mga libro nga tirig-ob ngan ginsunog ito ha atubangan han ngatanan.” (Buhat 19:19) Bisan kon waray ka magbuhat han espiritismo, kuhaa an bisan ano nga may kalabutan han espiritistiko nga mga gamit o bisan ano nga mga butang nga may kalabutan hito. Upod hini an mga libro, mga magasin, mga video, mga karatola, mga plaka han musika, ngan mga butang nga ginagamit para ha espiritistiko nga mga katuyoan. Upod liwat an mga idolo, mga anting-anting ngan iba pa nga mga butang nga ginsusul-ot sugad nga panalipod, ngan mga regalo nga nakarawat tikang ha mga espiritista. (Deuteronomio 7:25, 26; 1 Korinto 10:21) Ha pag-ilustrar: Usa nga mag-asawa ha Thailand an maiha na nga ginsasamok han mga demonyo. Ngan ginkuha nira an mga butang may kalabutan han espiritismo. Ano an resulta? Natalwas hira ha mga pag-atake han mga demonyo ngan katapos hito nag-uswag gud ha espirituwal.
15. Ha pag-ato ha mga puwersa han magraut nga espiritu, ano an usa pa kinahanglanon nga pitad?
15 Basi maatohan an magraut nga espiritu, usa pa an kinahanglanon nga pitad amo an pagbuhat han sagdon ni apostol Pablo nga isul-ot an kompleto nga hatag-han-Dios espirituwal nga hinganiban. (Efeso 6:11-17) Kinahanglan parig-onon han mga Kristiano an ira depensa kontra han magraut nga espiritu. Ano an nahiuupod hiton nga pitad? “Labaw han ngatanan nga mga butang,” siring ni Pablo, “kuhaa an daku nga kalasag han pagtoo, nga iyo ipaparong ha ngatanan naglalaga nga mga pana han maraut nga usa.” Tinuod, kon makurukusog an imo pagtoo durudaku man an imo abilidad ha pag-ato ha mga puwersa han magraut nga espiritu.—Mateo 17:14-20.
16. Paonan-o mo mapaparig-on an imo pagtoo?
16 Paonan-o mo mapaparig-on an imo pagtoo? Pinaagi ha pagpadayon ha pag-aram ha Biblia ngan buhaton an sagdon hito ha imo kinabuhi. An karig-on han pagtoo han usa nadepende labi na ha karig-on han pundasyon hito—an kahibaro han Dios. Diri ka ba nauyon nga an husto nga kahibaro nga imo nakakarawat ngan ginhuhunahuna hin seryoso samtang nag-aaram ka ha Biblia nagpaparig-on han imo pagtoo? (Roma 10:10, 17) Sigurado, kon sugad, samtang nagpapadayon ka hini nga pag-aram ngan hinihimo mo nga batasan an pagtambong ha mga katirok han mga Saksi ni Jehova, an imo pagtoo magririg-on pa gud. (Roma 1:11, 12; Kolosas 2:6, 7) Magigin gamhanan nga panalipod ito kontra ha pag-atake han mga demonyo.—1 Juan 5:5.
17. Ano an dugang nga mga pitad nga kinahanglanon ha pag-ato ha mga puwersa han magraut nga espiritu?
17 Ano pa nga mga pitad an mahimo buhaton han usa ka tawo nga determinado ha pag-ato ha mga puwersa han magraut nga espiritu? An taga-Efeso nga mga Kristiano nagkinahanglan hin panalipod tungod kay nag-ukoy hira ha siyudad nga puno han demonismo. Salit, hi Pablo nagsiring ha ira: “Magpadayon kamo ha pag-ampo ha tagsa nga okasyon ha espiritu.” (Efeso 6:18) Tungod kay nag-uukoy kita ha kalibotan nga puno hin mga demonyo, an madasigon nga pag-ampo para han panalipod han Dios kinahanglanon ha pag-ato ha magraut nga espiritu. (Mateo 6:13) Makakabulig hini an espirituwal nga bulig ngan mga pag-ampo han pinili nga mga tigurang ha Kristiano nga kongregasyon.—Jakobo 5:13-15.
IGPADAYON AN IMO PAKIG-AWAY KONTRA HAN MAGRAUT NGA ESPIRITU
18, 19. Ano an mahimo buhaton kon an mga demonyo nagsasamok utro ha usa ka tawo?
18 Kondi, bisan katapos buhaton inin importante nga mga pitad, an iba gintatarhog han magraut nga espiritu. Pananglitan, usa nga lalaki ha Côte d’Ivoire an nag-aram ha Biblia upod han mga Saksi ni Jehova ngan ginbungkag an ngatanan niya nga mga anting-anting. Katapos hito, nag-uswag hiya hin maopay, igindedikar an iya kinabuhi kan Jehova, ngan nabawtismohan. Kondi usa ka semana katapos han iya bawtismo, an mga demonyo nagtikang magsamok ha iya utro, ngan may mga tingog nga nagsumat ha iya nga bayaan an iya bag-o nga hin-agian nga pagtoo. Kon mahitabu ini ha imo, nangangahulogan ba ito nga nawara mo an panalipod ni Jehova? Diri.
19 Bisan kon an hingpit nga tawo nga hi Jesus mayada panalipod tikang ha Dios, iya hinbatian an tingog han maraut nga espiritu nga linarang nga hi Satanas nga Yawa. Ipinakita ni Jesus kon ano an bubuhaton ha sugad nga kahimtang. Iya ginsumatan an Yawa: “Iwas ka, Satanas!” (Mateo 4:3-10) Sugad man, diri ka sadang mamati ha mga tingog tikang ha kalibotan han mga espiritu. Atohi an magraut nga espiritu pinaagi ha pagtawag kan Jehova para han bulig. Oo, pag-ampo ha daku nga tingog nga ginagamit an ngaran han Dios. An Proberbios 18:10 nasiring: “An ngaran ni Jehova amo an marig-on nga torre. An matadong nadalagan ngadto ngan ginpapanalipdan.” Ginbuhat ini han Kristiano nga lalaki ha Côte d’Ivoire, ngan an magraut nga espiritu hinmunong ha pagsamok ha iya.—Salmo 124:8; 145:18.
20. Ha sumaryo, ano an mahimo mo buhaton basi maatohan an magraut nga espiritu?
20 Tinutugotan pa ni Jehova an magraut nga espiritu nga magpabilin ha pag-eksister, kondi ipinapakita niya an iya gahum, labi na para ha iya katawohan, ngan an iya ngaran iginpapahayag ha bug-os nga tuna. (Eksodo 9:16) Kon magpabilin ka nga duok ha Dios, diri kinahanglan nga mahadluk ka ha magraut nga espiritu. (Numeros 23:21, 23; Jakobo 4:7, 8; 2 Pedro 2:9) Limitado an ira gahum. Ginsirotan hira han adlaw ni Noe, iginlabog tikang ha langit ha bag-o la nga mga panahon, ngan naghuhulat yana ha kataposan nga paghukom. (Judas 6; Pahayag 12:9; 20:1-3, 7-10, 14) Ha pagkamatuod, nahahadluk hira ha ira tiarabot nga kabungkagan. (Jakobo 2:19) Salit nangangalimbasug man an magraut nga espiritu ha pagdani ha imo ha pipira nga klase han paon o naatake ha imo ha anoman nga paagi, makakaato ka ha ira. (2 Korinto 2:11) Likayi an bisan ano nga klase han espiritismo, buhata an sagdon han Pulong han Dios, ngan pamilnga an pag-uyon ni Jehova. Buhata ini nga waray paglangan, kay an imo kinabuhi nadepende ha imo pag-ato ha mga puwersa han magraut nga espiritu!
SARIHI AN IMO KAHIBARO
Paonan-o nangangalimbasug an magraut nga espiritu nga malimbongan an mga tawo?
Kay ano nga ginhuhukman han Biblia an espiritismo?
Paonan-o makakabulag an usa ka tawo tikang ha mga puwersa han magraut nga espiritu?
Kay ano nga sadang magpadayon ka ha pag-ato ha magraut nga espiritu?
[Mga Pakiana]
[Piktyur ha pahina 110]
Paonan-o mo ginhuhunahuna an damu nga klase han espiritismo?
