Himoa nga Imo Tumong an Pag-alagad ha Dios ha Kadayonan
Kapitulo 18
Himoa nga Imo Tumong an Pag-alagad ha Dios ha Kadayonan
1, 2. Ano an ginkikinahanglan labut pa han pagkaada han kahibaro han Dios?
HUNAHUNAA nga natukdaw ka ha atubangan han usa nga kinandadohan nga purtahan pakadto ha usa nga kuwarto nga nagsusulod hin damu nga mga bahandi. Sidngon naton nga usa ka awtorisado nga tawo an naghatag ha imo han yawi ngan nagsumat ha imo nga bubuligan ka hinin birilhon nga mga butang. Iton nga yawi magigin waray kapulsanan ha imo kon diri mo gamiton ito. Sugad man, kinahanglan gamiton mo an kahibaro kon karuyag mo nga magin mapulsanon ito ha imo.
2 Totoo ini labi na ha kahibaro han Dios. Tinuod, an husto nga kahibaro mahitungod kan Jehova nga Dios ngan kan Jesu-Kristo nangangahulogan hin kinabuhi nga waray kataposan. (Juan 17:3) Kondi, iton nga paglaom diri matutuman pinaagi ha pagkaada la han kahibaro. Sugad la han paggamit mo han birilhon nga yawi, kinahanglan iaplikar mo an kahibaro han Dios ha imo kinabuhi. Hi Jesus nagsiring nga adton nagbubuhat han kaburut-on han Dios “makakasulod ha ginhadian.” An sugad nga mga indibiduwal magkakaada pribilehiyo ha pag-alagad ha Dios ha kadayonan!—Mateo 7:21; 1 Juan 2:17.
3. Ano an kaburut-on han Dios para ha aton?
3 Katapos hibaroan kon ano an kaburut-on han Dios, importante nga buhaton ito. Ano ha hunahuna mo an kaburut-on han Dios para ha imo? Masusuma ito hini nga mga pulong: Subara hi Jesus. An 1 Pedro 2:21 nagsusumat ha aton: “Tungod hini gintawag kamo, kay bisan hi Kristo nag-antos para ha iyo, nga nagbibilin ha iyo hin susbaranan basi sundon niyo hin maopay an iya mga pitad.” Ha pagbuhat han kaburut-on han Dios, kon sugad, kinahanglan sundon mo hin maopay an susbaranan ni Jesus. Sugad hiton inaaplikar mo an kahibaro han Dios.
KON PAONAN-O GINAMIT NI JESUS AN KAHIBARO HAN DIOS
4. Kay ano nga maaram gud hi Jesus mahitungod kan Jehova, ngan paonan-o niya ginamit ini nga kahibaro?
4 Hi Jesu-Kristo mayada labaw kaduok nga kahibaro mahitungod han Dios kay han iba. Nag-ukoy hiya ngan nagbuhat upod ni Jehova nga Dios ha langit ha hilawig nga mga panahon antes hiya kumanhi ha tuna. (Kolosas 1:15, 16) Ngan ano an ginbuhat ni Jesus ha ngatanan hiton nga kahibaro? Waray hiya matagbaw ha pagkaada la hito. Nagkinabuhi hi Jesus uyon hito. Salit maloloy-on gud hiya, mapailubon, ngan mahigugmaon ha iya mga pakig-upod ha igkasi mga tawo. Hiton nga paagi ginsubad ni Jesus an iya langitnon nga Amay ngan nagbuhat uyon han iya kahibaro ha mga dalan ngan personalidad ni Jehova.—Juan 8:23, 28, 29, 38; 1 Juan 4:8.
5. Kay ano nga nagpabawtismo hi Jesus, ngan paonan-o hiya nagkinabuhi uyon ha kahulogan han iya bawtismo?
5 An kahibaro ni Jesus nagpagios liwat ha iya nga buhaton an importante nga pitad. Tikang ha Galilea kinadto hiya ha Salog Jordan, diin ginbawtismohan hiya ni Juan. (Mateo 3:13-15) Ano an ginsimbolohan han bawtismo ni Jesus? Sugad nga Judio, natawo hiya ha usa nga nasud nga dedikado ha Dios. Salit, dedikado na hi Jesus tikang ha katawo. (Eksodo 19:5, 6) Pinaagi ha pagpabawtismo, iya iginpresentar an iya kalugaringon kan Jehova ha pagbuhat han baraan nga kaburut-on para ha iya samtang nakanhi hiya ha tuna. (Hebreo 10:5, 7) Ngan gintuman ni Jesus an kahulogan han iya bawtismo. Nangalimbasug hiya ha pag-alagad kan Jehova, iginpaambit an kahibaro han Dios ha mga tawo ha tagsa nga higayon. Nalipay hi Jesus ha pagbuhat han kaburut-on han Dios, nasiring pa ngani nga sugad hin pagkaon ito para ha iya.—Juan 4:34.
6. Ha ano nga paagi iginlirong ni Jesus an iya kalugaringon?
6 Bug-os nga hinsabtan ni Jesus nga an pagbuhat han kaburut-on ni Jehova mahal hinduro—nga mangangahulogan pa ngani ito han iya kinabuhi. Kondi, iginlirong ni Jesus an iya kalugaringon, iginbutang an iya personal nga mga panginahanglan ha ikaduha nga lugar. An pagbuhat han kaburut-on han Dios pirme nga siyahan. Hini nga bahin, paonan-o naton masusubad an hingpit nga mga susbaranan ni Jesus?
MGA PITAD NGA NAGTUTUGWAY NGADTO HA KINABUHI NGA WARAY KATAPOSAN
7. Ano an pipira nga mga pitad nga kinahanglan buhaton han usa basi magin kalipikado ha bawtismo?
7 Diri sugad kan Jesus, kita diri-hingpit ngan makakadangat ha bawtismo katapos la nga ginbuhat an iba pa importante nga mga pitad. Nagtitikang ini pinaagi ha pagkarawat han husto nga kahibaro mahitungod kan Jehova nga Dios ngan kan Jesu-Kristo ngada ha aton kasingkasing. An pagbuhat hini nakakahimo ha aton nga magbuhat han pagtoo ngan magkaada hilarum nga gugma ha Dios. (Mateo 22:37-40; Roma 10:17; Hebreo 11:6) An pagsunod ha mga balaud, mga prinsipyo, ngan mga suruklan han Dios sadang magpagios ha aton nga magbasol, iginpapahayag an diosnon nga kasubo ha aton naglabay nga mga sala. Nagtutugway ini ha kakombirte, nga amo an, pagtalikod ngan pagbaya ha bisan ano sayop nga kurso nga aton ginsunod han waray pa kita han kahibaro han Dios. (Buhat 3:19) Siyempre, kon ginbubuhat pa naton an pipira nga sala imbes nga buhaton an matadong, waray pa gud kita tumalikod, o ginlilimbongan naton an Dios. Maaram hi Jehova han ngatanan nga kasalingkapaw.—Lukas 12:2, 3.
8. Ano nga buhat an sadang buhaton mo kon karuyag mo makiambit ha pagwali-han-Ginhadian nga buruhaton?
8 Yana nga nakakarawat mo na an kahibaro han Dios, diri ba angayan an paghisgot han espirituwal nga mga butang ha personal gud nga paagi? Bangin disidido ka gud ha pagsumat ha imo mga paryente, mga sangkay, ngan iba pa han imo hinbabaroan. Ha pagkamatuod, bangin ginbubuhat mo na ini, sugad han pagpaambit ni Jesus han maopay nga sumat ha iba ha diri-pormal nga mga kahimtang. (Lukas 10:38, 39; Juan 4:6-15) Yana bangin karuyag mo buhaton an labaw pa. Malilipay an Kristiano nga mga tigurang ha pakiistorya ha imo basi masiguro kon kalipikado ka na ba o makakahimo na nga makiambit ha regular nga pagwali-han-Ginhadian nga buruhaton han mga Saksi ni Jehova. Kon kalipikado ngan makakahimo ka na, maghihimo an mga tigurang hin mga kahikayan para ha imo nga umupod ha usa nga Saksi ha ministeryo. Ginsunod han mga disipulo ni Jesus an iya mga instruksion ha pagbuhat han ira ministeryo ha mahapsay nga paagi. (Markos 6:7, 30; Lukas 10:1) Magpapahimulos ka tikang ha pariho nga bulig samtang nakikiambit ka ha pagpasarang han mensahe han Ginhadian ha balay-balay ngan ha iba pa nga mga paagi.—Buhat 20:20, 21.
9. Paonan-o an tawo naghihimo hin dedikasyon ha Dios, ngan paonan-o an dedikasyon nakakaapekto ha kinabuhi han tawo?
9 An pagwali han maopay nga sumat ha ngatanan nga klase han mga tawo ha teritoryo han kongregasyon amo an usa nga paagi ha pagbiling hadton nauyon ha katadongan ngan usa han magopay nga mga buhat nga nagpapamatuod nga mayada ka pagtoo. (Buhat 10:34, 35; Jakobo 2:17, 18, 26) An regular nga pagtambong ha Kristiano nga mga katirok ngan pagkaada mapulsanon nga pakiambit ha pagwali nga buruhaton amo an mga paagi liwat ha pagpakita nga nagbabasol ka ngan nakombirte ngan determinado na yana ha pagkinabuhi uyon ha kahibaro han Dios. Ano an sunod makatadonganon nga pitad? Amo an paghimo hin dedikasyon kan Jehova nga Dios. Nangangahulogan ini nga ha kinasingkasing nga pag-ampo, imo ginsusumatan an Dios nga kinaburut-on ngan bug-os-kasingkasing nga iginhahatag mo an imo kinabuhi ha iya ha pagbuhat han iya kaburut-on. Sugad hini an paagi han pagdedikar han imo kalugaringon kan Jehova ngan pagkarawat ha maloloy-on nga yugo ni Jesu-Kristo.—Mateo 11:29, 30.
BAWTISMO—KON ANO AN KAHULOGAN HITO PARA HA IMO
10. Kay ano nga sadang ka magpabawtismo katapos nga igindedikar mo an imo kalugaringon kan Jehova?
10 Sumala kan Jesus, an ngatanan hadton nagin mga disipulo ni Jesus kinahanglan magpabawtismo. (Mateo 28:19, 20) Kay ano nga kinahanglanon ini katapos mo idedikar an imo kalugaringon ha Dios? Tungod kay igindedikar mo an imo kalugaringon kan Jehova, maaram hiya nga nahigugma ka ha iya. Kondi sigurado nga karuyag mo magbuhat hin dugang pa basi mahibaro an iba mahitungod han imo gugma ha Dios. Bueno, an bawtismo naghahatag ha imo han higayon basi ipahayag ha publiko an imo dedikasyon kan Jehova nga Dios.—Roma 10:9, 10.
11. Ano an kahulogan han bawtismo?
11 An bawtismo hura ha simboliko nga kahulogan. Samtang iginpapailarum ka, o “iginlubong,” ha ilarum han tubig, baga in namatay ka ha imo daan nga paagi han kinabuhi. Han ginawas ka tikang ha tubig, baga in ginawas ka ngada ha bag-o nga kinabuhi, nga ginmamandoan han kaburut-on han Dios ngan diri han imo kalugaringon. Siyempre, diri iton nangangahulogan nga diri ka na makakasala, kay kita ngatanan diri-hingpit ngan salit nakakasala adlaw-adlaw. Kondi, sugad nga dedikado, bawtisado nga surogoon ni Jehova, masulod ka ha usa ka espesyal nga relasyon ha iya. Tungod han imo pagbasol ngan han imo mapainubsanon nga pagpabawtismo, disidido hi Jehova ha pagpasaylo han imo mga sala tungod han halad lukat ni Jesus. Salit an bawtismo nagtutugway ngadto ha limpyo nga konsensia ha atubangan han Dios.—1 Pedro 3:21.
12. Ano an karuyag sidngon han pagpabawtismo (a) “ha ngaran han Amay”? (b) ‘ha ngaran han Anak’? (c) ‘ha ngaran han baraan nga espiritu’?
12 Ginsugo ni Jesus an iya mga disipulo nga bawtismohan an bag-o nga mga disipulo “ha ngaran han Amay ngan han Anak ngan han baraan nga espiritu.” (Mateo 28:19) Ano an karuyag sidngon ni Jesus? An bawtismo “ha ngaran han Amay” nagpapasabot nga bug-os-kasingkasing nga kinakarawat han tawo nga ginbabawtismohan hi Jehova nga Dios sugad nga Maglalarang ngan may katungod nga Soberano han uniberso. (Salmo 36:9; 83:18; Eklesiastes 12:1) An pagin bawtisado ‘ha ngaran han Anak’ nangangahulogan nga kinakarawat han indibiduwal hi Jesu-Kristo—ngan labi na an Iya halad lukat—sugad nga amola nga paagi han kaluwasan nga igintagana han Dios. (Buhat 4:12) An bawtismo ‘ha ngaran han baraan nga espiritu’ nagpapasabot nga kinikilala han kandidato ha bawtismo an baraan nga espiritu ni Jehova, o aktibo nga puwersa, sugad nga instrumento han Dios ha pagtuman han Iya mga katuyoan ngan paghatag gahum ha Iya mga surogoon ha pagbuhat han iya matadong nga kaburut-on ha pakig-upod ha Iya organisasyon nga tinutugwayan han espiritu.—Genesis 1:2; Salmo 104:30; Juan 14:26; 2 Pedro 1:21.
ANDAM KA NA BA HA BAWTISMO?
13, 14. Kay ano nga diri kita sadang mahadlok nga pilion an pag-alagad kan Jehova nga Dios?
13 Tungod kay daku gud an kahulogan han bawtismo ngan amo an pinaka importante nga hitabu ha kinabuhi han usa ka tawo, usa ka pitad ba ito nga sadang mo kahadlukan? Diri gud! Bisan kon an desisyon ha pagpabawtismo diri sadang hunahunaon nga diri-importante, waray ruhaduha nga ito an pinaka maaramon nga desisyon nga mahihimo mo.
14 An bawtismo usa nga ebidensia han imo pagpili ha pag-alagad kan Jehova nga Dios. Hunahunaa an mga tawo nga iginkikita mo. Ha usa o lain nga paagi, diri ba an kada usa ha ira nag-aalagad ha usa nga agaron? An iba nagpapauripon ha bahandi. (Mateo 6:24) An iba mauyatom nga nagpapadayon ha ira karera o nag-aalagad ha ira kalugaringon pinaagi ha pagtuman han ira kalugaringon nga mga hingyap nga amo an importante ha ira kinabuhi. An iba pa nag-aalagad ha buwa nga mga dios. Kondi ginpili mo nga mag-alagad ha matuod nga Dios, hi Jehova. Waray iba nga nagpapakita hin daku nga kalooy, pagpaid, ngan gugma. Ginpapasidunggan han Dios an mga tawo pinaagi han may katuyoan nga buruhaton nga nagtutugway ha ira ngadto ha kaluwasan. Iya ginbabalusan an iya mga surogoon hin kinabuhi nga waray kataposan. Sigurado, an pagsunod ha susbaranan ni Jesus ngan paghatag han imo kinabuhi kan Jehova diri usa nga kurso nga sadang kahadlukan. Ha tinuod, amola ito an nakakapalipay ha Dios ngan bug-os nga makatadonganon.—1 Hadi 18:21.
15. Ano an pipira han komon nga mga ulang ha bawtismo?
15 Kondi, an bawtismo diri an pitad nga sadang buhaton tungod kay naimpluwensiahan han iba nga mga tawo. Personal nga butang ito butnga nimo ngan ni Jehova. (Galasia 6:4) Samtang nag-uuswag ka ha espirituwal, bangin naghuhunahuna ka: “Ano an nagpupugong ha akon ha pagpabawtismo?” (Buhat 8:35, 36) Bangin magpakiana ka ha imo kalugaringon, ‘An pagkontra ba han pamilya an nagpupugong ha akon? Aada pa ba ako ha pipira diri-kasuratanhon nga kahimtang o makasasala nga buhat? Nahahadlok ba ako nga mawara an pag-uyon ha akon ha komunidad?’ Ini an pipira han mga butang nga angay hunahunaon, kondi maminatud-on nga pagturotimbanga ito.
16. Paonan-o ka magpapahimulos tikang ha pag-alagad kan Jehova?
16 Diri maminatud-on an pagturotimbang han negatibo nga mga butang nga diri ginhuhunahuna an mga kapulsanan han pag-alagad kan Jehova. Pananglitan, tagda an pagkontra han pamilya. Hi Jesus nagsaad nga bisan kon an iya mga disipulo nawad-an han ira mga paryente tungod ha pagsunod ha iya, magkakaada hira hin durudaku espirituwal nga pamilya. (Markos 10:29, 30) Inin igkasi mga magtinoohon magpapakita ha imo hin minagburugto nga gugma, mabulig ha imo ha pag-ilub han pagtimaraut, ngan masuporta ha imo dida ha dalan ngadto ha kinabuhi. (1 Pedro 5:9) Labi na an mga tigurang ha kongregasyon mabulig ha imo ha paglampos han mga problema ngan malamposan an iba makuri nga mga kahimtang. (Jakobo 5:14-16) Mahitungod han kawara han pag-uyon hini nga kalibotan, maopay nga magpakiana ka ha imo kalugaringon, ‘Ano an maitatanding ha pagkaada han pag-uyon han Maglalarang han uniberso, ginlilipay hiya ha akon pinili nga kurso han kinabuhi?’—Proberbios 27:11.
PAGKINABUHI UYON HAN IMO DEDIKASYON NGAN BAWTISMO
17. Kay ano nga sadang hunahunaon mo an bawtismo sugad nga tinikangan imbes nga kataposan?
17 Importante nga hinumduman nga an bawtismo diri an kataposan han imo espirituwal nga pag-uswag. Nagtitigaman ito han tinikangan han pag-alagad ha Dios samtang ikaw buhi sugad nga ordinado nga ministro ngan usa han mga Saksi ni Jehova. Bisan kon importante gud an bawtismo, diri ito garantiya han kaluwasan. Hi Jesus waray magsiring: ‘An tagsa nga bawtisado maluluwas.’ Lugod, hiya nagsiring: “Hiya nga nagpapailub tubtob ha kataposan amo an maluluwas.” (Mateo 24:13) Salit, importante nga pamilngon mo siyahan an Ginhadian han Dios pinaagi ha paghimo hito nga siyahan nga importante ha imo kinabuhi.—Mateo 6:25-34.
18. Katapos han bawtismo, ano an pipira nga mga tumong nga angay himoon?
18 Basi makailub ha imo pag-alagad kan Jehova, maruruyag ka ha pagbutang hin espirituwal nga mga tumong para ha imo kalugaringon. An usa mapulsanon nga tumong amo an pagpauswag han imo kahibaro mahitungod han Dios pinaagi han regular personal nga pag-aram ha iya Pulong. Pagplano para han adlaw-adlaw nga pagbasa han Biblia. (Salmo 1:1, 2) Tambong hin regular ha Kristiano nga mga katirok, kay an pakig-upod nga makikita mo didto mabulig ha paghatag ha imo han espirituwal nga kusog. Para ha imo personal nga bahin, kay ano nga diri himoon nga tumong an pagkomento ha mga katirok ha kongregasyon ngan hiton nga paagi dayawon hi Jehova ngan mangalimbasug nga parig-onon an iba? (Roma 1:11, 12) An usa pa nga tumong bangin pagpauswag han kalidad han imo mga pag-ampo.—Lukas 11:2-4.
19. An baraan nga espiritu makakabulig ha imo ha pagpakita han ano nga mga kalidad?
19 Kon karuyag mo nga magkinabuhi uyon han kahulogan han imo bawtismo, kinahanglan magbantay ka pirme ha imo ginbubuhat, tinutugotan an baraan nga espiritu han Dios nga magbunga ha imo han mga kalidad sugad han gugma, kalipay, kamurayawan, pagkamainantuson, kalooy, pagkamaopay, pagtoo, kaaghop, ngan pagpugong-ha-kalugaringon. (Galasia 5:22, 23; 2 Pedro 3:11) Hinumdumi, iginhahatag ni Jehova an iya baraan nga espiritu ha ngatanan nga nag-aampo para hito ngan nasugot ha iya sugad nga iya matinumanon nga mga surogoon. (Lukas 11:13; Buhat 5:32) Salit pag-ampo ha Dios para han iya espiritu ngan pangaro ha iya hin bulig ha pagpakita han mga kalidad nga nakakapalipay ha iya. An sugad nga mga kalidad labaw nga makikita ha imo pagyakan ngan paggawi samtang nagios ka ha impluwensia han espiritu han Dios. Siyempre, an tagsa nga indibiduwal ha Kristiano nga kongregasyon nangangalimbasug nga patuboon an “bag-o nga personalidad” basi labaw nga magin sugad kan Kristo. (Kolosas 3:9-14) An kada usa ha aton naatubang ha magkalainlain nga mga ayat ha pagbuhat hini tungod kay kita aada ha magkalainlain nga kahimtang han espirituwal nga pag-uswag. Tungod kay ikaw diri-hingpit, kinahanglan magbuhat ka hin mauyatom basi magkaada han sugad-Kristo nga personalidad. Kondi ayaw gud pagturaw hini nga bahin, kay posible ito pinaagi han bulig han Dios.
20. Ha ano nga mga paagi masusubad mo hi Jesus ha ministeryo?
20 Usa han imo espirituwal nga mga tumong amo an pagsubad hin maopay han malipayon nga susbaranan ni Jesus. (Hebreo 12:1-3) Minahal niya an ministeryo. Kon nakapribilehiyo ka ha pakiambit ha pagwali-han-Ginhadian nga buruhaton, niyan, ayaw tugoti nga magin rutina la ito. Pangalimbasug nga matagbaw ha pagtutdo ha iba mahitungod han Ginhadian han Dios sugad han ginbuhat ni Jesus. Iaplikar an pagtutdo nga iginhahatag han kongregasyon basi mabuligan ka nga mag-uswag sugad nga magturutdo. Ngan sarig nga hi Jehova makakaghatag ha imo han kusog ha pagtuman han imo ministeryo.—1 Korinto 9:19-23.
21. (a) Paonan-o kita nahibaro nga minahal ni Jehova an matinumanon bawtisado nga mga indibiduwal? (b) Ano an nagpapakita nga importante an bawtismo ha aton kaluwasan ha paghukom han Dios ngada hinin maraut nga sistema han mga butang?
21 An dedikado, bawtisado nga tawo nga matinumanon nga nangangalimbasug ha pagsunod kan Jesus espesyal gud ha Dios. Gin-uusisa ni Jehova an yinukot ka milyon nga mga kasingkasing han mga tawo ngan maaram hiya nga talagsahon gud an sugad nga mga indibiduwal. Iya gintatagad hira nga mga bahandi, “makaruruyag nga mga butang.” (Hagay 2:7) Ipinapakita han mga tagna han Biblia nga gin-iisip han Dios iton nga mga tawo sugad nga tinigamnan basi maluwas ha iya paghukom nga hirani na umabot ngada hinin maraut nga sistema han mga butang. (Esekiel 9:1-6; Malakias 3:16, 18) Ikaw ba “husto nga nauyon para ha kinabuhi nga waray kataposan”? (Buhat 13:48) Hingyap mo gud ba nga tigamnan sugad nga usa nga nag-aalagad ha Dios? An dedikasyon ngan bawtismo bahin hiton nga tigaman, ngan importante ito para ha kaluwasan.
22. Ano nga mga paglaom an ginlalaoman han “daku nga kadam-an”?
22 Katapos han bug-os kalibotan nga Baha, hi Noe ngan an iya pamilya ginawas ha arka ngada ha nalimpyo nga tuna. Sugad man yana, “usa ka daku nga kadam-an” nga nag-aaplikar han kahibaro han Dios ha ira kinabuhi ngan nakarawat han pag-uyon ni Jehova an mayada paglaom nga maluluwas ha kataposan hinin maraut nga sistema han mga butang ngan magpapahimulos han kinabuhi nga waray kataposan ha permanente nalimpyo nga tuna. (Pahayag 7:9, 14) Ano an magigin kahimtang hiton nga kinabuhi?
SARIHI AN IMO KAHIBARO
Paonan-o an karuyag ni Jehova nga gamiton an imo kahibaro mahitungod ha iya?
Ano an pipira nga mga pitad nga nagtutugway ngadto ha bawtismo?
Kay ano nga an bawtismo diri an kataposan kondi an tinikangan?
Paonan-o kita magkikinabuhi uyon ha aton dedikasyon ngan bawtismo?
[Mga Pakiana]
[Piktyur ha pahina 172]
Nagdedikar ka na ba ha Dios ha pag-ampo?
[Piktyur ha pahina 174]
Ano an nagpupugong ha imo ha pagpabawtismo?
