Kapitulo 8

Kay Ano nga Tinutugotan han Dios an Pag-antos?

1, 2. Paonan-o agsub nga nagios an mga tawo ha tawhanon nga pag-antos?

 KON naabot an mga kalamidad, ginbubungkag an panag-iya ngan damu nga kinabuhi an nawawara, damu an diri nakakasabot kon kay ano nga nahitatabu an sugad makalilisang nga mga butang. An iba nasasamok han kadaku, kabangis, ngan karaut  han krimen ngan kamadarahog. Ikaw liwat bangin nahipapausa, ‘Kay ano nga tinutugotan han Dios an pag-antos?’

² Tungod kay waray hira hin-aagian nga makapatagbaw nga baton hini nga pakiana, damu an nawawad-an hin pagtoo ha Dios. Naabat hira nga diri hiya interesado ha katawohan. An iba nga nakarawat han pag-antos sugad nga bahin han kinabuhi napupungot ngan ginbabasol an Dios tungod han ngatanan nga karautan ha tawhanon nga sosiedad. Kon mayada ka han sugad nga mga pagbati, sigurado nga magigin interesado ka gud ha mga pahayag han Biblia hini nga mga butang.

AN PAG-ANTOS DIRI TIKANG HA DIOS

3, 4. Kay ano nga makakasiguro kita nga an karautan ngan pag-antos diri tikang kan Jehova?

³ Ginsisiguro ha aton han Biblia nga an pag-antos nga nakikita naton ha aton palibot diri tikang kan Jehova nga Dios. Pananglitan, an Kristiano nga disipulo nga hi Jakobo nagsurat: “Kon ilarum han pagsulay, waray bisan hin-o nga sumiring: ‘Ginsusulay ako han Dios.’ Kay ha magraut nga mga butang diri masusulay an Dios diri man niya susulayon an bisan hin-o.” (Jakobo 1:13) Tungod hito, diri nagtitikang ha Dios an damu nga mga kakurian nga nagdadaut ha katawohan. Diri niya ginsusulay an mga tawo basi magin angayan hira para ha kinabuhi ha langit, diri man niya ginhihimo an mga tawo nga mag-antos han maraut nga mga buhat nga ira ginbuhat ha naglabay nga kinabuhi.—Roma 6:7.

⁴ Dugang pa, bisan kon damu makalilisang nga mga butang an ginbubuhat ha ngaran han Dios o ni Kristo, waray hiaagian ha Biblia nga nagpapasabot nga bisan hin-o ha ira an nauyon bisan kan-o ha sugad nga mga buhat. An Dios ngan hi Kristo hadton nag-aangkon nga nag-aalagad ha ira kondi naglilimbong ngan naninikas, nagpapatay ngan nangangawat, ngan nagbubuhat hin damu iba pa nga mga butang nga nagigin hinungdan han pag-antos han tawo. Ha pagkamatuod, “an dalan han maraut nga usa mangil-ad kan Jehova.” An Dios “hirayo tikang ha mga magraut.”—Proberbios 15:9, 29.

5. Ano an pipira han mga kalidad ni Jehova, ngan mationan-o an iya inaabat mahitungod han iya mga linarang?

⁵ Iginsasaysay han Biblia hi Jehova sugad nga “mahumok  hinduro ha pagbati ngan maloloy-on.” (Jakobo 5:11) Iginpapasamwak hito nga “hi Jehova mahigugmaon han hustisya.” (Salmo 37:28; Isaias 61:8) Hiya diri naninimalos. Mapinairon nga nagmamangno hiya ha iya mga linarang ngan naghahatag ha ira ngatanan han gimaopayi para han ira kaopayan. (Buhat 14:16, 17) Ginbubuhat iton ni Jehova tikang pa gud ha tinikangan han kinabuhi ha tuna.

USA KA HINGPIT NGA TINIKANGAN

6. Paonan-o gin-uunabi han pipira nga mga susmatanon an siyahan nga kasaysayan han katawohan?

⁶ Kita ngatanan hiara na makakita ngan bumati hin kasakit ngan pag-antos. Salit bangin makuri an paghunahuna hin usa ka panahon nga waray pag-antos, kondi sugad hito an mga butang ha tinikangan han kasaysayan han tawo. Bisan an mga susmatanon han pipira nga mga nasud nagsusumat han sugad malipayon nga tinikangan. Ha Griego nga mitolohiya, an siyahan han “Lima nga Panuigon han Tawo” tinawag nga “Bulawanon nga Panuigon.” Hiton nga panuigon an mga tawo nag-ukoy nga malipayon, waray kabudlay, kasakit, ngan nakakadaot nga mga epekto han kalagas. An mga Intsik nasiring nga durante han pagmando han mitolohiko nga Madulaw nga Emperador (Huang-Ti) an mga tawo nag-ukoy ha kamurayawan, nagpahimulos han pagkaurosa bisan pa han mga palibot ngan han ihalas nga mga mananap. An mga Persiano, mga Ehiptohanon, mga Tibetano, mga Peruviano, ngan mga Mexicano mayada mga susmatanon mahitungod han panahon han kalipayan ngan kahingpitan ha tinikangan han kasaysayan han tawo.

7. Kay ano nga ginlarang han Dios an tuna ngan katawohan?

⁷ Gin-uulit la han mga susmatanon han mga nasud an gidadaani nga sinurat nga rekord han kasaysayan han tawo, an Biblia. Iginpapahibaro hito ha aton nga iginbutang han Dios an siyahan tawhanon nga mag-asawa, hi Adan ngan Eva, ha usa ka paraiso tinatawag nga hardin ha Eden ngan nagsugo ha ira: “Magmabungahon ngan magdamu kamo ngan pun-on niyo an tuna ngan pagtag-iyahon niyo ito.” (Genesis 1:28) An aton siyahan nga mga ginikanan nagpahimulos han kahingpitan ngan mayada paglaom nga makita an bug-os nga tuna nga magin usa ka paraiso nga inuukyan han hingpit tawhanon nga pamilya nga nag-uukoy  ha waray kataposan nga kamurayawan ngan kalipayan. Iton an katuyoan han Dios ha paglarang ha tuna ngan katawohan.—Isaias 45:18.

USA KA MARAUT NGA AYAT

8. Ginlaoman hi Adan ngan Eva nga sumugot ha ano nga sugo, kondi ano an nahitabu?

⁸ Basi magpabilin ha pag-uyon han Dios, hi Adan ngan Eva kinahanglan maglikay ha pagkaon tikang ha “kahoy han kahibaro han maopay ngan maraut.” (Genesis 2:16, 17) Kon ira ginsugot an balaud ni Jehova, waray unta pag-antos nga nakakadaut ha kinabuhi han tawo. Pinaagi ha pagsugot ha sugo han Dios, ipinakita nira unta an ira gugma kan Jehova ngan an ira pagkamaunongon ha iya. (1 Juan 5:3) Kondi sugad han aton hinbaroan ha Kapitulo 6, diri sugad hiton an nahitabu. Tungod kay ginsagda ni Satanas, kinaon ni Eva an bunga hiton nga kahoy. Ha urhi, kinaon liwat hi Adan han igindidiri nga bunga.

9. Ano nga isyu may kalabutan kan Jehova an iginbangon ni Satanas?

⁹ Nakikita mo ba an pagkaseryoso han nahitabu? Gin-aatake ni Satanas an posisyon ni Jehova sugad nga Gihitaasi. Pinaagi ha pagsiring kan Eva, “Sigurado gud nga diri ka mamamatay,” ginkontra han Yawa an mga pulong han Dios, “Sigurado gud nga mamamatay ka.” An dugang nga mga pulong ni Satanas nagpapasabot nga nadiri hi Jehova nga hibaroan ni Adan ngan Eva an posibilidad nga magin sugad han Dios, nga diri na Hiya kinahanglan ha pagdesisyon kon ano an maopay ngan maraut. Salit an ayat ni Satanas nagdara hin pagruhaduha ha pagkahusto ngan pagkaangayan han posisyon ni Jehova sugad nga Soberano ha Uniberso.—Genesis 2:17; 3:1-6.

10. Ano nga mga pagpasabot an ginhimo ni Satanas mahitungod han mga tawo?

¹⁰ Iginpasabot liwat ni Satanas nga Yawa nga an mga tawo magpapabilin la nga masinugtanon kan Jehova tubtub nga an pagsugot ha Dios para ha ira kapulsanan. Ha iba nga mga pulong, ginruhaduhaan an integridad han tawo. Nagbutang-butang hi Satanas nga waray tawo nga kinaburut-on nga magpapabilin nga maunongon ha Dios. Inin nakakadaot nga ayat ni Satanas matin-aw nga iginpahayag ha asoy han Biblia mahitungod kan Job, usa ka matinumanon nga surogoon ni Jehova  nga nag-agi hin daku nga pagsari antes han 1600 A.K.P. Kon imo basahon an siyahan duha nga kapitulo han libro nga Job, hisasabtan mo an hinungdan han pag-antos han tawo ngan kon kay ano nga tinutugotan ito han Dios.

11. Ano nga klase hin tawo hi Job, kondi ano nga pagtahap an ginhimo ni Satanas?

¹¹ Hi Job, “usa ka tawo nga hingpit ngan matadong,” nahiilarum ha pag-atake ni Satanas. Siyahan, naghimo hi Satanas hin maraut nga mga motibo kan Job pinaagi ha pagpakiana, “Nahadluk ba hi Job ha Dios nga waray pamurulaton?” Ngan an Yawa tuso nga nagpakaraot ha Dios ngan kan Job pinaagi ha pagbutang-butang nga ginpalit ni Jehova an pagkamaunongon ni Job pinaagi ha pagpanalipod ngan pagbendisyon ha iya. “Kondi, para ha pagbag-o,” gin-ayat ni Satanas hi Jehova, “alayon, bikyawa an imo kamot, ngan kamkama an ngatanan nga iya ngan kitaa kon diri ba hiya magtatampalas ha imo ngada ha imo nawong.”—Job 1:8-11.

12. (a) Ano nga mga pakiana an mababaton la kon gintugotan han Dios hi Satanas nga sarihan hi Job? (b) Ano an resulta han pagsari kan Job?

¹² Nag-aalagad ba hi Job kan Jehova tungod la han ngatanan nga magopay nga iya nakarawat tikang ha Dios? Magpapabilin daw an integridad ni Job ilarum han pagsari? Ha baylo, mayada ba igo nga pagsarig hi Jehova ha iya surogoon basi tugotan nga sarihan hiya? Mababaton la ini nga mga pakiana kon tutugotan ni Jehova hi Satanas nga dad-on ngada kan Job an gikukurii nga pagsari. An matinumanon nga kurso ni Job ilarum han pagsari nga gintugotan han Dios, sugad han iginsaysay ha libro han Job, nagpamatuod nga usa ka bug-os nga pagbindikar han pagkamatadong ni Jehova ngan han integridad han tawo.—Job 42:1, 2, 12.

13. Paonan-o kita nahiuupod ha nahitabu ha Eden ngan kan Job?

¹³ Kondi, an nahitabu ha hardin ha Eden ngan ha tawo nga hi Job, mayada hurohilarum nga kahulogan. An mga isyu nga iginbangon ni Satanas nag-uupod han ngatanan nga katawohan, upod na kita yana nga adlaw. Ginpasiparahan an ngaran han Dios, ngan gin-ayat an iya pagkasoberano. Ginruhaduhaan an pagkamatadong han linarang han Dios, an tawo. Ini nga mga isyu kinahanglan sulbaron. 

KON PAONAN-O AN PAGSULBAD HAN MGA ISYU

14. Kon naatubang hin nakakadaot nga ayat, ano an mahimo buhaton han gintatahapan nga tawo?

¹⁴ Para ha pag-ilustrar, sidngon naton nga ikaw usa nga mahigugmaon nga ginikanan nga mayada pipira nga mga anak ha usa ka malipayon nga pamilya. Pananglitan usa han imo mga amyaw an nagpasarang hin mga buwa, nga ginbubutang-butangan ka nga usa ka maraut nga ginikanan. Kon an imo amyaw nasiring nga an imo mga anak diri nahigugma ha imo, nga hira nagpapabilin la ha imo tungod kay diri hira maaram han maoroopay nga kahimtang, ngan mabaya hira kon mayada usa nga maghatag ha ira hin higayon ha pagbaya ha ira balay. ‘Kabuwaan!’ bangin sumiring ka. Oo, kondi paonan-o mo pamamatud-an ito? Bangin masina an iba nga mga ginikanan. Labut pa han paghimo hin dugang nga mga problema, an sugad madarahog nga baton magpapamatuod ha kabuwaan. An makapatagbaw nga paagi ha pagsulbad  han sugad nga problema amo an pagtugot hin higayon para ha nagtatahap ha imo nga pamatud-an an iya pag-angkon ngan mag-asoy an imo mga anak nga hira sinsero nga nahigugma ha imo.

15. Paonan-o ginpili ni Jehova nga atubangon an ayat ni Satanas?

¹⁵ Hi Jehova pariho han mahigugmaon nga ginikanan. Hi Adan ngan Eva mahimo igpariho ha mga anak, ngan hi Satanas naangay ha bahin han buwaon nga amyaw. Maaramon nga waray bungkaga dayon han Dios hi Satanas, Adan, ngan Eva kondi gintugotan ini nga mga magburuhat hin maraut nga magpadayon nga mabuhi ha halipot nga panahon. Nagtugot ini ha aton siyahan nga mga ginikanan han panahon nga magpanganak ngan tikangan an tawhanon nga pamilya, ngan naghatag ito ha Yawa hin higayon nga pamatud-an kon totoo ba an iya pag-angkon basi masulbad an mga isyu. Kondi, tikang ha tinikangan, maaram an Dios nga an iba nga mga tawo magigin maunongon ha iya ngan pamamatud-an kon sugad nga hi Satanas usa ka buwaon. Mapasalamaton gud kita nga hi Jehova nagpapadayon ha pagbendisyon ngan pagbulig hadton nahigugma ha iya!—2 Kronikas 16:9; Proberbios 15:3.

ANO AN NAPAPAMATUD-AN?

16. Paonan-o an kalibotan nahingada ha gahum ni Satanas?

¹⁶ Durante han haros bug-os nga kasaysayan han tawo, hi Satanas mayada bug-os nga kagawasan ha paghimo han iya mga plano nga mandoan an katawohan. Upod han iba nga mga butang, iniimpluwensiahan niya an politikal nga mga gahum ngan gin-aaghat an mga relihiyon nga tuso nga nagmamando han pagsingba ha iya imbes nga kan Jehova. Salit an Yawa nagin “an dios hini nga sistema han mga butang,” ngan tinatawag hiya nga “an magmarando hini nga kalibotan.” (2 Korinto 4:4; Juan 12:31) Tinuod, “an bug-os nga kalibotan nasandig ha gahum han maraut nga usa.” (1 Juan 5:19) Nangangahulogan ba ini nga napamatud-an an pag-angkon ni Satanas nga maitatalikod niya an ngatanan nga katawohan pahirayo tikang kan Jehova nga Dios? Diri gud! Samtang tinutugotan hi Satanas nga magpabilin ha pag-esksister, hi Jehova nagpapadayon ha pagtuman han iya kalugaringon nga katuyoan. Ano, kon sugad, an  iginpapahayag han Biblia mahitungod han pagtugot han Dios ha karautan?

17. Ano an sadang hinumduman naton mahitungod han hinungdan han karautan ngan pag-antos?

¹⁷ An karautan ngan pag-antos diri tikang kan Jehova. Tungod kay hi Satanas an magmarando hini nga kalibotan ngan an dios hini nga sistema han mga butang, hiya ngan adton nadapig ha iya amo an may baratunon ha kahimtang yana han tawhanon nga sosiedad ngan ha ngatanan nga kakurian nga gin-aantos han katawohan. Waray usa nga may katungod ha pagsiring nga an Dios an naghimo han sugad nga kakurian.—Roma 9:14.

18. Ano an pinamamatud-an han pagtugot ni Jehova han karautan ngan pag-antus mahitungod han ideya han pagbulag tikang ha Dios?

¹⁸ An pagtugot ni Jehova han karautan ngan pag-antos nagpapamatuod nga an pagbulag tikang ha Dios diri nagdadara hin maoroopay nga kalibotan. Diri manigaran, nakikita ha kasaysayan an sunodsunod nga mga kalamidad. An hinungdan hini tungod kay ginpipili han mga tawo nga igpadayon an ira kalugaringon independente nga buhat ngan waray totoo nga pagtagad ha pulong ngan kaburut-on han Dios. Han malingoon nga iginpadayon han kadaan nga katawohan ni Jehova ngan han ira mga lider “an popular nga buhat” ngan iginsalikway an iya pulong, makabungkag an mga resulta. Pinaagi han iya propeta nga hi Jeremias, an Dios nagsiring ha ira: “An mga makinaadmananon naawod. Nalilisang hira ngan dadakpon. Kitaa! Ira iginsalikway an pulong ni Jehova, ngan ano nga kinaadman an aada ha ira?” (Jeremias 8:5, 6, 9) Tungod kay napakyas ha pagsunod ha mga suruklan ni Jehova, an katawohan ha kabug-osan nagin pariho han usa nga barko nga waray timon, nga igin-aanod ha mabalud nga dagat.

19. Ano an proyba nga diri maitatalikod ni Satanas an ngatanan nga mga tawo kontra ha Dios?

¹⁹ An pagtugot han Dios ha karautan ngan pag-antos nagpapamatuod liwat nga waray maitalikod ni Satanas an ngatanan nga katawohan pahirayo tikang kan Jehova. Ipinapakita han kasaysayan nga mayada pirme mga indibiduwal nga nagpapabilin nga matinumanon ha Dios bisan pa han mga pagsulay o mga kakurian nga naabot ha ira. Ha naglabay nga mga siglo, ipinapakita  an gahum ni Jehova para ha iya mga surogoon, ngan an iya ngaran iginpapahayag ha bug-os nga tuna. (Eksodo 9:16; 1 Samuel 12:22) An Hebreo kapitulo 11 nagsusumat ha aton mahitungod han hilawig nga serye han magtinumanon, upod na hi Abel, Enok, Noe, Abraham, ngan Moises. Ha Hebreo 12:1 tinatawag hira nga ‘usa ka daku nga dampog han mga saksi.’ Mga susbaranan hira han diri-nababantad nga pagtoo kan Jehova. Ha moderno nga mga panahon liwat, damu an naghahatag han ira kinabuhi ha diri-nabubungkag nga integridad ha Dios. Pinaagi han ira pagtoo ngan gugma, an sugad nga mga indibiduwal marig-on nga nagpapamatuod nga diri maitatalikod ni Satanas an ngatanan nga mga tawo kontra ha Dios.

20. An pagtugot ni Jehova han karautan ngan pag-antos nga magpadayon nagpapamatuod han ano may kalabutan han Dios ngan han katawohan?

²⁰ Ha kataposan, an pagtugot ni Jehova nga magpadayon an karautan ngan pag-antos nagpapamatuod nga hi Jehova la, an Maglalarang, an mayada abilidad ngan katungod ha pagmando ha katawohan para han ira waray kataposan nga bendisyon ngan kalipayan. Ha naglabay nga mga siglo, ginsarihan han katawohan an damu nga porma han gobyerno. Kondi ano an resulta? An makuri nga mga problema ngan mga krisis nga inaatubang han mga nasud yana nga adlaw amo an igo nga ebidensia nga tinuod, sugad han espisipiko nga gin-uunabi ha Biblia, “an tawo nagmamando ha tawo ha iya karautan.” (Eklesiastes 8:9) Hi Jehova la an makakatalwas ngan makakagtuman han iya orihinal nga katuyoan. Paonan-o niya ini bubuhaton, ngan san-o?

21. Ano an pagbubuhaton kan Satanas, ngan hin-o an gagamiton ha pagbuhat hini?

²¹ Katapos gud nga nabiktima hi Adan ngan Eva ha taktika ni Satanas, iginpahibaro han Dios an Iya katuyoan mahitungod han paagi han kaluwasan. Ini an iginpahayag ni Jehova mahitungod kan Satanas: “Igbubutang ko an away ha butnga nimo ngan han babaye ngan ha butnga han imo binhi ngan han iya binhi. Hiya magtutultog han imo ulo ngan ikaw magtutultog han iya tikod.” (Genesis 3:15) Iton nga pasamwak naggarantiya nga an Yawa diri tutugotan nga magbuhat hin maraut ha kadayonan. Sugad nga Hadi han Mesianiko nga Ginhadian, an iginsaad  nga Binhi, hi Jesu-Kristo, ‘magtutultog kan Satanas ha ulo.’ Oo, “ha diri na mag-iiha,” bubungkagon ni Jesus an rebelde nga hi Satanas!—Roma 16:20.

ANO AN IMO PAGBUBUHATON?

22. (a) Ano nga mga pakiana an kinahanglan atubangon mo? (b) Bisan kon ginbubuhat ni Satanas an ngatanan tungod han iya kasina ha magtinumanon ha Dios, sigurado hira han ano?

²² Tungod kay maaram ka han mga isyu, kan kanay ka madapig? Pamamatud-an mo daw pinaagi han imo mga buhat nga maunongon ka nga nasuporta kan Jehova? Tungod kay maaram hi Satanas nga halipot na la an iya panahon, bubuhaton niya an ngatanan ha pagpahayag han iya kasina ngada hadton karuyag magtipig han integridad ha Dios. (Pahayag 12:12) Kondi makakalaom ka ha Dios para han bulig tungod kay “maaram hi Jehova ha pagtalwas han mga tawo nga may diosnon nga debosyon tikang ha pagsulay.” (2 Pedro 2:9) Diri Niya tutugotan nga pagsulayon kamo labaw han iyo maiilub, ngan maghihimo hiya hin paagi basi kamo makailub han mga pagsulay.—1 Korinto 10:13.

23. Ano an mahimo naton laoman nga may pagsarig?

²³ Nga may pagsarig, pamulaton naton an panahon kon an Hadi nga hi Jesu-Kristo gumios na kontra kan Satanas ngan ha ngatanan nga nasunod ha iya. (Pahayag 20:1-3) Pupuohon ni Jesus an ngatanan nga may baratunon para han kasakitan ngan kasamok nga gin-aantos han katawohan. Antes hiton nga panahon, an labi nga masakit nga klase han pag-antos amo an kamatay han aton mga hinigugma. Basaha an masunod nga kapitulo basi hibaroan kon ano an nahitatabu ha ira.

SARIHI AN IMO KAHIBARO

Paonan-o kita nahibaro nga diri nagtitikang kan Jehova an pag-antos han tawo?

Ano nga mga isyu an iginbangon ni Satanas ha Eden ngan iginpatin-aw han adlaw ni Job?

An pagtugot han Dios ha pag-antos nagpapamatuod han ano?

[Mga Pakiana]