Kan Kanay Pagsingba an Kinakarawat han Dios?
Kapitulo 5
Kan Kanay Pagsingba an Kinakarawat han Dios?
1. Ano an karuyag hibaroan han Samaritana nga babaye mahitungod han pagsingba?
NAGHUNAHUNA ka na ba, kon ‘Kan kanay pagsingba an kinakarawat han Dios?’ Usa ka babaye an bangin nakahunahuna han sugad nga pakiana han nakiistorya hiya kan Jesu-Kristo hirani ha Bukid Gerisim ha Samaria. Ha pagpatin-aw han kaibahan butnga han pagsingba han mga Samaritano ngan han mga Judio, hiya nagsiring: “An amon mga amay nagsingba dinhi hini nga bukid; kondi kamo nasiring nga ha Jerusalem an lugar nga angay magsingba an mga tawo.” (Juan 4:20) Ginsumatan ba ni Jesus an Samaritana nga babaye nga kinakarawat han Dios an ngatanan nga pagsingba? O nagsiring ba hiya nga ginkikinahanglan an espisipiko nga mga butang basi mapalipay an Dios?
2. Ha pagbaton ha Samaritana nga babaye, ano an ginsiring ni Jesus?
2 An nakapakalas nga baton ni Jesus amo ini: “An oras nagtitiarabot nga diri kamo magsisingba ha Amay dinhi hini nga bukid bisan ha Jerusalem.” (Juan 4:21) An mga Samaritano maiha na nga nahadluk kan Jehova ngan nagsingba ha iba nga mga dios ha Bukid Girisim. (2 Hadi 17:33) Yana hi Jesu-Kristo nagsiring nga diri iton nga lugar bisan an Jerusalem an importante ha totoo nga pagsingba.
PAGSINGBA HA ESPIRITU NGAN KAMATUORAN
3. (a) Kay ano nga an mga Samaritano diri gud nakilala ha Dios? (b) Paonan-o an matinumanon nga mga Judio ngan iba pa nakakilala ha Dios?
3 Hi Jesus nagpadayon ha pagsumat ha Samaritana nga babaye: “Iyo ginsisingba an diri niyo hinbabaroan; amon ginsisingba an amon hinbabaroan, kay an kaluwasan tikang ha mga Judio.” (Juan 4:22) An mga Samaritano mayada sayop relihiyoso nga mga ideya ngan ginkarawat an siyahan lima la nga libro han Biblia sugad nga inspirado—ngan ha ira gud la ini kalugaringon nga rebisyon nga tinatawag Samaritano nga Pentateuko. Salit, diri gud hira nakilala ha Dios. Kondi, an mga Judio gintapuran han Kasuratanhon nga kahibaro. (Roma 3:1, 2) An Kasuratan naghatag ha matinumanon nga mga Judio ngan ha iba pa nga mamamati han ira ginkinahanglan basi makilala an Dios.
4. Sumala kan Jesus, ano an kinahanglan buhaton han mga Judio ngan mga Samaritano basi karawaton han Dios an ira pagsingba?
4 Ha tinuod, ipinakita ni Jesus nga kinahanglan bag-ohon han mga Judio ngan mga Samaritano an ira paagi ha pagsingba basi mapalipay an Dios. Hiya nagsiring: “An oras nagtitiarabut, ngan yana na, nga an totoo nga mga magsiringba magsisingba ha Amay ha espiritu ngan kamatuoran, kay, ha tinuod, ginbibiling han Amay an mga sugad hito basi magsingba ha iya. An Dios Espiritu, ngan adton nagsisingba ha iya kinahanglan magsingba ha espiritu ngan kamatuoran.” (Juan 4:23, 24) Kinahanglan singbahon naton an Dios “ha espiritu,” nga ginpapagios han mga kasingkasing nga puno hin pagtoo ngan gugma. Posible an pagsingba ha Dios ‘ha kamatuoran’ pinaagi ha pag-aram ha iya Pulong, an Biblia, ngan pinaagi ha pagsingba ha iya sumala han iya iginpahayag nga kamatuoran. Disidido ka ba ha pagbuhat hiton?
5. (a) Ano an kahulogan han “pagsingba”? (b) Ano an kinahanglan buhaton naton kon karuyag naton nga karawaton han Dios an aton pagsingba?
5 Pinabug-atan ni Jesus nga karuyag han Dios an totoo nga pagsingba. Ipinapakita hini nga mayada mga porma han pagsingba nga diri kinakarawat ni Jehova. An pagsingba ha Dios nangangahulogan hin paghatag ha iya hin matinalahuron nga dungog ngan paghatag hin baraan nga pag-alagad ha iya. Kon karuyag mo ipakita an dungog ha usa ka gamhanan nga magmarando, sigurado nga magigin disidido ka ha pag-alagad ha iya ngan ha pagbuhat han makakapalipay ha iya. Sigurado, kon sugad, karuyag naton nga mapalipay an Dios. Imbes nga magsiring la, ‘An akon relihiyon nakakapalipay ha akon,’ kinahanglan kon sugad nga sigurohon naton nga an aton pagsingba nasunod ha mga kinahanglanon han Dios.
PAGBUHAT HAN KABURUT-ON HAN AMAY
6, 7. Kay ano nga diri kinakarawat ni Jesus an pipira nga nag-aangkon nga iya mga disipulo?
6 Aton basahon an Mateo 7:21-23 ngan kitaon kon maipapatin-aw naton an importante nga butang nga nagsisiguro kon an ngatanan nga pagsingba kinakarawat han Dios. Hi Jesus nagsiring: “Diri an tagsa nga nasiring ha akon, ‘Ginoo, Ginoo,’ makakasulud ha ginhadian han mga langit, kondi an usa nga nagbubuhat han kaburut-on han akon Amay nga aadto ha langit. Damu an masiring ha akon hiton nga adlaw, ‘Ginoo, Ginoo, diri ba nagtagna kami ha imo ngaran, ngan nagpagowa han mga demonyo [magraut nga espiritu nga mga linarang] ha imo ngaran, ngan nagbuhat hin damu gamhanan nga mga buhat ha imo ngaran?’ Ngan niyan akon igsasaysay ha ira: ‘Diri ko kamo kilala! Iwas kamo ha akon, kamo nga mga magburuhat han karat-an.”
7 Importante ha totoo nga pagsingba an pagkilala kan Jesu-Kristo sugad nga Ginoo. Kondi usa ka butang an waray dida ha pagsingba han damu hadton nag-aangkon nga mga disipulo ni Jesus. Siring niya nga an iba magbubuhat hin “gamhanan nga mga buhat,” sugad han milagroso kuno nga mga pagtambal. Kondi, waray nira pagbuhata an ginsiring ni Jesus nga importante. Waray nira “pagbuhata an kaburut-on han [iya] Amay.” Kon karuyag naton nga mapalipay an Dios, kinahanglan hibaroan naton kon ano an kaburut-on han Amay ngan buhaton ito.
HUSTO NGA KAHIBARO—USA KA PANALIPOD
8. Kon karuyag naton nga buhaton an kaburut-on han Dios, ano an ginkikinahanglan, ngan ano iton sayop nga mga panhunahuna an kinahanglan likyan naton?
8 An pagbuhat han kaburut-on han Dios nagkikinahanglan hin husto nga kahibaro mahitungod kan Jehova nga Dios ngan kan Jesu-Kristo. An sugad nga kahibaro nagtutugway ngadto ha kinabuhi nga waray kataposan. Sigurado, kon sugad, karuyag naton ngatanan nga magin seryoso ha pagkaada hin husto nga kahibaro tikang ha Pulong han Dios, an Biblia. An iba nasiring nga diri kinahanglan mabaraka basta sinsero ngan madasigon kita ha aton pagsingba. An iba nag-aangkon, ‘Kon gutiay la an imo hinbabaroan, gutiay man an ginkikinahanglan ha imo.’ Kondi, gindadasig kita han Biblia nga mag-uswag ha kahibaro han Dios ngan ha iya mga katuyoan.—Efeso 4:13; Filipos 1:9; Kolosas 1:9.
9. Paonan-o nagpapanalipod ha aton an husto nga kahibaro, ngan kay ano nga ginkikinahanglan naton an sugad nga panalipod?
9 An sugad nga kahibaro usa ka panalipod basi diri mahugawan an aton pagsingba. Hi apostol Pablo nagyakan mahitungod han usa ka espiritu nga linarang nga “nagpapakaaroanghel han kahayag.” (2 Korinto 11:14) Ha sugad nga paagi nagtatabon, inin espiritu nga linarang—hi Satanas—nangangalimbasug ha paglimbong ha aton ha pagbuhat han mga butang nga kontra han kaburut-on han Dios. An iba nga espiritu nga mga linarang nga kaupod ni Satanas naghuhugaw liwat han pagsingba han mga tawo, kay hi Pablo nagsiring: “An mga butang nga iginhahalad han mga nasud ira iginhahalad ha mga demonyo, ngan diri ha Dios.” (1 Korinto 10:20) Sigurado, damu an naghuhunahuna nga nagsisingba hira ha husto nga paagi, bisan kon diri nira ginbubuhat an karuyag han Dios. Nalimbongan hira ngada ha mahugaw buwa nga pagsingba. Ha urhi hibabaroan naton hin labaw pa an mahitungod kan Satanas ngan han mga demonyo, kondi sigurado nga ginhuhugawan na hini nga mga kaaway han Dios an pagsingba han katawohan.
10. Ano an imo pagbubuhaton kon mayada usa nga tinuyo nga nagbutang hin hilo ha imo ginkukuhaan han tubig, ngan ano an mahihimo han husto nga kahibaro ha Pulong han Dios nga pagbuhaton naton?
10 Kon maaram ka nga mayada usa nga tinuyo nga nagbutang hin hilo ha imo ginkukuhaan han tubig, magpapadayon ka ba ha pag-inum hito? Sigurado, magios ka dayon ha pagbiling hin usa ka surok han limpyo, putli nga tubig. Bueno, an husto nga kahibaro ha Pulong han Dios nagsasangkap ha aton ha pagkilala han totoo nga relihiyon ngan ha pagdumiri han mga hugaw nga nakakahimo han pagsingba nga diri kinakarawat han Dios.
MGA SUGO HAN MGA TAWO SUGAD NGA MGA DOKTRINA
11. Ano an sayop ha pagsingba han damu nga mga Judio?
11 Han nakanhi ha tuna hi Jesus, damu nga mga Judio an waray magbuhat sumala han husto nga kahibaro mahitungod han Dios. Ira nawara kon sugad an higayon nga magkaada limpyo nga pagtindog ha atubangan ni Jehova. Mahitungod ha ira, hi Pablo nagsurat: “Ako nagtitestigo ha ira nga mayada hira kadasig ha Dios; kondi diri sumala han husto nga kahibaro.” (Roma 10:2) Nagdesisyon hira ha ira kalugaringon kon paonan-o sisingbahon an Dios imbes nga mamati ha iya ginsiring.
12. Ano an nakahugaw ha pagsingba han Israel, ngan ano an resulta?
12 An mga Israelita ha tinikangan nagbuhat han hatag-han-Dios nga putli nga relihiyon, kondi nahugawan ito han mga katutdoan ngan mga pilosopiya han mga tawo. (Jeremias 8:8, 9; Malakias 2:8, 9; Lukas 11:52) Bisan kon an Judio relihiyoso nga mga lider nga kilala nga mga Pariseo naghunahuna nga an ira pagsingba kinakarawat han Dios, hi Jesus nagsiring ha ira: “Igo gud an igintagna ni Isaias mahitungod ha iyo nga mga salingkapaw, sugad han nahisurat, ‘Ini nga katawohan nagpapasidungog ha akon ha ira mga im-im, kondi an ira mga kasingkasing hirayo ha akon. Kawang la an ira padayon nga pagsingba ha akon, kay ira igintututdo an mga sugo han mga tawo sugad nga mga doktrina.’”—Markos 7:6, 7.
13. Paonan-o naton mahimo buhaton an ginbuhat han mga Pariseo?
13 Posible ba nga bangin buhaton naton an ginbuhat han mga Pariseo? Mahimo ini mahitabu kon aton susundon an relihiyoso nga mga tradisyon nga iginbilin ha aton imbes nga usisahon an ginsisiring han Dios mahitungod han pagsingba. Ha pagpahamangno hini mismo nga peligro, hi Pablo nagsurat: “An inspirado nga kapahayagan nasiring hin sigurado nga ha urhi nga mga peryodo han panahon an iba magkakahulog tikang ha pagtoo, mamamati ha malimbong inspirado nga mga kapahayagan ngan mga katutdoan han mga demonyo.” (1 Timoteo 4:1) Salit diri igo an pagsiring nga an aton pagsingba nakakapalipay ha Dios. Sugad han Samaritana nga babaye nga iginkita kan Jesus, bangin napanunod naton an aton paagi han pagsingba tikang ha aton mga ginikanan. Kondi kinahanglan magin sigurado kita nga ginbubuhat naton an mga butang nga inuuyonan han Dios.
PAGBANTAY NGA DIRI MASINA AN DIOS
14, 15. Bisan kon mayada kita pipira nga kahibaro ha kaburut-on han Dios, kay ano nga kinahanglan magbantay kita?
14 Kon diri kita magbantay, bangin buhaton naton an butang nga diri kinakarawat han Dios. Pananglitan, hi apostol Juan hinapa ha mga tiil han anghel “ha pagsingba ha iya.” Kondi an anghel nagpahamangno: “Pagbantay! Ayaw pagbuhat hiton! Igkasi uripon mo ako ngan han imo mga kabugtoan nga mayada buruhaton nga pagtestigo kan Jesus. Singbaha an Dios.” (Pahayag 19:10) Salit nakikita mo ba an panginahanglan ha pagsiguro nga an imo pagsingba diri nahuhugawan han bisan ano nga klase han idolatriya?—1 Korinto 10:14.
15 Han an iba nga mga Kristiano nagtikang ha pagbuhat han relihiyoso nga mga kustomre nga waray makapalipay ha Dios, hi Pablo nagpakiana: “Oonan-on niyo an pagbalik ha maluya ngan kablas siyahan nga mga butang ngan karuyag magpauripon na liwat hito? Ginsasaurog niyo an mga adlaw ngan an mga bulan ngan an mga panahon ngan an mga tuig. Nahahadluk ako para ha iyo, bangin ha bisan ano nga paagi nagbuhat ako ha waray kapulsanan mahitungod ha iyo.” (Galasia 4:8-11) Adton mga indibiduwal nagkaada kahibaro mahitungod han Dios kondi ha urhi nakasala pinaagi ha pagsaurog han relihiyoso nga mga kustomre ngan mga piyesta nga diri kinakarawat ni Jehova. Sugad han ginsiring ni Pablo, kita kinahanglan “magpadayon ha pagsiguro kon ano an kinakarawat han Ginoo.”—Efeso 5:10.
16. Paonan-o nabulig ha aton an Juan 17:16 ngan 1 Pedro 4:3 ha pagdesisyon kon an mga piyesta ngan mga kustomre nakakapalipay ha Dios?
16 Kinahanglan sigurohon naton nga linilikyan naton an relihiyoso nga mga piyesta ngan iba pa nga mga kustomre nga nagtatalapas han mga prinsipyo han Dios. (1 Tesalonika 5:21) Pananglitan, hi Jesus nagsiring mahitungod han iya mga sumuronod: “Diri hira bahin han kalibotan, sugad la nga ako diri bahin han kalibotan.” (Juan 17:16) An imo ba relihiyon nagbubuhat han mga seremonya ngan mga piyesta nga nagtatalapas han prinsipyo han neutralidad ngada ha mga buruhaton hini nga kalibotan? O an mga sumuronod ba han imo relihiyon usahay nakikiambit ha mga kustomre ngan mga piyesta nga nag-uupod han paggawi sugad han iginsaysay ni apostol Pedro? Hiya nagsurat: “An panahon nga naglabay igo na basi mabuhat niyo an kaburut-on han mga nasud han nagbubuhat kamo han mga buhat han malaw-ay nga paggawi, mga kairiphon, mga paghubog ha alaksiw, mga aringasa, mga pagpalabawlabaw ha pag-inum, ngan ilegal nga mga idolatriya.”—1 Pedro 4:3.
17. Kay ano nga sadang likyan naton an bisan ano nga butang nga nagpapakita han espiritu han kalibotan?
17 Pinabug-atan ni apostol Juan an panginahanglan nga likyan an bisan ano nga mga buhat nga nagpapakita han espiritu han diri-diosnon nga kalibotan ha palibot naton. Hi Juan nagsurat: “Ayaw niyo higugmaa an kalibotan o an mga butang ha kalibotan. Kon an bisan hin-o nahigugma han kalibotan, an gugma han Amay waray dida ha iya; kay an ngatanan nga butang ha kalibotan—an hingyap han unod ngan an hingyap han mga mata ngan an pagpadayaw han katigayonan han usa—diri tikang ha Amay, kondi tikang ha kalibotan. Dugang pa, an kalibotan nawawara ngan an hingyap hito, kondi hiya nga nagbubuhat han kaburut-on han Dios magpapabilin ha kadayonan.” (1 Juan 2:15-17) Natigamnan mo ba nga adton ‘nagbubuhat han kaburut-on han Dios magpapabilin ha kadayonan? Oo, kon aton buhaton an kaburut-on han Dios ngan likyan an mga buruhaton nga nagpapakita han espiritu hini nga kalibotan, magkakaada kita paglaom han kinabuhi nga waray kataposan!
SUNDA AN HITAAS NGA MGA SURUKLAN HAN DIOS
18. Paonan-o nagsayop an iba nga mga taga-Korinto mahitungod han paggawi, ngan ano an sadang hibaroan naton tikang hini?
18 Karuyag han Dios ha iya mga magsiringba nga nasunod ha iya hitaas nga mga suruklan ha moral. An iba ha kadaan nga Korinto sayop nga naghunahuna nga tutugotan han Dios an imoral nga paggawi. Makikita naton nga sayop hira kon aton babasahon an 1 Korinto 6:9, 10. Kon sisingbahon naton an Dios ha paagi nga kinakarawat niya, kinahanglan lipayon naton hiya ha aton pulong ngan buhat. An imo ba porma han pagsingba nakakahimo ha imo nga buhaton iton?—Mateo 15:8; 23:1-3.
19. Paonan-o an totoo nga pagsingba nakakaapekto ha aton pagtrato ha iba?
19 An aton mga pakig-upod ha iba nga mga tawo sadang magpakita liwat han mga suruklan han Dios. Gindadasig kita ni Jesu-Kristo nga tratohon an iba sugad han karuyag naton nga tratohon kita nira, kay bahin ini han matuod nga pagsingba. (Mateo 7:12) Tigamni an iya ginsiring liwat mahitungod han pagpakita han minagburugto nga gugma: “Tungod hini an ngatanan makilala nga kamo an akon mga disipulo, kon kamo maghigugmaay ha usa kag usa.” (Juan 13:35) An mga disipulo ni Jesus kinahanglan maghigugmaay ha usa kag usa ngan buhaton an maopay ha igkasi mga magsiringba ngan ha iba.—Galasia 6:10.
BUG-OS NGA KALAG NGA PAGSINGBA
20, 21. (a) Ano nga klase han pagsingba an ginkikinahanglan han Dios? (b) Kay ano nga iginsalikway ni Jehova an pagsingba han Israel han adlaw ni Malakias?
20 Ha imo kasingkasing, bangin karuyag mo magsingba ha Dios ha paagi nga kinakarawat niya. Kon amo, kinahanglan magkaada ka han panhunahuna ni Jehova han pagsingba. Pinabug-atan han disipulo nga hi Jakobo nga an panhunahuna han Dios an importante, diri an aton. Hi Jakobo nagsiring: “An porma han pagsingba nga putli ngan waray buring ha panhunahuna han aton Dios ngan Amay amo ini: an pagmangno ha mga ilo ngan balo nga mga babaye ha ira kagol-anan, ngan tipigan an kalugaringon nga waray buring hini nga kalibotan.” (Jakobo 1:27) Nga may hingyap ha pagpalipay ha Dios, an kada usa ha aton kinahanglan mag-usisa han aton pagsingba basi masiguro nga diri ito nahuhugawan han diri-diosnon nga mga buhat o nga diri naton ginpapasibay-an an usa ka butang nga ginhuhunahuna niya nga importante.—Jakobo 1:26.
21 An putli la, bug-os nga kalag nga pagsingba an nakakapalipay kan Jehova. (Mateo 22:37; Kolosas 3:23) Han an nasud han Israel naghatag ha Dios hin gutiay hiton, hiya nagsiring: “An anak nga lalaki, nagpapasidungog ha iya amay; ngan an surogoon, ha iya agaron. Salit kon ako an amay, hain an dungog ha akon? Ngan kon ako an agaron, hain an kahadluk ha akon?” Ira ginpapasina hi Jehova pinaagi ha paghalad ha iya hin buta, piang, ngan may sakit nga mga hayop, ngan iginsalikway niya an sugad nga mga buhat han pagsingba. (Malakias 1:6-8) Takos hi Jehova han pinaka putli nga porma han pagsingba ngan kinakarawat la an esklusibo nga debosyon.—Eksodo 20:5; Proberbios 3:9; Pahayag 4:11.
22. Kon karuyag naton nga karawaton han Dios an aton pagsingba, ano an aton lilikyan, ngan ano an aton pagbubuhaton?
22 An Samaritana nga babaye nga nakiistorya kan Jesus baga in interesado ha pagsingba ha paagi nga inuuyonan han Dios. Kon iton an aton hingyap, lilikyan naton an ngatanan nga nakakahugaw nga mga katutdoan ngan mga buhat. (2 Korinto 6:14-18) Lugod, mangangalimbasug kita nga magkaada husto nga kahibaro mahitungod han Dios ngan buhaton an iya kaburut-on. Susundon naton hin maopay an iya mga kinahanglanon para han kinakarawat nga pagsingba. (1 Timoteo 2:3, 4) An mga Saksi ni Jehova nangangalimbasug ha pagbuhat gud hiton, ngan malipayon nga ginsasagda ka nga makiambit ha ira ha pagsingba ha Dios “ha espiritu ngan kamatuoran.” (Juan 4:24) Hi Jesus nagsiring: “Ginbibiling han Amay an mga sugad hiton basi magsingba ha iya.” (Juan 4:23) Ginlalaoman nga sugad ka hiton nga tawo. Sugad hiton nga Samaritana nga babaye, sigurado nga maruruyag ka ha pagkaada han kinabuhi nga waray kataposan. (Juan 4:13-15) Kondi nakikita mo an mga tawo nga nalalagas ngan namamatay. An masunod nga kapitulo nagsasaysay kon kay ano.
SARIHI AN IMO KAHIBARO
Sugad han ipinakita ha Juan 4:23, 24, ano nga pagsingba an kinakarawat han Dios?
Paonan-o naton masisiguro kon an Dios ba nalilipay ha pipira nga mga kustomre ngan mga piyesta?
Ano an pipira nga mga kinahanglanon para han kinakarawat nga pagsingba?
[Mga Pakiana]
[Bug-os-pahina nga piktyur ha pahina 44]
