Kon Ano an Ginbuhat Na han Dios Basi Maluwas an Katawohan
Kapitulo 7
Kon Ano an Ginbuhat Na han Dios Basi Maluwas an Katawohan
1, 2. (a) Paonan-o inapresyar han Romano nga sundalo kon hin-o an Anak han Dios? (b) Kay ano nga gintugotan ni Jehova nga mamatay hi Jesus?
USA ka kulop han katrakdag haros 2,000 ka tuig na an naglabay, usa ka Romano nga sundalo an nagkikita ha tulo nga kalalakin-an nga hinayhinay nga nagsasakit tubtub nga namatay. Iton nga sundalo nakatigaman labi na ha usa ha ira—hi Jesu-Kristo. Hi Jesus iginraysang ha usa nga kahoy. Han udto an langit nagdulom han tikamatay na hiya. Han hiya namatay, an tuna nabay-og hin makusog, ngan an sundalo nagsinggit: “Sigurado ini nga tawo amo an Anak han Dios.”—Markos 15:39.
2 Anak han Dios! Husto iton nga sundalo. Hinkit-an pa la niya an pinaka importante nga hitabu nga nahitabu ha tuna. Ha nauna nga mga okasyon, tinawag mismo han Dios hi Jesus nga iya hinigugma nga Anak. (Mateo 3:17; 17:5) Kay ano nga gintugotan ni Jehova an iya Anak nga mamatay? Tungod kay amo ini an paagi han Dios ha pagluwas ha katawohan tikang ha sala ngan kamatayon.
PINILI PARA HA ESPESYAL NGA KATUYOAN
3. Kay ano nga angayan nga an bugtong nga Anak han Dios sadang pilion para han espesyal nga katuyoan mahitungod han katawohan?
3 Sugad han hinbaroan naton ha naglabay dinhi hini nga libro, hi Jesus naeksister na antes hiya magin tawo. Tinatawag hiya nga “bugtong nga Anak” han Dios tungod kay direkta nga ginlarang hiya ni Jehova. Ginamit dayon han Dios hi Jesus ha paglarang han ngatanan iba nga mga butang. (Juan 3:18; Kolosas 1:16) Hi Jesus nalilipay gud ha mga tawo. (Proberbios 8:30, 31) Diri urosahon nga ginpili ni Jehova an iya bugtong nga Anak ha pag-alagad ha usa ka espesyal nga katuyoan han an katawohan nahiilarum ha sirot nga kamatayon!
4, 5. Antes hi Jesus kinanhi ha tuna, ano an iginpahayag han Biblia mahitungod han Mesianiko nga Binhi?
4 Han iginpahayag an iya judisyal nga desisyon mahitungod kan Adan, Eva, ngan Satanas ha tanaman ha Eden, nagyakan an Dios mahitungod han tidaraon nga Manluluwas sugad nga usa ka “binhi.” Ini nga Binhi, o tulin, maabot ha pagkuha han mga kasakitan nga gindara ni Satanas nga Yawa, “an daan nga halas.” Ha pagkamatuod, an iginsaad nga Binhi magbubungkag kan Satanas ngan ha ngatanan nga nasunod ha iya.—Genesis 3:15; 1 Juan 3:8; Pahayag 12:9.
5 Durante han mga siglo, hinayhinay nga iginpahayag han Dios an labaw pa mahitungod han Binhi, nga tinatawag liwat nga Mesias. Sugad han ipinapakita ha tsart ha pahina 37, damu nga mga tagna an naghatag han mga detalye mahitungod han damu nga mga bahin han iya kinabuhi ha tuna. Pananglitan, mag-iilub hiya han makuri nga pagtrato basi matuman an iya bahin ha katuyoan han Dios.—Isaias 53:3-5.
KON KAY ANO NGA MAMAMATAY AN MESIAS
6. Sumala han Daniel 9:24-26, ano an bubuhaton han Mesias, ngan paonan-o?
6 An tagna nga iginsurat ha Daniel 9:24-26 nagtagna nga an Mesias—Dinihogan nga Usa han Dios—magtutuman han usa ka daku nga katuyoan. Makanhi hiya ha tuna “ha paghuman han pagtalapas, ngan ha pagtapos han sala, ngan ha pagtubos han sayop, ngan ha pagdara han pagkamatadong” ha waray kataposan. Kukuhaon han Mesias an sirot nga kamatayon tikang ha matinumanon nga katawohan. Kondi paonan-o niya pagbubuhaton ini? An tagna nagsasaysay nga hiya “pag-uutdon,” o papatayon.
7. Kay ano nga an mga Judio naghalad hin mga hayop, ngan ano an ginpadagawan hini?
7 An kadaan nga mga Israelita maaram han ideya han pagtubos han sayop. Ha ira pagsingba ilarum han Balaud nga iginhatag ha ira han Dios pinaagi kan Moises, pirme nga naghahalad hira hin mga hayop. Nagpahinumdum ini ha katawohan han Israel nga an mga tawo nagkikinahanglan hin usa ka butang ha pagtubos, o pagtabon, han ira mga sala. Ginsumaryo ni apostol Pablo an prinsipyo hini nga paagi: “Kon waray igin-ula nga dugo waray pagpasaylo.” (Hebreo 9:22) An mga Kristiano diri ilarum han Mosaiko nga Balaud upod an mga kinahanglanon hito, sugad han mga halad. (Roma 10:4; Kolosas 2:16, 17) Maaram liwat hira nga an hayop nga mga halad diri makakaghatag hin permanente ngan bug-os nga pagpasaylo han mga sala. Lugod, ini nga mga halad nagpadagaw han labaw kabirilhon nga halad—han Mesias, o Kristo. (Hebreo 10:4, 10; itanding an Galasia 3:24.) Kondi, bangin magpakiana ka, ‘Kinahanglan gud ba nga mamatay an Mesias?’
8, 9. Ano iton presyoso nga mga butang an nawara ni Adan ngan Eva, ngan paonan-o an ira mga buhat nakaapekto ha ira mga tulin?
8 Oo, an Mesias kinahanglan mamatay basi maluwas an katawohan. Basi hisabtan kon kay ano, kinahanglan hinumduman naton an hardin ha Eden ngan sabuton an kadaku han nawara ni Adan ngan Eva han nagrebelde hira ha Dios. An kinabuhi nga waray kataposan iginbutang ha ira atubangan! Sugad nga mga anak han Dios, nagpahimulos liwat hira han direkta nga relasyon ha iya. Kondi han iginsalikway nira an pagmando ni Jehova, nawara nira an ngatanan ngan gindara an sala ngan kamatayon ha tawhanon nga rasa.—Roma 5:12.
9 Baga in ginwaldas han aton siyahan nga mga ginikanan an daku nga bahandi, iginlubong an ira kalugaringon ha daku nga utang. Iginpasa ni Adan ngan Eva iton nga utang ha ira mga tulin. Tungod kay waray kita matawo nga hingpit ngan waray-sala, an kada usa ha aton makasasala ngan namamatay. Kon kita nagkakasakit o nakakayakan hin usa ka butang nga nakakasuol nga naghandum kita nga waray unta naton buhata, naieksperiensiahan naton an mga epekto han aton napanunod nga utang—tawhanon nga pagkadiri-hingpit. (Roma 7:21-25) An aton paglaom la amo an kahibalik han nawara ni Adan. Kondi, diri naton makakarawat an hingpit tawhanon nga kinabuhi. Tungod kay an ngatanan diri-hingpit nga mga tawo nagbubuhat hin sala, kita ngatanan nakakarawat hin kamatayon, diri kinabuhi.—Roma 6:23.
10. Ano an ginkinahanglan basi malukat an nawara ni Adan?
10 Kondi, mahimo daw ighalad an usa ka butang ha baylo han kinabuhi nga nawara ni Adan? An suruklan han Dios ha hustisya nagkikinahanglan hin pagkatimbang, “kalag para han kalag.” (Eksodo 21:23) Salit an kinabuhi kinahanglan ighalad ha pagbayad han kinabuhi nga nawara. Diri la kinabuhi han bisan hin-o nga tawo an makakahimo hito. An Salmo 49:7, 8 nasiring mahitungod han diri-hingpit nga mga tawo: “Waray gud ha ira an makakatubos ha usa nga bugto ha bisan ano nga paagi, bisan paghatag hin lukat ngadto ha Dios tungod ha iya; (ngan an prisyo han pagtubos ha ira kalag mahal hinduro nga makukulang ito ha waray kataposan).” Salit waray na gud ba paglaom ini nga kahimtang? Diri, diri gud.
11. (a) Ano an iginpapasabot han pulong nga “lukat” ha Hebreo? (b) Hin-o gud la an makakalukat han katawohan, ngan kay ano?
11 Ha Hebreo nga yinaknan, an pulong nga “lukat” nagpapasabot han kantidad nga iginbayad ha paglukat ha usa nga bihag ngan nagpapasabot liwat hin katugbang. An tawo la nga mayada hingpit nga kinabuhi an makakaghalad han katugbang han nawara ni Adan. Katapos ni Adan, an natawo la nga hingpit ha tuna amo hi Jesu-Kristo. Salit, tinatawag han Biblia hi Jesus nga “an kataposan nga Adan” ngan nagpapasarig ha aton nga hi Kristo “naghatag han iya kalugaringon sugad nga katugbang nga lukat para han ngatanan.” (1 Korinto 15:45; 1 Timoteo 2:5, 6) Kon iginpasa ni Adan an kamatayon ha iya mga anak, iginpasa liwat ni Jesus an kinabuhi nga waray kataposan. An 1 Korinto 15:22 nagsasaysay: “Sugad la nga ha kan Adan an ngatanan namamatay, sugad man ha kan Kristo an ngatanan mabubuhi.” Angayan, kon sugad, nga hi Jesus tinatawag nga an “Amay ha Kadayonan.”—Isaias 9:6, 7.
KON PAONAN-O IGINBAYAD AN LUKAT
12. Kan-o nagin Mesias hi Jesus, ngan ano nga buhat an iya iginpadayon katapos hito?
12 Han katrakdag han 29 K.P., kinadto hi Jesus ha iya patud nga hi Juan basi magpabawtismo ngan ipresenta an iya kalugaringon ha pagbuhat han kaburut-on han Dios. Hiton nga okasyon gindihogan ni Jehova hi Jesus han baraan nga espiritu. Dida hito hi Jesus nagin an Mesias, o Kristo, an usa nga dinihogan han Dios. (Mateo 3:16, 17) Ngan nagtikang hi Jesus ha iya tulo ngan tunga ka tuig nga ministeryo. Nagbiyahe hiya ha palibot han tuna nga iya natawhan, nagwawali mahitungod han Ginhadian han Dios ngan gintitirok an matinumanon nga mga sumuronod. Kondi, sugad han igintagna, binangon dayon an pagkontra ha iya.—Salmo 118:22; Buhat 4:8-11.
13. Ano nga mga hitabu an nagtugway ha kamatayon ni Jesus sugad nga magtiripig han integridad?
13 Maisugon nga iginbuhayhag ni Jesus an pagkasalingkapaw han relihiyoso nga mga lider, ngan nangalimbasug hira ha pag-iparatay ha iya. Ha kataposan nahimo nira an maraut nga plano nga nag-upod han pagtubyan, sayop nga pagdakop, ilegal nga pagbista, ngan sayop nga sumbong han pagkontra ha gobyerno. Ginhampak hi Jesus, gintuprahan, gintamay, ngan ginhampak han latigo nga gindisenyo ha pagsamad han iya unod. Ngan ginsirotan hiya han Romano nga gobernador nga hi Ponsio Pilato hin kamatayon ha pasakitan nga kahoy. Iginraysang hiya ha usa nga kahoy ngan didto ginbitay nga tadong. An tagsa nga pagginhawa masakit hinduro, ngan naglabay an mga oras antes hiya namatay. Ha bug-os hiton nga pagsakit, hi Jesus nagpabilin ha hingpit nga integridad ha Dios.
14. Kay ano nga gintugotan han Dios an iya Anak nga mag-antos ngan mamatay?
14 Salit, han Nisan 14, 33 K.P., iginhatag ni Jesus an iya kinabuhi sugad nga “lukat ha baylo han damu.” (Markos 10:45; 1 Timoteo 2:5, 6) Tikang ha langit, nakikita ni Jehova an iya hinigugma nga Anak nga nag-aantos ngan namatay. Kay ano nga gintugotan han Dios an sugad makuri nga butang nga mahitabu? Iya ginbuhat ito tungod kay nahigugma hiya ha katawohan. Hi Jesus nagsiring: “An Dios nahigugma gud han kalibotan nga iya iginhatag an iya bugtong nga Anak, basi nga an ngatanan nga nagbubuhat hin pagtoo ha iya diri unta mabungkag kondi magkaada kinabuhi nga waray kataposan.” (Juan 3:16) An kamatayon ni Jesus nagtututdo liwat ha aton nga hi Jehova usa nga Dios han hingpit nga hustisya. (Deuteronomio 32:4) An iba bangin matingala kon kay ano nga waray isalikway han Dios an iya mga prinsipyo han hustisya nga nagkikinahanglan hin kalag para han kalag ngan igbalewaray an bayad nga ginkinahanglan han makasasala nga buhat ni Adan. An hinungdan amo nga pirme ginsusunod ni Jehova an iya mga balaud ngan ginpaparig-on ito, bisan kon daku an mawawara ha iya mismo.
15. Tungod kay diri magigin matadong an pagtugot nga matapos hin permanente an pag-eksister ni Jesus, ano an ginbuhat ni Jehova?
15 An hustisya ni Jehova nagkinahanglan liwat nga an kamatayon ni Jesus mayada malipayon nga resulta. Bueno, magkakaada ba hustisya ha pagtugot han matinumanon nga hi Jesus nga kumaturog ha kamatayon ha kadayonan? Siyempre diri! An Hebreo nga Kasuratan nagtagna nga an maunongon nga usa han Dios diri magpapabilin ha lubnganan. (Salmo 16:10; Buhat 13:35) Kinaturog hiya ha kamatayon ha harani tulo ka adlaw, ngan ginbanhaw hiya ni Jehova nga Dios ha kinabuhi sugad nga gamhanan nga espiritu nga persona.—1 Pedro 3:18.
16. Ano an ginbuhat ni Jesus han binalik hiya ha langit?
16 Ha iya kamatayon, iginhatag ni Jesus an iya tawhanon nga kinabuhi ha bug-os nga panahon. Han pagbanhawa ha kinabuhi ha langit, nahimo hiya nga naghahatag-kinabuhi nga espiritu. Dugang pa, han sinaka hi Jesus ngadto ha pinaka baraan nga lugar han uniberso, nakaupod niya utro an iya hinigugma nga Amay ngan pormal nga iginpresenta ha Iya an bili han iya hingpit tawhanon nga kinabuhi. (Hebreo 9:23-28) An bili hiton presyoso nga kinabuhi magagamit na para ha masinugtanon nga katawohan. Ano an kahulogan hiton para ha imo?
AN LUKAT NI KRISTO NGAN IKAW
17. Paonan-o naton makakarawat an pagpasaylo pinaagi han halad lukat ni Kristo?
17 Tagda an tulo nga paagi nga an halad lukat ni Kristo mapulsanon gud ha imo bisan yana. Siyahan, nagdadara ito hin pagpasaylo han mga sala. Pinaagi han pagtoo ha iginbubo nga dugo ni Jesus, mayada kita han “kagawasan pinaagi han lukat,” oo, “an pagpasaylo han aton mga pagtalapas.” (Efeso 1:7) Salit bisan kon makabuhat kita hin seryoso nga sala, makakapangaro kita ha Dios hin pagpasaylo ha ngaran ni Jesus. Kon totoo nga kita mabinasulon, gagamiton ni Jehova ha aton an bili han halad lukat han iya Anak. An Dios nagpapasaylo ha aton, naghahatag ha aton han bendisyon han maopay nga konsensia, imbes nga ihatag an sirot nga kamatayon tungod han aton pakasala.—Buhat 3:19; 1 Pedro 3:21.
18. Ha ano nga paagi naghahatag ha aton hin paglaom an halad ni Jesus?
18 Ikaduha, an halad lukat ni Kristo naghahatag hin basihanan han aton paglaom para ha tidaraon. Ha bisyon, hinkit-an ni apostol Juan an “usa ka daku nga kadam-an, nga diri sadang maihap han tawo” an maluluwas nga buhi ha tiarabot nga makalilisang nga kataposan hini nga sistema han mga butang. Kay ano nga hira maluluwas kon bungkagon na han Dios an damu hinduro iba pa? Usa ka anghel an nagsumat kan Juan nga “pinanmunakan [han daku nga kadam-an] an ira higlawig nga mga panapton ngan ginpabusag ito ha dugo han Kordero,” hi Jesu-Kristo. (Pahayag 7:9, 14) Tubtub nga nagbubuhat kita hin pagtoo ha iginbubo nga dugo ni Jesu-Kristo ngan magkinabuhi uyon han baraan nga mga kinahanglanon, magigin limpyo kita ha mga mata han Dios ngan magkakaada paglaom han kinabuhi nga waray kataposan.
19. Paonan-o pinamatud-an han halad ni Kristo nga hiya ngan an iya Amay nahigugma ha imo?
19 Ikatulo, an halad lukat amo an gidadakui nga proyba han gugma ni Jehova. An kamatayon ni Kristo an nagpahayag han duha gidadakui nga mga buhat han gugma ha kasaysayan han uniberso: (1) An gugma han Dios ha pagsugo ha iya Anak nga mamatay para ha aton; (2) An gugma ni Jesus ha kinaburut-on nga paghalad han iya kalugaringon sugad nga lukat. (Juan 15:13; Roma 5:8) Kon tinuod nga nagbubuhat kita hin pagtoo, ini nga gugma naaplikar ha kada tagsa ngan kada usa ha aton. Hi apostol Pablo nagsiring: “An Anak han Dios . . . nahigugma ha akon ngan iginhatag an iya kalugaringon tungod ha akon.”—Galasia 2:20; Hebreo 2:9; 1 Juan 4:9, 10.
20. Kay ano nga sadang magbuhat kita hin pagtoo ha halad lukat ni Jesus?
20 Salit, ipakita naton an aton pagpasalamat para han gugma nga ipinakita han Dios ngan ni Kristo pinaagi ha pagbuhat hin pagtoo ha halad lukat ni Jesus. An pagbuhat hito nagtutugway ngadto ha kinabuhi nga waray kataposan. (Juan 3:36) Kondi, an aton kaluwasan diri amo an pinaka importante nga hinungdan han kinabuhi ngan kamatayon ni Jesus ha tuna. Diri, an iya siyahan nga pagtagad amo an durudaku pa gud nga isyu nga nag-uupod ha aton ngatanan tungod kay ipinapakita hito kon kay ano nga tinutugotan han Dios an karautan ngan pag-antos nga magpadayon hin maiha dinhi hini nga kalibotan.
SARIHI AN IMO KAHIBARO
Kay ano nga kinahanglan mamatay hi Jesus ha pagluwas ha katawohan?
Paonan-o iginbayad an lukat?
Ha ano nga mga paagi nakakarawat mo an kapulsanan tikang ha lukat?
[Mga Pakiana]
[Bug-os-pahina nga piktyur ha pahina 67]
